ପାଟନା,୩ା୯: ସିବିଆଇ ଏବଂ ଇଡି ଭଳି କେନ୍ଦ୍ରୀୟ ଏଜେନ୍ସିର ଅପବ୍ୟବହାର ନେଇ ପୁଣି ଭାଜପାକୁ ଟାର୍ଗେଟ୍ କରିଛନ୍ତି ଆରଜେଡି ନେତା ତଥା ବିହାର ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବ। ସେ ପ୍ରଶ୍ନ କରିଛନ୍ତି ଭାରତୀୟ ଜନତା ପାର୍ଟିର ସମସ୍ତ ଏମ୍ପି ଓ ବିଧାୟକ କ’ଣ ପୁରା ଖାଣ୍ଟି? କେହି ଦୁର୍ନୀତିଗ୍ରସ୍ତ ନୁହନ୍ତି? ତେବେ ସମଗ୍ର ଦେଶରେ ଭାଜପାର ୧୦୦୦ ବିଧାୟକ ଏବଂ ୩୦୦ ଏମ୍ପିି ଥିବା ବେଳେ ଜଣଙ୍କ ଘରେ ବି ସିବିଆଇ ଏବଂ ଇଡି ଆଦି କେନ୍ଦ୍ରୀୟ ସଂସ୍ଥା କାହିଁକି ଚଢ଼ାଉ କରୁନାହାନ୍ତିି? କେରଳର କୋଚିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଇଥିବା ମନ୍ତବ୍ୟ ଉପରେ ପ୍ରତିକ୍ରିୟା ରଖି ତେଜସ୍ବୀ ଏଭଳି କହିଛନ୍ତି।
ପ୍ରଧାନମନ୍ତ୍ରୀ ମୋଦି କହିଥିଲେ, ଦେଶରେ ଦୁର୍ନୀତିଗ୍ରସ୍ତ ଲୋକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଜାତୀୟ ରାଜନୀତିରେ ନୂଆ ପରିବର୍ତ୍ତନ ଆଣିଛି। ଏହାଛଡ଼ା କୌଣସି ରାଜନୈତିକ ଦଳର ନାମ ନ ନେଇ କିଛି ଏଭଳି ଗୋଷ୍ଠୀ ଏବେ ଏକାଠି ହେବା ଆରମ୍ଭ କରିଛନ୍ତି। ଲୋକଙ୍କୁ ଏହି ଗୋଷ୍ଠୀ ବିରୋଧରେ ସଜାଗ ରହିବାକୁ ସେ ଅନୁରୋଧ କରିଥିଲେ। ତେବେ ଭାଜପା ଏମ୍ପି ଏବଂ ବିଧାୟକଙ୍କୁ ସୁରକ୍ଷା ମିଳୁଥିବାରୁ କେନ୍ଦ୍ରୀୟ ତଦନ୍ତକାରୀ ସଂସ୍ଥା ସେମାନଙ୍କ ଉପରକୁ ନଜର ପକାଇପାରୁନାହାନ୍ତି ବୋଲି ତେଜସ୍ବୀ ଅଭିଯୋଗ କରିଛନ୍ତି।
