ନୂଆଦିଲ୍ଲୀ,୧।୪(ଆଇଏଏନ୍ଏସ୍): ସୁପ୍ରିମକୋର୍ଟଙ୍କ ଦ୍ୱାରା ନିଯୁକ୍ତ ୩ ଜଣିଆ ବିଶେଷଜ୍ଞ କମିଟି କେନ୍ଦ୍ରର ବିବାଦୀୟ କୃଷି ଆଇନ ଉପରେ ବୁଧବାର ସର୍ବୋଚ୍ଚ ଅଦାଲତରେ ରିପୋର୍ଟ ଦାଖଲ କରିଛି। କମିଟି ସର୍ବସାଧାରଣ ବିଜ୍ଞପ୍ତି ଜରିଆରେ ବିଭିନ୍ନ ଲୋକଙ୍କ ମତାମତ ଓ ପ୍ରସ୍ତାବ ସଂଗ୍ରହ କରିଥିଲା। ଭାରତୀୟ କିଷାନ ୟୁନିୟନର ରାଷ୍ଟ୍ରୀୟ ଅଧ୍ୟକ୍ଷ ଭୂପିନ୍ଦର ସିଂ ମାନ୍, କୃଷି ଅର୍ଥନୀତିଜ୍ଞ ତଥା ଦକ୍ଷିଣ ଏସିଆ ଓ ଅନ୍ତର୍ଜାତୀୟ ଖାଦ୍ୟ ନୀତି ଗବେଷଣା ଅନୁଷ୍ଠାନର ନିର୍ଦ୍ଦେଶକ ଡ. ପ୍ରମୋଦ କୁମାର ଜୋଷୀ, କୃଷି ଅର୍ଥନୀତିଜ୍ଞ ତଥା କୃଷି ମୂଲ୍ୟ କମିଶନର ପୂର୍ବତନ ଅଧ୍ୟକ୍ଷ ଅଶୋକ ଗୁଲାଟି ଏବଂ ଶେତ୍କରି ସଙ୍ଗଠନର ଅଧ୍ୟକ୍ଷ ଅନିଲ ଘନଓ୍ବତ କମିଟିର ସଦସ୍ୟ ଥିଲେ। ପରେ ମାନ୍ ଉକ୍ତ କମିଟିରୁ ଇସ୍ତଫା ଦେଇଥିଲେ। ସୁପ୍ରିମକୋର୍ଟର ପ୍ରଧାନ ବିଚାରପତି ଏସ୍.ଏ. ବୋବ୍ଡେ ଉକ୍ତ ରିପୋର୍ଟକୁ ଶୁଣାଣି ପାଇଁ ଗ୍ରହଣ କରି ଏହା ଉପରେ ନିଷ୍ପତ୍ତି ନ ନେବା ପର୍ଯ୍ୟନ୍ତ ଏହାକୁ ସର୍ବସାଧାରଣରେ ପ୍ରକାଶ କରାଯାଇପାରିବ ନାହିଁ ବୋଲି ଘନଓ୍ବତ କହିଛନ୍ତି।
ମେ’ରେ ପାର୍ଲାମେଣ୍ଟ ଅଭିଯାନ
କୃଷକ ସଂଗଠନଗୁଡ଼ିକ ଆନ୍ଦୋଳନକୁ ବ୍ୟାପକ କରିବା ପାଇଁ ଆସନ୍ତା ମେ’ ପ୍ରଥମ ଭାଗରେ ପାର୍ଲାମେଣ୍ଟ ଅଭିମୁଖେ ପଦଯାତ୍ରାରେ ବାହାରିବାକୁ ନିଷ୍ପତ୍ତି ନେଇଛନ୍ତି। ଏଥିରେ ଚାଷୀଙ୍କ ସମେତ ଶ୍ରମିକ, ମହିଳା, ଦଳିତ-ଆଦିବାସୀ, ବେରୋଜଗାରୀ ଯୁବକ ଯୁବତୀ ଓ ସମାଜର ସବୁ ବର୍ଗର ଲୋକ ସାମିଲ ହେବେ ବୋଲି ସଂଯୁକ୍ତ କିଷାନ ମୋର୍ଚ୍ଚା (ଏସ୍କେଏମ୍) ପକ୍ଷରୁ ବୁଧବାର ଘୋଷଣା କରାଯାଇଛି। ପଦଯାତ୍ରା ତାରିଖ ଖୁବ୍ଶୀଘ୍ର ଘୋଷଣା କରାଯିବ। ଲୋକମାନେ ନିଜ ନିଜ ଅଞ୍ଚଳରୁ ଗାଡ଼ିରେ ଆସି ଦିଲ୍ଲୀ ସୀମାରେ ପହଞ୍ଚତ୍ବା ପରେ ସେଠାରୁ ପଦଯାତ୍ରାରେ ବାହାରିବେ।
