ସରଣ୍ଡା, ୩୧।୩(ଡି.ଏନ.ଏ.): ଚଳିତ ଅତାବିରା ଏନ୍ଏସି ନିର୍ବାଚନକୁ ନେଇ ଚା’ ଖଟିରୁ ଆରମ୍ଭ କରି ଦୋକାନ ବଜାର, ରାସ୍ତାଘାଟ ସବୁଠି ଆଲୋଚନା। ଏନ୍ଏସିର ନଗରପାଳ ପଦବୀ ପାଇଁ ଏଥର ପ୍ରତ୍ୟକ୍ଷ ନିର୍ବାଚନ ହେବ। କାହା ମୁଣ୍ଡରେ ଭୋଟର ଢାଳିବେ ସୁନା କଳସ। ଅନୁସୂଚିତ ଜାତି ଓ ଜନଜାତି ବର୍ଗ ପାଇଁ ସଂରକ୍ଷିତ ନଗରପାଳ ଆସନରେ ୩ ପ୍ରମୁଖ ରାଜନୈତିକ ଦଳ ସମେତ ସ୍ବାଧୀନ ପ୍ରାର୍ଥୀଙ୍କୁ ମିଶାଇ ମୋଟ ୪ ଜଣ ପ୍ରାର୍ଥୀ ନିର୍ବାଚନୀ ମଇଦାନରେ ରହିଛନ୍ତି। ବିଜେଡିରୁ ବନମାଳି ବରିହା, ଭାଜପାରୁ ଲକ୍ଷ୍ମୀ ବେହେରା, କଂଗ୍ରେସରୁ ସବିତା ଭୁଏ ଏବଂ ସ୍ବାଧୀନ ଭାବେ ସାମନ୍ତ ଭୁଏ ନିର୍ବାଚନ ଲଢ଼ୁଛନ୍ତି। ସେହିପରି ୧୨ଟି ୱାର୍ଡରେ ନଗରପାଳ ପ୍ରାର୍ଥୀଙ୍କୁ ମିଶାଇ ମୋଟ ୪୩ ଜଣ ପ୍ରାର୍ଥୀ ପ୍ରତିଦ୍ବନ୍ଦ୍ୱିତା କରୁଛନ୍ତି। ଏହି ସମସ୍ତ ପଦବୀ ଲାଗି ଆସନ୍ତା ଏପ୍ରିଲ ୩ରେ ନିର୍ବାଚନ ହେବ ଏବଂ ୧୬ଟି ବୁଥ୍ରେ ୧୩,୫୨୦ ଭୋଟର ମତଦାନ ସାବ୍ୟସ୍ତ କରିବେ। ଏଥିପାଇଁ ପ୍ରାର୍ଥୀମାନେ ପ୍ରଚାରକୁ ମଧ୍ୟ ଜୋରଦାର କରିଛନ୍ତି। ଦଳୀୟ ଗୀତରେ କମ୍ପୁଛି ଅତାବିରା ଏନ୍ଏସି ଅଞ୍ଚଳ। ଭୋଟରଙ୍କୁ ମନାଇବା ପାଇଁ ପ୍ରାର୍ଥୀମାନେ ପ୍ରତିଶ୍ରୁତିର ପାହାଡ଼ ଛିଡା କରୁଛନ୍ତି। ସବୁ ପ୍ରାର୍ଥୀ ୱାର୍ଡ ସମସ୍ୟାର ସମାଧାନ, ମୌଳିକ ସେବା ପ୍ରଦାନ ଓ ଅତାବିରାକୁ ଆହୁରି ସରସ ସୁନ୍ଦର କରିବା ପାଇଁ ବିକାଶର ନାରା ଦେଇ ଭୋଟରଙ୍କ ନିକଟତର ହେଉଛନ୍ତି। ଅନ୍ୟପକ୍ଷେ ସ୍ବାଧୀନ ପ୍ରାର୍ଥୀଙ୍କ ଟକ୍କର ଦଳୀୟ ପ୍ରାର୍ଥୀଙ୍କୁ ଅଡୁଆରେ ପକାଇଛି। ଫଳାଫଳ ଯାହା ହେଉନା କାହିଁକି ଭୋଟ୍ ବିଭାଜନକୁ ନେଇ ଦଳୀୟ କର୍ମକର୍ତ୍ତା ଚିନ୍ତାରେ ପଡିଛନ୍ତି।
କ’ଣ କୁହନ୍ତି ନଗରପାଳ ପ୍ରାର୍ଥୀ…
୯୯ ପ୍ରତିଶତ ଜିତିବୁ ବୋଲି ଆଶା
