ଓ୍ବାଶିଂଟନ୍,୨୫।୨: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏକ ଗୁରୁତ୍ୱପୂର୍ଣ୍ଣ ଦାବି କରିଛନ୍ତି। ଅପରେଶନ ସିନ୍ଦୂରକୁ ନେଇ ଡୋନାଲ୍ଡ ଟ୍ରମ୍ପଙ୍କ ବଡ଼ ବୟାନ ଦେଇ କହିଛନ୍ତି, ଭାରତ ସହ ଯୁଦ୍ଧ ରୋକିବାକୁ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ଶରିଫ ଗୁହାରି କରିଥିଲେ। ଦୁଇ ଦେଶ ମଧ୍ୟରେ ପରମାଣୁ ଯୁଦ୍ଧ ହୋଇଥାଆନ୍ତା, ମୁଁ ରୋକିଲି। ଯୁଦ୍ଧରେ ସାଢ଼େ ୩ କୋଟି ଲୋକଙ୍କ ମୃତ୍ୟୁ ହୋଇଥାଆନ୍ତା କହିଥିଲେ ଶରିଫ। ମୋ ହସ୍ତକ୍ଷେପ ଯୋଗୁ ଏହା ଟଳିଥିଲା। ଟ୍ରମ୍ପ ଆମେରିକା କଂଗ୍ରେସକୁ ସମ୍ବୋଧିତ କରିବା ସମୟରେ ଏହି ବିବୃତ୍ତି ଦେଛନ୍ତି। ସେ ପୁଣି ଥରେ ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧ ରୋକିବାର ଶ୍ରେୟ ନେଇଛନ୍ତି।
ଟ୍ରମ୍ପ ଆହୁରି କହିଛନ୍ତି, ଯଦି ସେ ହସ୍ତକ୍ଷେପ କରି ନ ଥାନ୍ତେ, ତେବେ ପରିସ୍ଥିତି ବହୁତ ଖରାପ ହୋଇଥାନ୍ତା। ସେତେବେଳେ ପରିସ୍ଥିତି ଏକ ପରମାଣୁ ସଂଘର୍ଷ ଆଡକୁ ଗତି କରୁଥିଲା ଏବଂ ତାଙ୍କ ଆଲୋଚନା ୩୫ ନିୟୁତ ଲୋକଙ୍କ ଜୀବନ ରକ୍ଷା କରିଥିଲା।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମେ ୨୦୨୫ ପରଠାରୁ ଅନେକ ଥର କହିଛନ୍ତି, ସେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ଶରିଫଙ୍କ ସହ ଫୋନରେ କଥା ହୋଇ ଉତ୍ତେଜନା ହ୍ରାସ କରିଥିଲେ। ତାଙ୍କ ଯୋଗୁ ହିଁ ଭାରତ ଏବଂ ପାକିସ୍ତାନ ଯୁଦ୍ଧବିରତି ଆରମ୍ଭ କରିଥିଲେ। ଭାରତ ଟ୍ରମ୍ପଙ୍କ ଦାବିକୁ ବାରମ୍ବାର ପ୍ରତ୍ୟାଖ୍ୟାନ କରିଆସିଛି।
ଅପରେଶନ ସିନ୍ଦୂର ସମୟରେ ପାକିସ୍ତାନ ଆମେରିକାକୁ ଅନୁରୋଧ କରିଥିଲା। ପ୍ରଥମ ଥର ପାଇଁ ଆମେରିକା ସ୍ବୀକାର କରିଛି ଯେ, ଭାରତର କାର୍ଯ୍ୟକୁ ଭୟ କରି ପାକିସ୍ତାନ ପ୍ରଥମେ ଆମେରିକୀୟ ସାହାଯ୍ୟ ଲୋଡ଼ିଥିଲା। ଅପରେଶନ ସିନ୍ଦୂର ସମୟରେ, ଭାରତ ଅନେକ ପାକିସ୍ତାନୀ ସାମରିକ ଘାଟି ଉପରେ ଦ୍ରୁତ ଆକ୍ରମଣ କରିଥିଲା। ଭାରତୀୟ ସେନା କରାଚୀ ଏବଂ ଅନ୍ୟାନ୍ୟ ପାକିସ୍ତାନୀ ଲକ୍ଷ୍ୟସ୍ଥଳରେ ଡ୍ରୋନ ମାଡ଼ କରିଥିଲା, ଯାହା ଫଳରେ ବହୁତ କ୍ଷତି ହୋଇଥିଲା। ଟ୍ରମ୍ପ ଦାବି କରିଛନ୍ତି ଯେ, ପାକିସ୍ତାନ ଭାରତର କାର୍ଯ୍ୟ ଭୟରେ ଆମେରିକାକୁ ଅନୁରୋଧ କରିଥିଲା।
ତାଙ୍କ ଭାଷଣ ସମୟରେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଥିଲେ, ଗତ ଗ୍ରୀଷ୍ମ ଋତୁରେ ଭାରତ ଏବଂ ପାକିସ୍ତାନ ମଧ୍ୟରେ ଯୁଦ୍ଧ ସମୟରେ, ସେ ଉଭୟ ଦେଶ ଉପରେ ୨୦୦% ଶୁଳ୍କ ଲଗାଇବାକୁ ଧମକ ଦେଇଥିଲେ। ଯଦି ସେମାନେ ଯୁଦ୍ଧ ବନ୍ଦ ନ କରନ୍ତି, ତେବେ ସେମାନଙ୍କୁ ଶୁଳ୍କ ଦେବାକୁ ପଡ଼ିବ। ତାଙ୍କର ଧମକ ଦୁଇଟି ପରମାଣୁ-ସଶସ୍ତ୍ର ପଡ଼ୋଶୀ ଦେଶ ମଧ୍ୟରେ ଯୁଦ୍ଧକୁ ରୋକିଥିଲା।
Dharitri – Odisha’s No.1 Odia Daily
