ସାଉଥାମ୍ପଟନ, ୯।୭- ଘରୋଇ ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ମଧ୍ୟରେ ଐତିହାସିକ ଟେଷ୍ଟ ସିରିଜ ବୁଧବାରଠାରୁ ସ୍ଥାନୀୟ ରୋଜ୍ ବାଉଲ୍ ଗ୍ରାଉଣ୍ଡରେ ଆରମ୍ଭ ହୋଇଛି। ଏଥିସହ ଦୀର୍ଘ ୧୧୭ ଦିନର ବ୍ୟବଧାନ ପରେ ଅନ୍ତର୍ଜାତୀୟ କ୍ରିକେଟ୍ ପ୍ରତ୍ୟାବର୍ତ୍ତନ କରିଛି। ମହାମାରୀ କରୋନା ଭାଇରସ୍ ଲାଗି ଗତ ମାର୍ଚ୍ଚ ୧୫ରୁ ବିଶ୍ୱରେ ଅନ୍ତର୍ଜାତୀୟ କ୍ରିକେଟ୍ ପ୍ରତିଯୋଗିତା ବନ୍ଦ ରହିଥିଲା। ଏହି ସିରିଜ ଆରମ୍ଭ ପୂର୍ବରୁ ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) ପକ୍ଷରୁ କିଛି କଟକଣା ଜାରି କରାଯାଇଛି। ଯେପରିକି ବଲ୍ରେ ଚମକ ଆଣିବା ପାଇଁ ବୋଲର କି ଅନ୍ୟ କୌଣସି ଖେଳାଳି ଲାଳର ବ୍ୟବହାର କରିପାରିବେ ନାହିଁ। ସେହିଭଳି ନିରପେକ୍ଷ ଅମ୍ପାୟର ରହିବେନି, ପ୍ରତି ଇନିଂସରେ ଅଧିକ ଡିଆର୍ଏସ୍ ଦିଆଯିବ ଏବଂ ଖେଳାଳିମାନେ ପରସ୍ପର ମଧ୍ୟରେ ହାତ ମିଳାଇବାକୁ ବାରଣ କରାଯାଇଛି। ଏହି ସବୁ ନିୟମ ମାନି ଖେଳିବାକୁ ଆଇସିସି ପକ୍ଷରୁ ପରାମର୍ଶ ଦିଆଯାଇଛି। ତେବେ ଏହି ମ୍ୟାଚ୍ରେ ଟସ୍ ଅବସରରେ ଇଂଲଣ୍ଡ ଅଧିନାୟକ ବେନ୍ ଷ୍ଟୋକ୍ସ ହାତ ମିଳାଇବା ପାଇଁ ପ୍ରତିପକ୍ଷ ଜାସନ ହୋଲ୍ଡରଙ୍କୁ ହାତ ବଢ଼ାଇଥିବା ଦେଖିବାକୁ ମିଳିଥିଲା। ଷ୍ଟୋକ୍ସ ଟସ୍ ଜିତିବା ପରେ ଜାଣିଶୁଣି ଚିରାଚରିତ ଭାବରେ ହୋଲ୍ଡରଙ୍କ ସହ ହାତ ମିଳାଇଥିଲେ। ଏହି ଅପ୍ରତ୍ୟାଶିତ ଘଟଣା ପରେ ଉଭୟ ଷ୍ଟୋକ୍ସ ଓ ହୋଲ୍ଡର ଜୋରରେ ହସିବାରେ ଲାଗିଥିଲେ। ବର୍ଷା ଲାଗି ଖେଳ ବାରମ୍ବାର ବନ୍ଦ ରହିଥିଲା। ଶେଷ ଖବର ସୁଦ୍ଧା ଇଂଲଣ୍ଡ ପ୍ରଥମ ଇନିଂସରେ ୪୩ ଓଭରରେ ୫ ଉଇକେଟ୍ ହରାଇ ୧୦୬ ରନ କରିଛି।
