ଜି.ଉଦୟଗିରି,୭ା୧୦(ଡି.ଏନ୍.ଏ.): ଜି.ଉଦୟଗିରି ସେବା ସଦନରେ ରହୁଥିବା ଜଣେ ସପ୍ତମ ଶ୍ରେଣୀ ନାବାଳିକା ବୁଧବାର ରାତିରେ ଏକ ମୃତ ଶିଶୁପୁତ୍ରକୁ ଜନ୍ମ ଦେଇଥିଲେ। ଏହି ଘଟଣାର ୨୪ ଘଣ୍ଟା ନ ପୂରୁଣୁ ନାବାଳିକା ମା’ଙ୍କ ଜି.ଉଦୟଗିରି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଗୁରୁବାର ରାତିରେ ମୃତ୍ୟୁ ଘଟିଛି। ଏନେଇ ଜି.ଉଦୟଗିରି ପୋଲିସ ଏକ ମାମଲା(ନଂ.୮/୨୨) ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।
ଅନ୍ୟପକ୍ଷେ ଶିଶୁ ସୁରକ୍ଷା ସମିତି ଓ ପ୍ରଶାସନ ଶିଶୁ ମୃତ୍ୟୁ ପରେ ନାବାଳିକାଙ୍କୁ ଜିଲା ହସ୍ପିଟାଲକୁ ନ ଆଣି ଜି.ଉଦୟଗିରି ହସ୍ପିଟାଲରେ ଚିକିତ୍ସାକୁ ନେଇ ବର୍ତ୍ତମାନ ପ୍ରଶ୍ନ ଉଠିଛି। ତେଣୁ ଘଟଣାର ନିରପେକ୍ଷ ତଦନ୍ତ ଦାବି ହୋଇଛି।
ମିଳିଥିବା ସୂଚନା ମୁତାବକ, ବେଲଘର ଥାନା ଅଞ୍ଚଳ ତୁମୁଡିବନ୍ଧ ବ୍ଲକର ଏକ ସରକାରୀ ଆବାସିକ ବିଦ୍ୟାଳୟରେ ନାବାଳିକା ଜଣକ ସପ୍ତମ ଶ୍ରେଣୀରେ ପଢୁଥିଲେ। ଛାତ୍ରୀ ଜଣକ ଗର୍ଭବତୀ ଥି ବା ଜାଣି ବିଦ୍ୟାଳୟ କର୍ତ୍ତୃପକ୍ଷ ବେଲଘର ଥାନାକୁ ଜଣାଇଥିଲେ। ବେଲଘର ପୋଲିସ ତଦନ୍ତ କରି ଜଣେ ନାବାଳକ ଦ୍ୱାରା ବଳାତ୍କାରର ଶିକାର ହୋଇ ଛାତ୍ରୀ ଜଣକ ଗର୍ଭବତୀ ଥିବା ଜଣାପଡିଥିଲା। ଏନେଇ ବେଲଘର ପୋଲିସ ଏକ ମାମଲା(ନଂ.୪୩/୨୨) ରୁଜୁ କରି ଅଭିଯୁକ୍ତ ନାବାଳକଙ୍କୁ ସୁଧାର ଗୃହକୁ ପଠାଇଥିଲା। ଶିଶୁ ସୁରକ୍ଷା ଅଧିକାରୀ ନାବାଳିକାଙ୍କୁ ଜି.ଉଦୟଗିରିର ଏକ ସେବା ସଦନରେ ରଖିଥିଲେ।
ଅନ୍ୟପକ୍ଷେ ନାବାଳିକାଙ୍କ ମୃତ୍ୟୁ ଖବର ପାଇ ସ୍ଥାନୀୟ ତହସିଲଦାର ଓ ବିଡିଓ ହସ୍ପିଟାଲରେ ପହଞ୍ଚି ସ୍ଥିତି ଅନୁଧ୍ୟାନ କରିଥିଲେ। ମାଜିଷ୍ଟ୍ରେଟ ଓ ବେଲଘର ପୋଲିସ ଉପସ୍ଥିତିରେ ମୃତଦେହ ବ୍ୟବଚ୍ଛେଦ କରାଯାଇଛି ବୋଲି ଜି.ଉଦୟଗିରି ଆଇଆଇସି ଅଜିତ କୁମାର ସ୍ବାଇଁ କହିଛନ୍ତି।
