ୱାଶିଂଟନ,୨୮ ।୧୦: କରୋନା ଭାଇରସ ସଂକ୍ରମଣ ସାରା ବିଶ୍ୱକୁ ଅସ୍ତବ୍ୟସ୍ତ କରି ପକାଇଛି । ଏହାରି ଭିତରେ ଲକ୍ଷ ଲକ୍ଷ ଲୋକଙ୍କ ମୃତ୍ୟୁ ହୋଇଛି ଏହି କରୋନା ମହାମାରୀ ଯୋଗୁ । ଏବେ ଏକ ଅଧ୍ୟୟନରୁ ଜଣାପଡିଛି ଯେ ପ୍ରଦୂଷଣ ଯୋଗୁ ସାରା ବିଶ୍ୱରେ କରୋନା ମୃତ୍ୟୁ ସଂଖ୍ୟା ୧୫ ପ୍ରତିଶତ ବୃଦ୍ଧି ପାଇଛି । କାର୍ଡିଓଭାସ୍କୁଲାର ରିସର୍ଚ୍ଚରେ ମଙ୍ଗଳବାର ପ୍ରକାଶିତ ଏକ ଅଧ୍ୟୟନ ଅନୁଯାୟୀ ସାରା ବିଶ୍ୱରେ ବହୁ ସମୟ ପର୍ଯ୍ୟନ୍ତ ଲୋକେ ବାୟୁ ପ୍ରଦୂଷଣ ମଧ୍ୟରେ ରହିବାରୁ କୋଭିଡ-୧୯ରେ ୧୫ ପ୍ରତିଶତ ଲୋକଙ୍କ ମୃତ୍ୟୁ ହୋଇଛି । ୟୁରୋପରେ ଏହା ପାଖାପାଖି ୧୯ ପ୍ରତିଶତ ବୋଲି କୁହାଯାଇଛି । ଆମେରିକାରେ ଏହା ୧୭ ପ୍ରତିଶତ ଓ ପୂର୍ବ ଏସିଆରେ ଏହା ୨୭ ପ୍ରତିଶତ ବୋଲି ବିଶେଷଜ୍ଞମାନେ କହିଛନ୍ତି । ଉକ୍ତ ଅଧ୍ୟୟନ ଅନୁଯାୟୀ ଚେକୋସ୍ଲୋଭାକିଆରେ ସବୁଠାରୁ ଅଧିକ ୨୯ ପ୍ରତିଶତ ଲୋକଙ୍କର ପ୍ରଦୂଷଣ ଯୋଗୁ କରୋନାରେ ମୃତ୍ୟୁ ହୋଇଛି । ସେହିପରି ଚାଇନାରେ ୨୭ ପତିଶତ, ଜର୍ମାନୀରେ ୨୬, ସ୍ୱିଜରଲ୍ୟାଣ୍ଡରେ ୨୨, ବେଲଜିୟମରେ ୨୧, ନେଦରଲ୍ୟାଣ୍ଡସ୍ରେ ୧୯, ଫ୍ରାନ୍ସରେ ୧୮, ଜର୍ମାନୀରେ ୧୬, ସ୍ୱିଡେନରେ ୧୬, ଇଟାଲୀରେ ୧୫, ବ୍ରିଟେନରେ ୧୪, ବ୍ରାଜିଲରେ ୧୨, ପର୍ତ୍ତୁଗାଲରେ ୧୧ ପ୍ରତିଶତ ଲୋକଙ୍କ ମୃତ୍ୟୁ ହୋଇଛି । ହେଲେ ନ୍ୟୁଜିଲାଣ୍ଡରେ ସବୁଠାରୁ କମ୍ ମାତ୍ର ଏକ ପ୍ରତିଶତ ଲୋକ ପ୍ରଦୂଷଣ କାରଣରୁ କରୋନାରେ ମୃତ୍ୟୁ ହୋଇଥିବା ବିଶେଷଜ୍ଞମାନେ କହିଛନ୍ତି ।
