ଛତ୍ରପୁର,୭ା୨(ଡି.ଏନ୍.ଏ.): ଗଞ୍ଜାମ ଜିଲାରେ ପ୍ରତିବର୍ଷ ସଡକ ଦୁର୍ଘଟଣାଜନିତ ମୃତ୍ୟୁସଂଖ୍ୟା ବୃଦ୍ଧି ପାଇବାରେ ଲାଗିଛି । କେଉଁଠି ଜାତୀୟ ରାଜପଥ ତ ଆଉ କେଉଁଠି ରାଜ୍ୟ ରାଜପଥରେ ରାସ୍ତା ଠିକ୍ ନ ଥିବା, ସାଇନ ବୋର୍ଡ ନ ଥିବା ଏବଂ ବ୍ଲାକ ସ୍ପଟ୍ ଠାରେ ସୁଧାର ଅଣାଯାଉ ନ ଥିବାରୁ ଏଭଳି ସ୍ଥିତ ଦେଖିବାକୁ ମିଳୁଛି ।ବାରମ୍ବାର ଗଞ୍ଜାମ ଜିଲା ସଡକ ସୁରକ୍ଷା କମିଟି ବୈଠକରେ ଏ ସମ୍ପର୍କରେ ଆଲୋଚନା ହେଉଥିବାବେଳେ କୌଣସି ପଦକ୍ଷେପ ନିଆଯାଉନି।
ଜିଲାରେ ୨୦୨୧ ତୁଳନାରେ ୨୦୨୨ରେ ଉଭୟ ସଡକ ଦୁର୍ଘଟଣା ଓ ଏଥିଜନିତ ମୃତ୍ୟୁସଂଖ୍ୟା ବଢିଥିବା ରାଜ୍ୟ ସଡକ ଓ ପରିବହନ ବିଭାଗର ରିପୋର୍ଟରେ ପ୍ରକାଶ ପାଇଛି। ଏହାକୁ ଗୁରୁତ୍ୱର ସହ ନେଇ କିଭଳି ଦୁର୍ଘଟଣା ଓ ଏଥିଜନିତ ମୃତ୍ୟୁ ସଂଖ୍ୟା କମିବ ସେ ନେଇ ଆକ୍ସନ ପ୍ଲାନ୍ ପ୍ରସ୍ତୁତ କରିବାକୁ ବିଭାଗର ପ୍ରିନ୍ସପାଲ ସେକ୍ରେଟାରୀ ଉଷା ପାଢୀଙ୍କ ପକ୍ଷରୁ ଗଞ୍ଜାମ ଜିଲାପାଳ, ଏସ୍ପି ଓ ଆରଟିଓଙ୍କୁ ଚିଠି ଆସିଛି ।
ଜିଲାରେ ୨୦୨୧ ତୁଳନାରେ ୨୦୨୨ରେ ୨୬୬ଟି ଅଧିକ ଦୁର୍ଘଟଣା (୪୦.୩୦ ପ୍ରତିଶତ) ବୃଦ୍ଧି ପାଇଛି। ଏଥିସହ ୪୩ଟି ଅଧିକ ଦୁର୍ଘଟଣାଜନିତ ମୃତ୍ୟୁ (୧୨.୯୧ ପ୍ରତିଶତ) ଘଟିଥିବା ରେକର୍ଡ ହୋଇଛି। ମିଳିଥିବା ସୂଚନା ଅନୁସାରେ, ୨୦୨୧ରେ ୬୬୦ଟି ଦୁର୍ଘଟଣା ଘଟିଥିବା ବେଳେ ଏଥିରେ ୩୩୩ ଜଣଙ୍କ ଜୀବନ ଯାଇଥିଲା। ୫୭୯ ଜଣ ଗୁରୁତର ଆହତ ହୋଇଥିଲେ। ସେହିପରି ୨୦୨୨ରେ ୯୨୬ଟି ଦୁର୍ଘଟଣା ଘଟି ୩୭୬ ଜଣଙ୍କ ଜୀବନ ଯାଇଥିବାବେଳେ ୫୮୯ ଜଣ ଗୁରୁତର ଆହତ ହୋଇଥିବା ଜିଲାପାଳ, ଏସ୍ପି ଓ ଆରଟିଓଙ୍କୁ ନିକଟକୁ ତଥ୍ୟ ଆସିଛି । ଏଣିକି ପ୍ରତି ମଙ୍ଗଳବାର ଜିରୋ ଟଲେରାନ୍ସ ଡେ’ ପାଳନ ହେବ। ଉକ୍ତ ଆରଟିଓ ଓ ପୋଲିସ ମିଳିତ ଭାବେ ଦିନ ଓଭର ସ୍ପିଡ୍, ନିଶାସକ୍ତ ଗାଡ଼ି ଚାଳକ, ମୋବାଇଲ ଫୋନ୍ରେ କଥା ହୋଇ ଗାଡି ଚଳାଉଥିବା, ହେଲମେଟ ଓ ସିଟ୍ ବେଲ୍ଟ ପିନ୍ଧି ନ ଥିବା ଏବଂ ଟ୍ରାଫିକ୍ ନିୟମ ଉଲ୍ଲଂଘନକାରୀଙ୍କୁ ଧରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦିଆଯାଇଛି। ଏଥିସହ ଏପ୍ରିଲ୍ ୧ରୁ ୭ ତାରିଖ ପର୍ଯ୍ୟନ୍ତ ଶୂନ ମୃତ୍ୟୁ ସପ୍ତାହ ପାଳନ କରାଯିବ । ଏହା ପୂର୍ବରୁ ମାର୍ଚ୍ଚ ଶେଷ ସୁଦ୍ଧା ପୋଲିସ, ସ୍ବାସ୍ଥ୍ୟ, ରାସ୍ତା ଓ କୋଠାବାଡି, ଆରଡି, ପଞ୍ଚାୟତିରାଜ ବିଭାଗ, ସହରାଞ୍ଚଳ କର୍ତ୍ତୃୁପକ୍ଷ ସେମାନଙ୍କର ନିଜ ନିଜର ସଡକ ଦୁର୍ଘଟଣା ପ୍ରତିରୋଧ ନେଇ ପଦଦେକ୍ଷପ ସମ୍ବନ୍ଧୀୟ ଆକ୍ସନ ପ୍ଲାନ ପ୍ରସ୍ତୁତ କରିବାକୁ ନିର୍ଦ୍ଦେଶନାମାରେ କୁହାଯାଇଛି । ଏହାକୁ ତ୍ୱରାନ୍ବିତ କରିବା ଲାଗି ଗଞ୍ଜାମ ଜିଲା ସଡକ ସୁରକ୍ଷା କମିଟିର ଜରୁରୀ ବୈଠକ ଡାକି ଆଲୋଚନା କରି ନିର୍ଦ୍ଦେଶ ଦେବାକୁ ବିଭାଗୀୟ ପ୍ରିନ୍ସପାଲ ସେକ୍ରେଟାରୀଙ୍କ ପକ୍ଷରୁ ଜିଲାପାଳଙ୍କୁ ନିର୍ଦ୍ଦେଶ ଆସିିଛି। ଏଥିସହ ପ୍ରତି ମାସରେ ଆରଟିଓ ମଧ୍ୟ ଏସମ୍ବନ୍ଧୀୟ ରିପୋର୍ଟ ପରିବହନ କମିଶନରଙ୍କୁ ପଠାଇବାକୁ ନିର୍ଦ୍ଦେଶ ରହିଛି ।
