କେନ୍ଦ୍ରାପଡ଼ା ଅଫିସ,୨୩ା୫: ରାଜ୍ୟ ଓ କେନ୍ଦ୍ର ସରକାର କୃଷି ଓ କୃଷକଙ୍କ ପାଇଁ ବିଭିନ୍ନ ଯୋଜନା ପ୍ରଣୟନ କରିଛନ୍ତି। ଚାଷୀଙ୍କୁ ରିହାତି ଦରରେ ପମ୍ପସେଟ୍, ସ୍ପ୍ରେୟରଠାରୁ ଆରମ୍ଭ କରି ଟ୍ରାକ୍ଟର, ପାୱାରଟିଲର, ହାର୍ଭେଷ୍ଟର ଆଦିରେ ପୂର୍ବରୁ କେନ୍ଦ୍ର ଓ ରାଜ୍ୟ ସରକାର ସବ୍ସିଡି ଯୋଗାଇ ଦେଇଆସୁଛନ୍ତି। ତେବେ ଏହି ରିହାତି ବା ସବ୍ସିଡି ଅର୍ଥ ଚାଷୀଙ୍କ କାମରେ ନ ଆସି ବ୍ୟବସାୟୀ ଆତ୍ମସାତ୍ କରୁଛନ୍ତି। ଏଠାରୁ ସବ୍ସିଡିରେ କିଣା ଯାଇଥିବା ପାୱାରଟିଲର କୋଲକାତା ଯାଉଥିବା ବେଳେ ଟ୍ରାକ୍ଟରଗୁଡିକ କ୍ଷେତ ବଦଳରେ ମାଲ୍ ପରିବହନ ବ୍ୟବସାୟରେ ଲାଗୁଛି ବୋଲି ଅଭିଯୋଗ ହୋଇଛି।
ଏ ସମ୍ପର୍କରେ କୃଷକ ନେତା ଉମେଶ ସିଂ କହିଛନ୍ତି, କେନ୍ଦ୍ରାପଡ଼ା ଜିଲାରେ ଶିଳ୍ପ ଓ କଳକାରଖାନା ନାହିଁ। ଏଠାକାର ଲୋକେ କୃଷି ଅର୍ଥନୀତି ଉପରେ ନିର୍ଭରଶୀଳ। କୃଷିର ଉନ୍ନତି ପାଇଁ ରାଜ୍ୟ ଓ କେନ୍ଦ୍ର ସରକାର କୃଷି ଯନ୍ତ୍ରପାତି କ୍ରୟ ଦରରେ ରିହାତି ଦେଇଛନ୍ତି। ତେବେ ଏହି ସବ୍ସିଡି ଅର୍ଥକୁ ଚାଷୀଙ୍କ ନାମରେ ଆତ୍ମସାତ୍ କରାଯାଉଛି। ନିକଟରେ ବରଗଡ଼ ଜିଲାରେ ୨୮୧ଟି ଧାନରୁଆ ଯନ୍ତ୍ର ବିକ୍ରି କ୍ଷେତ୍ରରେ ଏପରି ଦୁର୍ନୀତି ପଦାକୁ ଆସିଛି। କେନ୍ଦ୍ରାପଡ଼ା ଜିଲାରେ ମଧ୍ୟ ଅନୁରୂପ ଅର୍ଥ ଆତ୍ମସାତ୍ ଚାଲିଥିବାରୁ ଗତ ୫ ବର୍ଷର କୃଷି ଯନ୍ତ୍ରପାତି କିଣାବିକାର ହିସାବ ସମ୍ପର୍କରେ ତଦନ୍ତ ହେଲେ ବହୁ ଅନିୟମିତତା ଧରାପଡିବ। କୃଷକ ନେତା ଗୟାଧର ଧଳ କହିଛନ୍ତି, ଫାର୍ମ ମେକାନାଇଜ ସ୍କିମ୍ରେ କୃଷି ସରଞ୍ଜାମ ଉପରେ ୨୦ରୁ ୮୦ ପ୍ରତିଶତ ରିହାତି ମିଳୁଛି। ତେବେ ଏହି ରିହାତି ଅର୍ଥ ଚାଷୀଙ୍କ ନିକଟରେ ପହଞ୍ଚତ୍ ପାରୁନାହିଁ। କୃଷି ବିଭାଗର କେତେଜଣ ଅଧିକାରୀ ଓ ସପ୍ଲାୟର