ଢେଙ୍କାନାଳ,୩ା୭(ରତନ ନାୟାର): ମୌସୁମୀ ବାୟୁ ପ୍ରବାହରେ ଢେଙ୍କାନାଳ ଜିଲାରେ ଜୁନ୍ରେ ଭଲ ବର୍ଷା ହୋଇଛି। ଚାଷ ପାଇଁ ପାଗ ଅନୁକୂଳ ଥିବାରୁ ଧାନ ବୁଣା ଜୋର୍ ଧରିଛି। ହାତୀ ଉପଦ୍ରବ ରୋକାଯାଇପାରିଲେ ଭଲ ଧାନ ଉତ୍ପାଦନ ହେବ ବୋଲି ଚାଷୀମାନେ ଆଶାବ୍ୟକ୍ତ କରିଛନ୍ତି।
ସାଧାରଣତଃ ଜିଲାରେ ସ୍ବାଭାବିକ ବର୍ଷାର ପରିମାଣ ଜୁନ୍ରେ ୨୨୫.୭ ମିଲିମିଟର। ଗତ ୩୦ ତାରିଖ ସୁଦ୍ଧା ୨୫୨.୬୮ ମିଲିମିଟର ବର୍ଷା ହୋଇଛି। ସଦର ବ୍ଲକରେ ୩୮୫.୬ ମି.ମି., ଗଁଦିଆ ବ୍ଲକରେ ୧୬୩.୨ ମି.ମି., ଓଡ଼ାପଡ଼ା ବ୍ଲକରେ ୧୮୪.୫ ମି.ମି., ହିନ୍ଦୋଳ ବ୍ଲକରେ ୨୮୧.୨ ମି.ମି., କାମାକ୍ଷାନଗର ବ୍ଲକରେ ୨୨୫ ମି.ମି., ଭୁବନ ବ୍ଲକରେ ୧୯୮ ମି.ମି., ପରଜଙ୍ଗ ବ୍ଲକରେ ୨୨୨ ମି.ମି. ଏବଂ କଙ୍କଡ଼ାହାଡ଼ ବ୍ଲକରେ ୩୬୧.୮ ମି.ମି. ବର୍ଷା ରେକର୍ଡ କରାଯାଇଥିବା କୃଷି ବିଭାଗ ସୂତ୍ରରୁ ଜଣାପଡ଼ିଛି। ସଦର ଏବଂ କଙ୍କଡ଼ାହାଡ଼ ବ୍ଲକରେ ଅଧିକ ବର୍ଷିଛି।
ଜିଲାରେ ଚଳିତ ଖରିଫ୍ ଋତୁରେ ମୋଟ ୯୩ ହଜାର ହେକ୍ଟର ଚାଷ ଜମିରେ ଧାନ ଚାଷ କରାଯିବାକୁ ଲକ୍ଷ୍ୟ ଧାର୍ଯ୍ୟ ହୋଇଛି। ଅଦ୍ୟାବଧି ୨୪,୪୭୫ ହେକ୍ଟର ଜମିରେ ଧାନବୁଣା କାର୍ଯ୍ୟ ଚାଲିଛି। ସେହିପରି ଉର୍ବରତା ବୃଦ୍ଧି ଲାଗି କିଛି ଜମିରେ ସବୁଜ ସାର ଧନିଚା ବୁଣା ଶେଷ ହୋଇଛି। ଗତବର୍ଷ ଅପେକ୍ଷା ଚଳିତବର୍ଷ ଜୁନ୍ ସୁଦ୍ଧା ଭଲ ବର୍ଷା ହୋଇଛି। ଆଗକୁ ମଧ୍ୟ ଭଲ ବର୍ଷା ହେବା ସମ୍ଭାବନା ରହିଛି। ଭୟ କେବଳ ହାତୀ ଉପଦ୍ରବକୁ। ବନ ବିଭାଗ ହାତୀଙ୍କୁ ନିୟନ୍ତ୍ରଣ କରିପାରିଲେ ଭଲ ଧାନ ଅମଳ ହେବ ବୋଲି ଚାଷୀମାନେ କହିଛନ୍ତି।
ଏ ସଂକ୍ରାନ୍ତରେ ଜିଲା ମୁଖ୍ୟ କୃଷି ଅଧିକାରୀ ଜ୍ୟୋତିଦୀପ୍ତ ପଟ୍ଟନାୟକ କହିଛନ୍ତି, ଜୁନ୍ରେ ଆବଶ୍ୟକ ପରିମାଣଠାରୁ ଅଧିକ ବର୍ଷା ହୋଇଛି। ଆଗକୁ ମଧ୍ୟ ଭଲ ବର୍ଷା ହେବ ବୋଲି ଆଞ୍ଚଳିକ ପାଣିପାଗ ବିଭାଗ ଅନୁମାନ କରିଛି। ଅଦ୍ୟାବଧି ୨୪,୪୭୫ ହେକ୍ଟର ଜମିରେ ଧାନବୁଣା ଯାଇଛି ଓ ତଳି ପଡ଼ିଛି। ପ୍ରାଥମିକ କୃଷି ସମବାୟ ସଂସ୍ଥା ଦ୍ୱାରା ପ୍ରାମାଣିକ ବିହନ ଓ ସାର ଗଚ୍ଛିତ ରହିଛି। ଚାଷୀଙ୍କୁ ଆଇଡି ମାଧ୍ୟମରେ ରିହାତି ଦରରେ ସାର ଯୋଗାଇ ଦିଆଯାଉଛି।
