ମୁମ୍ବାଇ: ସୁପରଷ୍ଟାର ଅଜୟ ଦେବଗନ ଏବଂ ଅଭିନେତ୍ରୀ କାଜଲ ବି’ ଟାଉନ୍ର ସଫଳ ଦମ୍ପତି ଭାବରେ ଜଣାଶୁଣା। ଏମାନଙ୍କ ବିବାହ ସମୟରେ ଅନେକ ଭାବିଥିଲେ ଯେ, ଏମାନଙ୍କ ବିବାହ ଅଧିକ ଦିନ ତିଷ୍ଠିବ ନାହିଁ। କିନ୍ତୁ ଅଜୟ-କାଜଲ ୨୩ ବର୍ଷ ଧରି ଏକାଠି ରହିଆସିଲେଣି। ଆଜି ଅର୍ଥାତ୍ ଫେବୃୟାରୀ ୨୪ରେ ହେଉଛି ଏହି ଦମ୍ପତିଙ୍କ ବିବାହ ବାର୍ଷିକୀ।
୧୯୯୯ ମସିହା ଆଜିର ଦିନରେ ଏହି ଯୋଡ଼ି ବିବାହ ବନ୍ଧନରେ ବାନ୍ଧି ହୋଇଥିଲେ। ଆଜିର ଏହି ଖାସ୍ ଦିନରେ ଜାଣନ୍ତୁ କେମିତି ପ୍ରେମରେ ପଡ଼ିଥିଲେ ଏହି ଯୋଡ଼ି।
ଏକ ସାକ୍ଷାତକାରରେ କାଜଲ କହିଥିଲେ, ଅଜୟ ଦେବଗନଙ୍କ ସହ ଫିଲ୍ମ ‘ହଲ୍ଚଲ୍’ର ଶୁଟିଂ ସେଟ୍ରେ ସାକ୍ଷାତ ହୋଇଥିଲା। ଅଜୟ ବହୁତ ଶାନ୍ତ ଏବଂ ଅନ୍ତରଙ୍ଗ ଥିଲେ। କାଜଲ ଶୁଟିଂସେଟ୍ରେ ହସିବାକୁ ଏବଂ କଥା ହେବାକୁ ପସନ୍ଦ କରୁଥିଲେ କିନ୍ତୁ ଅଜୟଙ୍କର ଏହି ଅଭ୍ୟାସ ନ ଥିଲା। ସେ ବେଶ୍ ଚୁପ୍ଚାପ ରହୁଥିଲେ। ଏପରିକି ଦୁହେଁ ପରସ୍ପରକୁ ଦେଖିବାକୁ ମଧ୍ୟ ପସନ୍ଦ କରୁ ନ ଥିଲେ। କିନ୍ତୁ ଧିରେ ଧିରେ ଉଭୟଙ୍କ ଏହି ଚିନ୍ତାଧାରା ପରସ୍ପର ଆଡ଼କୁ ବଦଳିଗଲା।
କୌତୂହଳର ବିଷୟ ଦୁହେଁ ସେହି ସମୟରେ ନିଜ ନିଜ ଜୀବନରେ ଅନ୍ୟ କାହାକୁ ଡେଟ୍ କରୁଥିଲେ। ଅଜୟଙ୍କଠାରୁ କାଜଲ ତାଙ୍କ ପ୍ରେମ ଜୀବନ ସହ ଜଡ଼ିତ ପରାମର୍ଶ ମଧ୍ୟ ନେଉଥିଲେ। କାଜଲଙ୍କ ବ୍ରେକଅପ୍ ପରେ ଅଜୟ ବନ୍ଧୁ ଭାବରେ ତାଙ୍କର ଯତ୍ନ ନେଇଥିଲେ। ଏହା ପରେ ଦୁହେଁ ପରସ୍ପରକୁ ପସନ୍ଦ କରିବାକୁ ଲାଗିଲେ। ବନ୍ଧୁତାରୁ ପ୍ରେମ ନିବିଡ଼ ହେବାରେ ଲାଗିଲା। ଶେଷରେ ଏହି ପ୍ରେମ ବିବାହରେ ପରିଣତ ହୋଇଥିଲା।
