ଲଣ୍ଡନ,୨।୭: ଘରୋଇ ପରିବେଶରେ ନ୍ୟୁଜିଲାଣ୍ଡ ଠାରୁ ୦-୧ରେ ଟେଷ୍ଟ ସିରିଜ୍ ହାରିବା ପରେ ଇଂଲଣ୍ଡ ଦଳକୁ ସମାଲୋଚନା କରିଥିଲେ ମାଇକେଲ ଭନ ଓ ନାସିର ହୁସେନଙ୍କ ଭଳି ପୂର୍ବତନ ଅଧିନାୟକ। ଟପ୍ ଅର୍ଡର ବ୍ୟାଟ୍ସମ୍ୟାନଙ୍କ ଅଭାବ ଓ ଜୋଫ୍ରା ଆର୍ଚ୍ଚରଙ୍କ ଅନୁପସ୍ଥିତି ଯୋଗୁ ଭାରତ ବିପକ୍ଷ ସିରିଜ୍କୁ ଜିତିବା ଇଂଲଣ୍ଡ ପକ୍ଷେ କଷ୍ଟକର ହୋଇପଡ଼ିବ ବୋଲି ସେମାନେ କହିଥିଲେ। କିନ୍ତୁ ଆଉ ଜଣେ ପୂର୍ବତନ ଅଧିନାୟକ ଆଲିଷ୍ଟର କୁକ୍ଙ୍କ ଅନୁଯାୟୀ, ଭାରତୀୟ ଦଳର ବଡ଼ ଦୁର୍ବଳତା ରହିଛି। ଘରୋଇ ଇଂଲଣ୍ଡ ଦଳ ଯାହାର ଫାଇଦା ଉଠାଇ ସିରିଜ୍କୁ ସହଜରେ ଜିତି ପାରିବ।
“ଭାରତ ଅନ୍ୟତମ ଟେଷ୍ଟ ଦଳ। କିନ୍ତୁ ବଲ ଯଦି ମୁଭ କରେ, ତେବେ ଇଂଲଣ୍ଡରେ ସେମାନଙ୍କ ଜିତିବାର ସମ୍ଭାବନା ଖୁବ୍ କମ୍। ଅଗଷ୍ଟ ମାସରେ ଯେଉଁଭଳି ପିଚ୍ ବ୍ୟବହାର କରେ, ତାହା ଇଂଲଣ୍ଡ ବୋଲରଙ୍କୁ ଫାଇଦା ଦେବ। ଭାରତ ପାଖରେ ବହୁ ବିଶ୍ୱ ସ୍ତରୀୟ ବ୍ୟାଟ୍ସମ୍ୟାନ ରହିଛନ୍ତି। ମାତ୍ର ମୁଭ କରୁଥିବା ବଲକୁ ଖେଳିବାରେ ସେମାନଙ୍କ ଦୁର୍ବଳତା ରହିଛି। ଯଦି ସେଭଳି ଘଟେ, ତେବେ ଇଂଲଣ୍ଡ ଦଳର ଜିତିବାର ବିଶେଷ ସମ୍ଭାବନା ରହିବ” ବୋଲି କୁକ୍ ଏକ ସାକ୍ଷାତ୍କାରରେ କହିଛନ୍ତି।
ଉଲ୍ଲେଖଯୋଗ୍ୟ, ଅନ୍ତିମ ଥର ୨୦୦୭ରେ ଇଂଲଣ୍ଡରେ ଟେଷ୍ଟ ସିରିଜ୍ ଜିତିଥିଲା ଭାରତ। ତା’ ପରଠୁ ଟିମ୍ ଇଣ୍ଡିଆ ଇଂଲଣ୍ଡ ବିପକ୍ଷ ଟେଷ୍ଟ ସିରିଜ୍ରେ ଶୋଚନୀୟ ପ୍ରଦର୍ଶନ କରିଆସିଛି। ୨୦୧୧ରେ ୦-୪ ବ୍ୟବଧାନରେ ପରାସ୍ତ ହୋଇଥିବାବେଳେ ୨୦୧୪ରେ ୧-୩ ଓ ୨୦୧୮ରେ ୧-୪ ବ୍ୟବଧାନରେ ପରାଜୟ ବରଣ କରିଥିଲା ଭାରତ।
