ଭୁବନେଶ୍ୱର,୧୮ା୧୦(ସତ୍ୟଜିତ୍ ରାଉତ): କୋଷ୍ଟଗାର୍ଡ ଡିଆଇଜି ସତ୍ୟ ରଞ୍ଜନ ଦାସ ଓ ତାଙ୍କ ପତ୍ନୀ ନୟାପଲ୍ଲୀ ଥାନା ଅନ୍ତର୍ଗତ କଳିଙ୍ଗ ଷ୍ଟାଡିଅମ୍ ଟ୍ରାଫିକ୍ ପୋଷ୍ଟ ନିକଟରେ ଗୁରୁବାର ରାତିରେ ଦୁର୍ବ୍ୟବହାରର ଶିକାର ହୋଇଛନ୍ତି। ଦୁଇ ଜଣ ଅସାମାଜିକ ଯୁବକ ରାସ୍ତାରେ ସେମାନଙ୍କ ସହ ଯୁକ୍ତିତର୍କ କରିବା ସହ ଅଶ୍ରାବ୍ୟ ଭାଷାରେ ଗାଲିଗୁଲଜ କରିଛନ୍ତି। ଏନେଇ ସତ୍ୟରଞ୍ଜନ ନୟାପଲ୍ଲୀ ଥାନାରେ ଏତଲା ଦେଇଛନ୍ତି। ଅଭିଯୋଗ ଅନୁଯାୟୀ, କୌଣସି କାମ ସାରି ରାତିରେ ଡିଆଇଜି ସତ୍ୟରଞ୍ଜନ ଓ ତାଙ୍କ ସ୍ତ୍ରୀ କାର୍ରେ ଘରକୁ ଫେରୁଥିଲେ। ରାତି ପ୍ରାୟ ୯ ଟା ୪୦ ବେଳେ କଳିଙ୍ଗ ଷ୍ଟାଡିଅମ୍ ଟ୍ରାଫିକ୍ ଛକ ନିକଟରେ ୟୁ-ଟର୍ନ ନେବାକୁ ଗ୍ରିନ୍ ସିଗ୍ନାଲ ପାଇଁ ସତ୍ୟରଞ୍ଜନ ଅପେକ୍ଷା କରିଥିଲେ। ଏହି ସମୟରେ ଦୁଇ ଜଣ ଯୁବକ (ଓଡି୦୫ବିଏ୪୧୭୦) ନମ୍ବର ବିଶିଷ୍ଟ ଏକ ସ୍କୁଟିକୁ ଡିଆଇଜିଙ୍କ କାର୍ ଆଗରେ ଛିଡା କରିଦେଇଥିଲେ। ଟ୍ରାଫିକ୍ ସିଗନାଲ ପାଇ ସତ୍ୟରଞ୍ଜନ ତାଙ୍କ କାର୍କୁ ୟୁ-ଟର୍ନ କରିବାକୁ ଚାହୁଁଥିବା ବେଳେ ବଚସା ହୋଇଥିଲା। ଦୁଇ ଜଣ ଯୁବକ ତାଙ୍କ ସ୍କୁଟିକୁ ସତ୍ୟରଞ୍ଜନଙ୍କ କାର୍ ଆଗରୁ ହଟାଇ ନ ଥିଲେ। ଡିଆଇଜି ସତ୍ୟରଞ୍ଜନ ସ୍କୁଟି ହଟାଇବାକୁ କହିବାରୁ ଯୁବକଦ୍ୱୟ ଉତ୍କ୍ଷିପ୍ତ ହୋଇପଡ଼ି ଗାଳିଗୁଲଜ କରିଥିଲେ। ଏପରିକି ଉଭୟ ଯୁବକ କାର୍ ଡୋର୍ ନିକଟକୁ ଆସି ଶାରୀରିକ ଆକ୍ରମଣ କରିବାକୁ ଚାହିଁଥିଲେ। ଯୁବକଦ୍ୱୟ ନିଶାସକ୍ତ ଅବସ୍ଥାରେ ଏଭଳି ଆଚରଣ ଦେଖାଇଥିଲେ ବୋଲି ଡିଆଇଜି ତାଙ୍କ ଅଭିଯୋଗ ଫର୍ଦ୍ଦରେ ଦର୍ଶାଇଛନ୍ତି। ତେବେ ଘଟଣା ପରେ ସତ୍ୟରଞ୍ଜନ ପିସିଆର୍କୁ ଖବର ଦେଇଥିଲେ। ଏହାପରେ ପୋଲିସ କମିଶନର ଶୁରେସ ଦେବଦତ୍ତ ସିଂ ନୟାପଲ୍ଲୀ ଥାନାରେ ପହଞ୍ଚି ଡିଆଇଜିଙ୍କ ସହ କଥା ହେବା ସହ ଘଟଣା ବିଷୟରେ ଅନୁଧ୍ୟାନ କରିଛନ୍ତି। ତେବେ ଦୁର୍ବ୍ୟବହାର କରିଥିବା ଦୁଇ ଯୁବକଙ୍କୁ ପୋଲିସ ଉଠାଇ ଆଣି ଥାନାରେ ଅଟକ ରଖିବା ସହ ପଚରାଉଚରା କରୁଥିବା ସୂଚନା ମିଳିଛି।
