ଝାରସୁଗୁଡ଼ା ଅଫିସ,୪।୬: ବ୍ରଜରାଜନଗର ଉପନିର୍ବାଚନ ଭୋଟ ଗଣତି ଶୁକ୍ରବାର ଝାରସୁଗୁଡ଼ା ବଢ଼େଇମୁଣ୍ଡାସ୍ଥିତ ଇଞ୍ଜିନିୟରିଂ ସ୍କୁଲ୍ ପରିସରରେ ଅନୁଷ୍ଠିତ ହୋଇଥିଲା। ଏହି ପ୍ରକ୍ରିୟା ସକାଳ ୮ଟାରୁ ଆରମ୍ଭ ହୋଇ ଅପରାହ୍ନ ୪ଟାରେ ଶେଷ ହୋଇଥିଲା। ମୋଟ ୧୪ ଟେବୁଲ୍ କରାଯାଇ ପ୍ରତି ଟେବୁଲ୍ରେ ୪ କର୍ମଚାରୀ ନିୟୋଜିତ ହୋଇଥିଲେ। ୨୦ରାଉଣ୍ଡ ଗଣତି କରାଯାଇଥିଲା। ପ୍ରଥମେ ପୋଷ୍ଟାଲ ବାଲଟ ଓ ସାଢେ ୮ଟାରୁ ଇଭିଏମ୍ ଭୋଟ୍ ଗଣତି ହୋଇଥିଲା। ପ୍ରତି ରାଉଣ୍ଡ ଗଣତି ପରେ ଏଜେଣ୍ଟଙ୍କ ଉପସ୍ଥିତିରେ ଡାକବାଜି ଯନ୍ତ୍ର ସାହାଯ୍ୟରେ ଘୋଷଣା କରାଯାଇଥିଲା।
ପ୍ରାରମ୍ଭରୁ ବିଜେଡି ପ୍ରାର୍ଥତ୍ନୀ ଅଳକା ମହାନ୍ତି ପ୍ରତିଦ୍ୱନ୍ଦ୍ୱୀଙ୍କ ନିକଟରୁ ସବୁ ରାଉଣ୍ଡରେ ଆଗୁଆ ରହୁଥିଲେ। ଶେଷ ରାଉଣ୍ଡ ଫଳାଫଳ ଘୋଷଣା ପରେ ବାହାରେ ଅପେକ୍ଷା କରିଥିବା ବିଜେଡି ନେତୃବୃନ୍ଦ ଓ ସମର୍ଥକ ବାଣ ଫୁଟାଇ ବିଜୟ ଉତ୍ସବ ପାଳନ କରିଥିଲେ। ଏଥିରେ ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସ, ଜିଲା ପର୍ଯ୍ୟବେକ୍ଷକ ତଥା କଟକ ମେୟର ସୁବାସ ସିଂ, ସହପର୍ଯ୍ୟବେକ୍ଷକ ବିଷ୍ଣୁ ପ୍ରସାଦ କେଡିଆ, ବିଜୟୀ ପ୍ରାର୍ଥିନୀ ଅଳକା ମହାନ୍ତି, ମହିଳା ପ୍ରଚାର କମିଟି ସଂଯୋଜିକା ଦୀପାଳି ଦାସ ପ୍ରମୁଖ ସାମିଲ ହୋଇଥିଲେ। ୬୬ ହଜାରରୁ ଊର୍ଦ୍ଧ୍ୱ ଭୋଟ ବ୍ୟବଧାନରେ ବିଜୟୀ ହେବା ପରେ ଅଳକା ଏହାର ଶ୍ରେୟ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ଦଳୀୟ ନେତୃବୃନ୍ଦ ଓ ବ୍ରଜରାଜନଗରବାସୀଙ୍କୁ ପ୍ରଦାନ କରିଛନ୍ତି। ବିଜେଡି ପ୍ରାର୍ଥିନୀ ମହାନ୍ତି ବିଜୟୀ ହୋଇଥିବା ନେଇ ବିଧିବଦ୍ଧ ଭାବେ ଘୋଷଣା କରାଯାଇ ଭୋଟ ଗଣତି କେନ୍ଦ୍ରରେ ରିଟର୍ନିଂ ଅଫିସର ତଥା ଉପଜିଲାପାଳ ଦୟାମୟ ପାଢ଼ୀ ବିଜୟ ପ୍ରମାଣପତ୍ର ପ୍ରଦାନ କରିଥିଲେ। ଏହି ସମୟରେ ଅତିରିକ୍ତ ଜିଲାପାଳ ପ୍ରବୀର ନାୟକ, ପିଡି ଡିଆର୍ଡିଏ ତପିରାମ ମାଝି, ଆଲୋମଣି ସେଠୀ, ନିବେଦିତା ପ୍ରଧାନ, ପିଣ୍ଟୁ ପାଢୀ ପ୍ରମୁଖ ଉପସ୍ଥିତ ଥିଲେ। ଭୋଟ ଗଣତି କେନ୍ଦ୍ରରେ ଜିଲା ନିର୍ବାଚନ ଅଧିକାରୀ ତଥା ଜିଲାପାଳ ସରୋଜ କୁମାର ସାମଲ,ଏସ୍ପି ରାହୁଲ ଜୈନ ପ୍ରମୁଖ ଉପସ୍ଥିତ ରହି ତଦାରଖ କରୁଥିଲେ। ଉପନିର୍ବାଚନରେ ସମୁଦାୟ ୧୧ ପ୍ରାର୍ଥୀ ପ୍ରତିଦ୍ୱନ୍ଦ୍ୱିତା କରିଥିବାବେଳେ ବିଜେଡିର ଅଳକା ମହାନ୍ତି ମୋଟ ୯୩,୯୫୩ ଭୋଟ, କଂଗ୍ରେସର କିଶୋର ଚନ୍ଦ୍ର ପଟେଲ ୨୭,୮୩୧, ଭାଜପାର ରାଧାରାଣୀ ପଣ୍ଡା ୨୨,୬୩୦, ସିପିଆଇର ରମେଶ କୁମାର ତ୍ରିପାଠୀ ୩,୧୦୫, ହିନ୍ଦୁସ୍ଥାନ ନିର୍ମାଣ ଦଳର ବିଜୟ କୁମାର ଜଲାନ ୨୮୪, ସ୍ବାଧୀନ ପ୍ରାର୍ଥୀ ଆଦିତ୍ୟ ପ୍ରଧାନ ୧,୮୮୪, ସ୍ବାଧୀନ ପ୍ରାର୍ଥୀ ଅବ୍ୟୟ ଭାରତୀ ଶେଖାଓ୍ବତ ରାଜପୁତ ଜୈନ ୩୭୧, ସ୍ବାଧୀନ ପ୍ରାର୍ଥୀ ଦୀନବନ୍ଧୁ ବିଶ୍ୱାଳ ୪୨୫, ମନୋଜ ମେହେର ୪୧୭, ସ୍ବାଧୀନ ପ୍ରାର୍ଥୀ ସୀତାରାମ ବେହେରା ୩୧୨, ସ୍ବାଧୀନ ପ୍ରାର୍ଥୀ ସୁପ୍ରିତ କୁମାର ବେହେରା ୬୭୫ ଭୋଟ୍ ପାଇଥିବାବେଳେ ନୋଟାରେ ୧,୫୧୧ଭୋଟ ପଡିଛି।