ମିଳିମିଶି ସବ୍ସିଡି ଅର୍ଥକୁ ଚଳୁ କରୁଛନ୍ତି। ଜଣେ ସମ୍ପର୍କୀୟ ୨୦୨୧ରେ କମ୍ବାଇନ ହାର୍ଭେଷ୍ଟର କିଣିବା ପାଇଁ କୃଷି ବିଭାଗକୁ ଆବେଦନ କରିଥିଲେ। ଏହି ଜିଲା ପାଇଁ ହାର୍ଭେଷ୍ଟର ଆଲଟ୍ମେଣ୍ଟ ପରଦିନ ବିକ୍ରି ସରିଥିବା ବିଭାଗୀୟ ଅଧିକାରୀଙ୍କ ସମେତ ସପ୍ଲାୟର କହିଥିଲେ। ଚାଷୀ ମଦନମୋହନ ସାହୁ କହିଛନ୍ତି, ଚାଷୀଙ୍କୁ ବିଭିନ୍ନ ସରଞ୍ଜାମ ଯୋଗାଇ ଦେବା ପାଇଁ ସହର ଓ ସହର ନିକଟରେ ବିଭିନ୍ନ ସପ୍ଲାୟର ଅଛନ୍ତି। ଏହା ସତ୍ତ୍ୱେ କ୍ଷେତରେ ଜଳସେଚନ ପାଇଁ ପାଣି ପମ୍ପଟିଏ ସପ୍ଲାୟରଙ୍କଠାରୁ କିଣିବା ପାଇଁ କୃଷି ବିଭାଗର ମଞ୍ଜୁରୀ ପରେ ରିହାତି ଦରରେ । ରାଜ୍ୟ ସରକାର ୨୦୦୦ ପମ୍ପ ଯୋଗାଇ ଦେଇଥିବା ବେଳେ ଏଗୁଡିକ ମୂଳ ମୂଲ୍ୟରେ ସପ୍ଲାୟର ବିକ୍ରି କରୁଛନ୍ତି। ୫୦ ପ୍ରତିଶତ ସବ୍ସିଡି କାହା ଖାତାକୁ ଯାଉଛି ବୋଲି ସେ ପ୍ରଶ୍ନ କରିଛନ୍ତି। ସେହିପରି ଅନ୍ୟତମ ଚାଷୀ ଅଶେଷ କୁମାର ଖଟୁଆ କହିଛନ୍ତିି, କେନ୍ଦ୍ରାପଡ଼ା ଜିଲାକୁ ଆସୁଥିବା ପାୱାରଟିଲର କୋଲକାତାକୁ ଚାଲାଣ ହେଉଥିବା ଲକ୍ଷ୍ୟ କରାଯାଉଛି। ଟ୍ରାକ୍ଟର ଏବେ ରାସ୍ତାରେ ବିଭିନ୍ନ ସାମଗ୍ରୀ ପରିବହନରେ ଲାଗୁଛି। ବ୍ୟବସାୟୀମାନେ ଚଞ୍ଚକତା କରି ଚାଷୀଙ୍କ ପାଇଁ ଉଦ୍ଦିଷ୍ଟ ଟ୍ରାକ୍ଟର, ପାୱାରଟିଲର ହାତଉ ଥିବାରୁ ପ୍ରଶାସନିକ ତଦନ୍ତ ହେଲେ ଅନିୟମିତତା ପଦାକୁ ଆସିବ। ଏ ସମ୍ପର୍କରେ ଜିଲା କୃଷି ଅଧିକାରୀ ଶିବପ୍ରସାଦ ମଲ୍ଲିକ କହିଛନ୍ତି,ରିହାତି ଦରରେ କୃଷି ସରଞ୍ଜାମ ବିକ୍ରି ଚାଲିଛି। ଅଧିକାଂଶ ସମୟରେ ଆବଶ୍ୟକ ଯନ୍ତ୍ର ଆସି ପାରି ନ ଥିବାରୁ ଚାଷୀ କିଣି ପାରୁନାହାନ୍ତି। ତେବେ ରିହାତି ଅର୍ଥକୁ ଆତ୍ମସାତ୍ ପରି ଘଟଣା ନଜରକୁ ଆସିନାହିଁ। ଏ ସମ୍ପର୍କରେ ତଦନ୍ତ ହେବ ବୋଲି ସେ ମତ ରଖିଛନ୍ତି।