ଅତାବିରାର ଉନ୍ନତି ଓ ବିକାଶ ପାଇଁ ସବୁ ପ୍ରକାରର ପ୍ରକଳ୍ପ ହାତକୁ ନେଇଛନ୍ତି ବିଧାୟିକା ସ୍ନେହାଙ୍ଗିନୀ ଛୁରିଆ। ଚାଷୀଙ୍କଠାରୁ ଆରମ୍ଭ କରି କ୍ରୀଡ଼ାବିତ୍ ଯାଏ ସମସ୍ତଙ୍କ ବିକାଶକୁ ଧ୍ୟାନ ଦିଆଯାଇଛି। ତେଣୁ ୯୯ ପ୍ରତିଶତ ଜିତିବାର ଆଶା ଓ ଭରସା ଅଛି।
-ବନମାଳି ବରିହା, ବିଜେଡି ପ୍ରାର୍ଥୀ
ସମସ୍ତଙ୍କୁ ସବୁପ୍ରକାର ସୁବିଧା ଦେବି
ଲୋକଙ୍କ ସୁଖ ଦୁଃଖରେ ସାମିଲ ହେବା ପାଇଁ ଶିକ୍ଷକତା ଛାଡି ନିର୍ବାଚନ ମଇଦାନକୁ ଆସିଛି। ରାସ୍ତା, ଘାଟ, ଡ୍ରେନ୍ ସମସ୍ୟା ଏଠାରେ ଉଦ୍ବେଗଜନକ। ଗରିବଙ୍କ କଚ୍ଚା ଘର କେବେ ପକ୍କା ହେବ, ବାର୍ଦ୍ଧକ୍ୟ ହୋଇଥିଲେ ବି ଭତ୍ତା ନ ପାଇ ଲୋକେ ଅନେଇ ବସିଛନ୍ତି। ବିଗତ ୧୦ ବର୍ଷ ଶାସନ କାଳରେ ଏମାନେ କିଛି ବି କାମ କରିନାହାନ୍ତି। ଏନ୍ଏସିର ସମସ୍ତଙ୍କୁ ସମସ୍ତ ପ୍ରକାର ସୁବିଧା ସୁଯୋଗ ଦେବାର ଏଜେଣ୍ଡା ନେଇ ନିର୍ବାଚନ ଲଢୁଛି।-ଲକ୍ଷ୍ମୀ ବେହେରା, ଭାଜପା ପ୍ରାର୍ଥତ୍ନୀ
ଦୁର୍ନୀତିମୁକ୍ତ ଏନ୍ଏସି ଗଠନ ଇଚ୍ଛା
ଲୋକଙ୍କ ସେବା କରିବାକୁ ଏଠାକୁ ଆସିଛି। ଦୁର୍ନୀତିମୁକ୍ତ ଏନ୍ଏସି ଗଠନ କରିବାକୁ ଚାହୁଁଛି। ପାନୀୟଜଳ, ରାସ୍ତାଘାଟ, ଆବାସ ଯୋଜନାରେ ଘରଦ୍ୱାର, ପାଇଖାନା ଆଦି ଅନେକ ସମସ୍ୟାର ସମାଧାନ ଏଜେଣ୍ଡା ନେଇ ଲୋକଙ୍କୁ ଭୋଟ୍ ଭିକ୍ଷା କରୁଛି। ଫଳାଫଳ ନିଶ୍ଚୟ ଆମ ସପକ୍ଷରେ ଯିବ।
-ସବିତା ଭୁଏ, କଂଗ୍ରେସ ପ୍ରାର୍ଥତ୍ନୀ
ସମୂହଙ୍କୁ ନେଇ ବିକାଶ ଚିନ୍ତା
ଅତାବିରା ଏନ୍ଏସି ଦୁର୍ନୀତିରେ ଭରି ରହିଛି। ବିଗତ ଦିନରେ ଏନ୍ଏସିବାସୀ ଠକାମିରେ ପଡିଛନ୍ତି। ଗୋଟିଏ କାମ ପାଇଁ ଅନେକ ଥର ବିଲ୍ କରାଯାଇଛି। ଶୌଚାଳୟ ନାଁରେ ଟଙ୍କା ହରିଲୁଟ ହୋଇଛି। ସର୍ବସାଧାରଣ ସ୍ଥାନରେ ଶୌଚାଳୟ ନ କରି ବିଲ୍ ଉଠା ସରିଛି। ଏସବୁ ଦୁର୍ନୀତିର ଖୋଳତାଡ଼ ସହ ସମୂହଙ୍କୁ ନେଇ ଏ ଅଞ୍ଚଳର ବିକାଶ ଚିନ୍ତା କରିବି ।
-ସାମନ୍ତ ଭୁଏ, ସ୍ବାଧୀନ ପ୍ରାର୍ଥୀ
