ବାରିପଦା ଅଫିସ,୧୫।୫: ଶିଶୁ ପୁତ୍ରର ମୃତ୍ୟୁ ପରେ ସ୍ତ୍ରୀଙ୍କୁ ଡାହାଣୀ ସନ୍ଦେହରେ ସ୍ବାମୀ ଘରୁ ବାହାର କରିଦେବା ଚର୍ଚ୍ଚାର ବିଷୟ ହୋଇଛି। ମୃତ ଶିଶୁକୁ ଧରି ମା’ ରାସ୍ତା କଡ଼ରେ ବସି ରହିଥିଲେ। ଦୀର୍ଘ ୧୪ଘଣ୍ଟା ପରେ ଗ୍ରାମ ମୁଖିଆଙ୍କ ଉପସ୍ଥିତିରେ ବୈଠକ ବସି ଅନ୍ତିମ ସଂସ୍କାର କରାଯାଇଥିଲା। ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ମୟୂଭରଞ୍ଜ ଜିଲା ଶରତ ଥାନା ଅଧୀନ ଦେବାନବାହାଳୀ ପଞ୍ଚାୟତ ଲାଉଡିହା ଗ୍ରାମରେ। ସୂଚନା ଅନୁଯାୟୀ, ଶୁକ୍ରବାର ରାଇମୁନୀ ତୁବିତ ତାଙ୍କ ୮ବର୍ଷର ପୁଅ ଶ୍ରୀରାମଙ୍କୁ ଧରି ବାପଘର ଗଁା ଦୁଇପଡ଼ା ଲାଦୁସାହିକୁ ଯାଇଥିଲେ। ସେଠାରେ ପୁଅର ପେଟବ୍ୟଥା ହେବାରୁ ବାପ ଘର ଲୋକେ ନିକଟସ୍ଥ ଉଦଳା ଡାକ୍ତରଖାନାକୁ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପରେ ଶବ ବ୍ୟବଚ୍ଛେଦ ନ କରାଇ ସ୍ବର୍ଗରଥ ଯୋଗେ ମୃତଦେହକୁ ଲାଉଡିହା ଗ୍ରାମକୁ ଆଣିଥିଲେ। ପୁଅର ମୃତଦେହ ଦେଖିବା ପରେ ସ୍ବାମୀ କୁଶୁ ତୁବିତ ସ୍ତ୍ରୀଙ୍କୁ ଡାହାଣୀ ଆଖ୍ୟା ଦେଇ ଘରୁ ବାହାର କରିଦେଇଥିଲେ। ମୃତ ଶିଶୁକୁ ଧରି ରାଇମୁନୀ ଦୀର୍ଘ ସମୟ ପର୍ଯ୍ୟନ୍ତ ଅପେକ୍ଷା କରିବା ପରେ ଗ୍ରାମବାସୀଙ୍କ ନିଷ୍ପତ୍ତି କ୍ରମେ ଗାଁ ମଶାଣିରେ ଶେଷକୃତ୍ୟ ହୋଇଥିଲା।
