ନୂଆଦିଲ୍ଲୀ,୧୦।୧୨: ୨୦୧୯ ନଭେମ୍ବର ୯ରେ ରାମ ଜନ୍ମଭୂମି-ବାବ୍ରୀ ମସ୍ଜିଦ୍ ମାମଲାରେ ଐତିହାସିକ ରାୟ ପ୍ରଦାନ ପରେ ତତ୍କାଳୀନ ପ୍ରଧାନ ବିଚାରପତି (ସିଜେଆଇ) ରଞ୍ଜନ ଗୋଗୋଇ ଖଣ୍ଡପୀଠରେ ଥିବା ତାଙ୍କ ସହକର୍ମୀ ବିଚାରପତିମାନଙ୍କୁ ଡିନର ପାଇଁ ହୋଟେଲ ତାଜ୍ ମାନସିଂକୁ ନେଇଥିଲେ। ଏବଂ ସବୁଠୁ ଭଲ ମଦ ଅର୍ଡର କରିଥିଲେ ବୋଲି ସେ କହିଛନ୍ତି। ଏବେ ରାଜ୍ୟ ସଭା ସଦସ୍ୟ ଥିବା ଜଷ୍ଟିସ୍ ଗୋଗୋଇ ତାଙ୍କ ଆତ୍ମଜୀବନୀ ‘ଜଷ୍ଟିସ୍ ଫର୍ ଦି ଜଜ୍’ରେ ନିଜ କ୍ୟାରିୟରର ଅନେକ ପ୍ରମୁଖ ଘଟଣାର ଅବତାରଣା କରିଛନ୍ତି। ଏଥିରେ ୨୦୧୮ରେ ସୁପ୍ରିମକୋର୍ଟର ୪ ବରିଷ୍ଠ ବିଚାରପତିଙ୍କ ଖବରଦାତା ସମ୍ମିଳନୀ, ଗୋଗୋଇଙ୍କ ବିରୋଧରେ ଯୌନ ନିର୍ଯାତନା ଅଭିଯୋଗ ଓ ତାଙ୍କ କାର୍ଯ୍ୟକାଳ ସମୟରେ ସୁପ୍ରିମକୋର୍ଟ କଲେଜିୟମରେ ଏହାର ବିଚାର ଭଳି ପ୍ରସଙ୍ଗ ସ୍ଥାନ ପାଇଛି।
ସିଜେଆଇ ଗୋଗୋଇଙ୍କ ଅଧ୍ୟକ୍ଷତାରେ ୫ ଜଣିଆ ସାମ୍ବିଧାନିକ ଖଣ୍ଡପୀଠ ଅଯୋଧ୍ୟା ରାୟ ପ୍ରଦାନ କରିଥିଲେ। ଖଣ୍ଡପୀଠରେ ଅନ୍ୟମାନଙ୍କ ମଧ୍ୟରେ ଜଷ୍ଟିସ୍ ଏସ୍.ଏ. ବୋବ୍ଡେ, ଡି.ଓ୍ବାଇ. ଚନ୍ଦ୍ରଚୂଡ଼, ଅଶୋକ ଭୂଷଣ ଏବଂ ଏସ୍. ଅବଦୁଲ ନାଜିର ଥିଲେ। ରାୟ ପ୍ରକାଶ ପରେ ସନ୍ଧ୍ୟାରେ ସୁପ୍ରିମକୋର୍ଟ ମହାସଚିବ କୋର୍ଟ ରୁମ୍-୧ ବାହାରେ ଥିବା ଜଜ୍ ଗ୍ୟାଲେରିରେ ଫଟୋ ସେସନ୍ର ଆୟୋଜନ କରିଥିଲେ। ଏହା ପରେ ଗୋଗୋଇ ଖଣ୍ଡପୀଠର ବିଚାରପତିମାନଙ୍କୁ ନେଇ ତାଜ ମାନସିଂ ହୋଟେଲକୁ ଯାଇଥିଲେ। ସେଠାରେ ସେମାନେ ଚାଇନିଜ୍ ଖାଦ୍ୟ ଖାଇବା ସହ ଗୋଟିଏ ବୋତଲ ସବୁଠୁ ଭଲ ମଦକୁ ବାଣ୍ଟି ପିଇଥିଲେ। ସେ ବରିଷ୍ଠ ହୋଇଥିବାରୁ ଠିପି ଖୋଲିଥିଲେ ବୋଲି ଜଷ୍ଟିସ୍ ଗୋଗୋଇ ଲେଖିଛନ୍ତି। ସେହିପରି କଲେଜିୟମ ମଧ୍ୟପ୍ରଦେଶ ହାଇକୋର୍ଟ ମୁଖ୍ୟ ବିଚାରପତି ନିଯୁକ୍ତି ଲାଗି ଜଷ୍ଟିସ୍ ଅକିଲ କୁରେଶୀଙ୍କ ନାମ ସୁପାରିସ କରିଥିଲେ ହେଁ ସାମ୍ବିଧାନିକ ସଂସ୍ଥା ମଧ୍ୟରେ ମୁହଁାମୁହିଁକୁ ଏଡ଼ାଇବା ପାଇଁ ଏହାକୁ ପ୍ରତ୍ୟାହାର କରାଯାଇ ତାଙ୍କୁ ତ୍ରିପୁରା ହାଇକୋର୍ଟ ମୁଖ୍ୟ ବିଚାରପତି ନିଯୁକ୍ତ କରାଯାଇଥିଲା ବୋଲି ଗୋଗୋଇ ଲେଖିଛନ୍ତି।
