ମୁମ୍ବାଇ,୧୪ା୯: ବରେଲିରେ ଅଭିନେତ୍ରୀ ଦିଶା ପଟାନୀଙ୍କ ଘର ଉପରକୁ ବୋମାମାଡ଼ ହୋଇଛି। ତେବେ ୨୪ ଘଣ୍ଟା ଭିତରେ ତାଙ୍କ ଘର ଉପରକୁ ଦ୍ୱିତୀୟଥର ବୋମାମାଡ଼ ହୋଇଛି। ଇତିମଧ୍ୟରେ ଗୁଳିମାଡ଼ କରିଥିବା ସୁଟରଙ୍କ ସ୍କେଚ୍ ସାମ୍ନାକୁ ଆସିଛି। ସୁଟରକୁ ଧରିବା ପାଇଁ ନୋଏଡା ଓ ମିରଟ୍ରେ ଏସ୍ଟିଏଫ୍ ପକ୍ଷରୁ ଚଢ଼ାଉ ଚାଲିଛି।
ଏହି ଘଟଣା ପରେ ଦିଶା ପ୍ରଥମ ଥର ପାଇଁ ସାମ୍ନାକୁ ଆସିଛନ୍ତି। ସେ ନ୍ୟୁୟର୍କରେ ଏକ କାର୍ଯ୍ୟକ୍ରମରେ ଯୋଗ ଦେଇଥିଲେ। ଦିଶା ଏହି କାର୍ଯ୍ୟକ୍ରମର ଭିଡିଓ ସୋସିଆଲ ମିଡିଆରେ ଶେୟାର କରିଛନ୍ତି।
ବରେଲିରେ ଦିଶାଙ୍କ ଘର ବାହାରେ ଦୁଇଜଣ ଦୁର୍ବୃତ୍ତ ବାଇକ୍ରେ ଆସି ଗୁଳିମାଡ଼ କରିଥିଲେ। ଗ୍ୟାଙ୍ଗଷ୍ଟର ଗୋଲ୍ଡୀ ବ୍ରାର ଏବଂ ରୋହିତ ଗୋଦାରା ଏହି ଆକ୍ରମଣର ଦାୟିତ୍ୱ ନେଇଛନ୍ତି। ସେମାନେ କହିଛନ୍ତି ଯେ, ଏହା ସନାତନ ଧର୍ମ ଏବଂ ସନ୍ଥମାନଙ୍କ ଅପମାନର ପ୍ରତିଶୋଧ।
କିଛି ସମୟ ପୂର୍ବରୁ କାହାଣୀକାର ଅନିରୁଦ୍ଧାଚାର୍ଯ୍ୟ ମହିଳାଙ୍କ ଉପରେ ଏକ ମନ୍ତବ୍ୟ ଦେଇଥିଲେ। ଏହା ପରେ ଦିଶାଙ୍କ ଭଉଣୀ ଖୁସ୍ବୁ ପଟାନୀ ତାଙ୍କ ବୟାନକୁ ବିରୋଧ କରିଥିଲେ। ଏହି କାରଣରୁ ଖୁସ୍ବୁଙ୍କ ଘର ବାହାରେ ଆକ୍ରମଣ ହୋଇଥିଲା।
ଦିଶା ନ୍ୟୁୟର୍କରେ ଏକ ପୋଷାକ ବ୍ରାଣ୍ଡ କାର୍ଯ୍ୟକ୍ରମରେ ପହଞ୍ଚିଥିଲେ। ପୋଷାକ ବ୍ରାଣ୍ଡର ନୂଆ କଲେକ୍ସନ ସମ୍ପର୍କରେ ଏଠାରେ ଏକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଭିଡିଓରେ ଦିଶାଙ୍କୁ କଳା ବ୍ୟାକଲେସ୍ ଡ୍ରେସ୍ରେ ଦେଖିବାକୁ ମିଳିଥିଲା। ଦିଶା ଏକ ଡିପ୍ ନେକ୍ କଳା ଡ୍ରେସ ପିନ୍ଧିଥିଲେ। ହାଇ ହିଲ ମଧ୍ୟ ପିନ୍ଧିଥିଲେ। ସେ ରାସ୍ତାରେ ହସି ହସି ପୋଜ ଦେଇଥିଲେ। ଦିଶା ଏହି ଲୁକକୁ ନୋ ମେକଅପ ଲୁକ୍ ସହ ଶେଷ କରିଥିଲେ।
ଏ ତ ଗଲା ଦିଶାଙ୍କ ବ୍ୟକ୍ତିଗତ ଜୀବନ କଥା। ଯଦି ଦିଶାଙ୍କର ଫିଲ୍ମ କାହାଣୀ କହିବା ତେବେ ଶେଷଥର ପାଇଁ ତାଙ୍କୁ କାଙ୍ଗୁଭାରେ ଦେଖିବାକୁ ମିଳିଥିଲା। ଏହା ପୂର୍ବରୁ ସେ ‘କଳ୍କୀ ୨୮୯୮ ଏଡି’ରେ ମଧ୍ୟ ନଜର ଆସିଥିଲେ। ଦିଶାଙ୍କ ହାତରେ ଏବେ ଦୁଇଟି ବଡ଼ ପ୍ରୋଜେକ୍ଟ ଅଛି। ସେ ଫିଲ୍ମ ‘ଓ୍ବେଲକମ ଟୁ ଦି ଜଙ୍ଗଲ’ରେ ନଜର ଆସିବେ।
