ଥୁଆମୂଳ ରାମପୁର,୭ା୬(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ବାଗଡ଼ିଆଣି ଗ୍ରାମପଞ୍ଚାୟତ ଅନ୍ତର୍ଗତ କମରାଘାଟ ଗ୍ରାମର ମନରେଗା ରାସ୍ତା କାର୍ଯ୍ୟରେ ବ୍ୟାପକ ଅନିୟମିତତା ସମ୍ପର୍କରେ ‘ଧରିତ୍ରୀ’ରେ ଖବର ପ୍ରସାରିତ ହେବା ପରେ ପ୍ରଶାସନ ତତ୍ପରତା ପ୍ରକାଶ କରିଛି। ଭିଜିଲାନ୍ସ କାର୍ଯ୍ୟାନୁଷ୍ଠାନ ଭୟରେ ଅଧାପନ୍ତରିଆ କାମକୁ ଲୁଚାଇବା ପାଇଁ ଏବେ କ୍ଷେତ୍ରସ୍ତରରେ ତରବରିଆ ଭାବେ କାର୍ଯ୍ୟ ଚାଲୁ କରାଯାଇଛି। ତେବେ ସରକାରୀ ନିୟମକୁ ଏଡ଼ାଇ ଅଳ୍ପ ମେଟାଲ ପକାଇ ତା’ ଉପରେ ସିଧାସଳଖ ମୋରମ ଢାଳି ଦିଆଯାଉଛି। ଏହି କାର୍ଯ୍ୟରେ ବେଆଇନ ଭାବେ ଜେସିବି ମେଶିନର ବ୍ୟବହାର କରାଯାଇଥିବା ସ୍ପଷ୍ଟ ଭାବେ ଗାଡ଼ିର ଚକା ଚିହ୍ନରୁ ଜଣାପଡ଼ୁଛି। ଖବର ପ୍ରସାରଣ ପରେ ଏଡିଓ ଚୂଡ଼ାମଣି ରାଉତ କହିଛନ୍ତି, ଏହି କାମରେ କେବଳ ଶ୍ରମିକମାନଙ୍କର ପ୍ରାପ୍ୟ ଯାଇଥିଲା ଏବଂ କାର୍ଯ୍ୟ ଚାଲୁ ରହିଛି। ପୂର୍ବରୁ କିଛି ମାଟି ପଡ଼ିଥିଲା ଏବଂ ମେଟାଲ ପକାଇବା ବାକି ଥିଲା, କାର୍ଯ୍ୟ ସମ୍ପୂର୍ଣ୍ଣ ହୋଇନାହିଁ। ଅପରପକ୍ଷରେ ପଞ୍ଚାୟତ ନିର୍ବାହୀ ଅଧିକାରୀ ହିମାଂଶୁ ଶେଖର ପାଢ଼ୀ କହିଛନ୍ତି, କି ଏନେଇ ମୋ ପାଖରେ ପୂର୍ବରୁ ତଥ୍ୟ ନଥିଲା, କ୍ଷେତ୍ରସ୍ତରରେ ଯାହା କାମ ହୁଏ ତାହା ଏଡିଓ କରନ୍ତି। ଖବର ପ୍ରସାରିତ ହେବା ପରେ ଆମେ ଏ ବିଷୟରେ ଜାଣିଲୁ ଏବଂ ବାକି କାମ ଶୀଘ୍ର ସାରିବାକୁ ନିର୍ଦ୍ଦେଶ ଦେଇଛୁ। ୪୦୦ ମିଟର କାର୍ଯ୍ୟରୁ ପ୍ରାୟ ୨୦୦ ମିଟର କାମ ସରିଲାଣି। କ୍ଷେତ୍ରସ୍ତରୀୟ ସୂଚନା ଅନୁଯାୟୀ, ଶତାଧିକ ଲୋକଙ୍କ ଜବ୍କାର୍ଡରେ ପଇସା ପଠାଯାଉଥିଲେ ସୁଦ୍ଧା ବାସ୍ତବରେ ସେତେ ପରିମାଣର ଲୋକ କାମ କରୁନାହାନ୍ତି। ବିଭିନ୍ନ ପଞ୍ଚାୟତରେ କାମ କରୁନଥିବା ବ୍ୟକ୍ତି, ବୃଦ୍ଧବୃଦ୍ଧା, ସ୍କୁଲ ଛାତ୍ର ଏବଂ ସରକାରୀ କର୍ମଚାରୀଙ୍କ ଆକାଉଣ୍ଟକୁ ଜବ୍ ଡିମାଣ୍ଡ ଦର୍ଶାଇ ମନରେଗା ପଇସା ପଠାଯାଉଛି। ଏହି ଅର୍ଥ ଆସିବା ପରେ ଆକାଉଣ୍ଟଧାରୀଙ୍କୁ ମାତ୍ର ୫୦୦ ଟଙ୍କା ଦିଆଯାଇ ବାକି ସମସ୍ତ ଅର୍ଥ ଆତ୍ମସାତ କରାଯାଉଥିବା ଅଭିଯୋଗ ହେଉଛି। ବିନା ଯାଞ୍ଚରେ ମନରେଗା ବିଭାଗ ଏପିଇଓ ଭକ୍ତ ସେଠୀ କେମିତି ବିଲ ପାସ କରୁଛନ୍ତି, ତାହାକୁ ନେଇ ପ୍ରଶ୍ନ ଉଠିଛି। ଏଥିରୁ ଏପିଇଓ, ଜେଇ, ପିଇଓ, ଜିଆରଏସ, ଏଡିଓ ଏବଂ ଅସାଧୁ ଠିକାଦାରଙ୍କ ମଧ୍ୟରେ ମଧୁଚନ୍ଦ୍ରିକା ଥିବା ସ୍ପଷ୍ଟ ହେଉଛି। ବାଗଡ଼ିଆଣି ସମେତ ଅନ୍ୟାନ୍ୟ ପଞ୍ଚାୟତରେ କେବଳ ମନରେଗା ନୁହେଁ, ବରଂ ଡିଏମ୍ଏଫ୍, ଏସ୍ଏଫ୍ସି, ସିଏଫ୍ସି ଏବଂ ଆଇଟିଡିଏ ପାଣ୍ଠିର ଅନେକ କାର୍ଯ୍ୟରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ ହୋଇଛି। ବିଶେଷ କରି କନିଷ୍ଠ ଯନ୍ତ୍ରୀ ପ୍ରତାପ ସାହୁ, ସତ୍ୟନାରାୟଣ ବେହେରା ଏବଂ ମଳୟ ଶତପଥୀଙ୍କ ଦାରା କରାଯାଇଥିବା ପ୍ରତ୍ୟେକ ପ୍ରକଳ୍ପକୁ ଯଦି ଜିଲା ପ୍ରଶାସନ ତଥା ଭିଜିଲାନ୍ସ ବିଭାଗ ନିରପେକ୍ଷ ତଦନ୍ତ କରେ, ତେବେ ବିନା କାମରେ ଫଲ୍ସ ବିଲ କରି କୋଟି କୋଟି ଟଙ୍କା ହରିଲୁଟ୍ ହୋଇଥିବାର ସମସ୍ତ ସତ୍ୟତା ସାମ୍ନାକୁ ଆସିବ ବୋଲି ଅଞ୍ଚଳର ବୁଦ୍ଧିଜୀବୀ ଓ ଆଇନଜୀବୀ ମହଲରେ ଦାବି ହୋଇଛି।
