ବାଲେଶ୍ୱର ଅଫିସ, ୭ା୭: ଓଡ଼ିଶା ଯାତ୍ରା ଜଗତର ଜଣାଶୁଣା ଅଭିନେତା ଦୈତାରୀ ପଣ୍ଡା ନିଖୋଜ ଥିବା ନେଇ ବାଲେଶ୍ୱର ଜିଲା ଔପଦା ଥାନାରେ ଅଭିଯୋଗ ହୋଇଛି। ପାର୍ବତୀ ଗଣନାଟ୍ୟର ପରିଚାଳନା ଅଧିକାରୀ ହର ବାରିକ ବୁଧବାର ଅନଲାଇନ ଯୋଗେ ଏହି ଅଭିଯୋଗ ଆଣିଛନ୍ତି।
ଅଭିଯୋଗ ଅନୁଯାୟୀ, ପାର୍ବତୀ ଗଣନାଟ୍ୟ ସହ ୨୦୨୨-୨୩ ଯାତ୍ରା ସିଜିନ ପାଇଁ ଅଭିନେତା ଦୈତାରୀ ପଣ୍ଡା ଚୁକ୍ତି କରିଥିଲେ। ଆଉ ଅଗ୍ରୀମ ଆକାରରେ ସେ ନିଜ ପାରିଶ୍ରମିକର ୬୦% ଅର୍ଥାତ୍ ପ୍ରାୟ ୧୫ଲକ୍ଷ ଟଙ୍କା ନେଇସାରିଛନ୍ତି। ଚୁକ୍ତିନାମା ଅନୁସାରେ ସେ ଗତ ଜୁନ ୨୧ତାରିଖରୁ ଆସି ଆଖଡ଼ାରେ ଆଗାମୀ ଯାତ୍ରା ପାଇଁ ପ୍ରସ୍ତୁତି କରିବା କଥା। କିନ୍ତୁ ୧୫ଦିନରୁ ଅଧିକ ସମୟ ବିତିଯାଇଥିଲେ ବି ସେ ଆସୁନାହାନ୍ତି କିମ୍ବା ଫୋନ୍ କଲେ ଉଠାଉନାହାନ୍ତି। ବିଭିନ୍ନ ଯାତ୍ରା କମିଟିଠାରୁ ପାର୍ବତୀ ଗଣନାଟ୍ୟ ପ୍ରାୟ ୫୦ ଲକ୍ଷ ଟଙ୍କା ଅଗ୍ରିମ ନେଇସାରିଥିବାରୁ ଦୈତାରୀଙ୍କୁ ଖୋଜିବାରେ ପୋଲିସ ସାହାଯ୍ୟ କରୁ ବୋଲି ଏତଲାରେ ଦର୍ଶାଯାଇଛି। ଗଣନାଟ୍ୟ ପକ୍ଷରୁ ତାଙ୍କର ବାଲେଶ୍ୱର ଔପଦାସ୍ଥିତ ଘର ଓ ଭୁବନେଶ୍ୱରର ପଟିଆସ୍ଥିତ ଘରେ ବି ଖୋଜାଖୋଜି କରାଯାଇଥିଲେ ବି ସନ୍ଧାନ ମିଳିପାରିନାହିଁ। ଦୈତାରୀ ନ ଆସିଲେ ପାର୍ବତୀ ଗଣନାଟ୍ୟକୁ ଏକ ବଡ଼ ଆର୍ଥତ୍କ କ୍ଷତି ହେବ। ତେଣୁ ବାଧ୍ୟ ହୋଇ ପରିଚାଳନା ଅଧିକାରୀ ବାରିକ ପୋଲିସର ଦ୍ୱାରସ୍ଥ ହୋଇଛନ୍ତି। ଏ ସମ୍ପର୍କରେ ଅଭିନେତା ଦୈତାରୀ ପଣ୍ଡାଙ୍କ ପ୍ରତିକ୍ରିୟା ମିଳିପାରିନାହିଁ।
