ନୂଆଦିଲ୍ଲୀ,୨୬।୭: ଆଲିବାବା ପ୍ରତିଷ୍ଠାତା ଜ୍ୟାକ୍ ମାଙ୍କୁ ଗୁରୁଗ୍ରାମର ନ୍ୟାୟାଳୟ ସମନ ଜାରି କରିଛନ୍ତି। ଭାରତରେ କମ୍ପାନୀର ସହାୟକ ସଂସ୍ଥା ୟୁସି ନ୍ୟୁଜର ଜଣେ କର୍ମଚାରୀଙ୍କ ଅଭିଯୋଗ ଆଧାରରେ କୋର୍ଟ ଏଭଳି ସମନ ଜାରି କରିଛନ୍ତି। ସେହି କର୍ମଚାରୀଙ୍କୁ କମ୍ପାନୀ ବେଆଇନ ଭାବେ ଚାକିରିରୁ କାଢି ଦେଇଥିବା ଅଭିଯୋଗ ଆସିଛି। ୟୁସି ନ୍ୟୁଜ ଆପ୍ରେ ଏକ ମିଥ୍ୟା ନ୍ୟୁଜ ପ୍ରସାରଣ କରାଯାଇଥିଲା। ଏହାର ବିରୋଧ କରିବାରୁ ସେହି କର୍ମଚାରୀଙ୍କୁ ଚାକିରିରୁ ବିଦା କରି ଦିଆଗଲା ବୋଲି ସେ ଅଭିଯୋଗ କରିବା ସହ ନ୍ୟାୟାଳୟର ଦ୍ୱାରସ୍ଥ ହୋଇଥିଲେ। ୨୦ ଜୁଲାଇରେ ଗୁରୁଗ୍ରାମ କୋର୍ଟଙ୍କ ଫାଇଲିଂ ମୁତାବକ ୟୁସି ଓ୍ବେବର ଜଣେ ପୂର୍ବତନ କର୍ମଚାରୀ ପୁଷ୍ପେନ୍ଦ୍ର ସିଂ ପରମାର ଅଭିଯୋଗ କରିଛନ୍ତି ଯେ, ଚାଇନା ସରକାରଙ୍କ ସେନସର ନିୟମକୁ ୟୁସି ନ୍ୟୁଜ ଏବଂ ୟୁସି ବ୍ରାଉଜର ପାଳନ କରିଛି। ଏଥିରେ ଫେକ୍ ନ୍ୟୁଜ ପ୍ରସାରଣ ଦ୍ୱାରା ଭାରତରେ ସାମାଜିକ ଏବଂ ରାଜନୈତିକ ଅସ୍ଥିରତା ସୃଷ୍ଟି ଭଳି କାମ କରାଯାଇଛି। ମାମଲାରେ ସିଭିଲ ଜଜ୍ ସୋନିଆ ସେଓକାଣ୍ଡ ଜ୍ୟାକ୍ ମାଙ୍କ ସମେତ ୧୨ରୁ ଊର୍ଦ୍ଧ୍ୱ ଲୋକଙ୍କ ବିରୋଧରେ ସମନ ଜାରି କରିଛନ୍ତି। ୨୯ ଜୁଲାଇ ସୁଦ୍ଧା କୋର୍ଟରେ ହାଜର ହେବା ଲାଗି କୁହାଯାଇଛି। ନିଜେ ହାଜର ନ ହୋଇପାରିଲେ ନିଜ ଓକିଲଙ୍କ ଦ୍ୱାରା ପ୍ରତିନିଧିତ୍ୱ କରିବାକୁ ନିର୍ଦ୍ଦେଶ ରହିଛି। ୩୦ ଦିନ ମଧ୍ୟରେ ଏହାର ଲିଖିତ ଉତ୍ତର ରଖିବା ଲାଗି ନିର୍ଦ୍ଦେଶରେ କୁହାଯାଇଛି। କିଛି ସପ୍ତାହ ପୂର୍ବରୁ ଭାରତ ଚାଇନାର ୫୯ ଆପ୍ଲିକେଶନକୁ ବ୍ୟାନ କରି ଦେଇଛି। ଏହା ମଧ୍ୟରେ ଆଲିବାବାର ୟୁସି ନ୍ୟୁଜ ଏବଂ ୟୁସି ବ୍ରାଉଜର ସାମିଲ ରହିଛି। ସୀମାରେ ଚାଇନା ସେନା ଆକ୍ରମଣରେ ୨୦ ଭାରତୀୟ ଯବାନ ଶହୀଦ ହେବା ପରେ ସରକାର ଏହି ଆପ୍ଗୁଡିକୁ ବ୍ୟାନ କରିଦେଇଛନ୍ତି। କୌଣସି ବିଦେଶୀ ସରକାର ଲାଗି ଏହି କମ୍ପାନୀଗୁଡିକ କାମ କରିଛନ୍ତି କି ନାହିଁ ସେ ନେଇ ଭାରତ ସରକାର ଲିଖିତ ଜବାବ ମାଗିଥିଲେ।
