ରାଉରକେଲା,୧୬।୧୧(ସଙ୍ଗୀତା ଜେନା): ୨୦୨୧ ଡିସେମ୍ବର ୨୧ତାରିଖରେ ପ୍ଲାଣ୍ଟସାଇଟ୍ ଥାନା ଅଧୀନ ସେକ୍ଟର-୨୧ ସ’ ମିଲ୍ ଛକରେ ୨ଜଣ ଯୁବତୀଙ୍କୁ ଅଶାଳୀନ ଭାଷାରେ କମେଣ୍ଟମରାକୁ ବିରୋଧ କରିବାରୁ ଜଣେ ଯୁବକଙ୍କୁ ହତ୍ୟା ଘଟଣାରେ ସମ୍ପୃକ୍ତ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରାଯାଇଛି। ଅଭିଯୁକ୍ତଙ୍କୁ ଦ୍ୱିତୀୟ ଶ୍ରେଣୀ ଏଡିଜେ ଗୁରୁବାର ୧୦ ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି।
ସୂଚନାଯୋଗ୍ୟ, ଘଟଣା ଦିନ ସ’ ମିଲ୍ ଛକରେ ୨ ଜଣ ଯୁବତୀ ବସିଥିଲେ। ସେଠାରେ ମହେନ୍ଦ୍ର ଜେନା ନାମକ ଯୁବକ ଆସି ଉଭୟ ଯୁବତୀଙ୍କୁ ଅଶାଳୀନ ଭାଷାରେ ଗାଳିଗୁଲଜ କରିଥିଲେ। ଏହାକୁ ନିକଟରେ ଥିବା ପିଣ୍ଟୁ ଶର୍ମା ନାମ ଯୁବକ ବିରୋଧ କରିବାରୁ ମହେନ୍ଦ୍ର ଉତ୍ତ୍ୟକ୍ତ ହୋଇ ଏକ ଛୁରିରେ ପିଣ୍ଟୁଙ୍କ ଗଳା ଓ ବେକକୁ ଭୂସି ଦେଇଥିଲେ। ଫଳରେ ଘଟଣାସ୍ଥଳରେ ପିଣ୍ଟୁଙ୍କ ମୃତ୍ୟୁ ହୋଇଥିଲା। ଏହି ଘଟଣାରେ ପୋଲିସ ମହେନ୍ଦ୍ରଙ୍କୁ ଗିରଫ କରିଥିଲା। ଘଟଣାର ତଦନ୍ତ ଯାଞ୍ଚ ଅଧିକାରୀ ସନ୍ତୋଷ ଜେନା କରୁଥିଲେ। ଅଦାଲତରେ ୧୨ ଜଣଙ୍କ ସାକ୍ଷ୍ୟ ଆଧାରରେ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରାଯାଇଥିଲା। ସରକାରଙ୍କ ପକ୍ଷରୁ ଆଇନଜୀବୀ କୈଳାସ ପ୍ରଧାନ ମାମଲା ପରିଚାଳନା କରିଥିଲେ।
