ନୂଆଦିଲ୍ଲୀ,୧୮।୯: ଆଫଗାନିସ୍ତାନ ବିପକ୍ଷ ତୃତୀୟ ଟି-୨୦ ମ୍ୟାଚରେ ଭାରତ ୧୨୭ ରନରେ ବିଜୟୀ ହୋଇଥିବା ବେଳେ ଅଭିଷେକ ଶର୍ମାଙ୍କ ଐତିହାସିକ ଶତକ ସବୁଠୁ ଅଧିକ ଚର୍ଚ୍ଚାରେ ରହିଛି। ମାତ୍ର ୩୦ ବଲରେ ଶତକ ହାସଲ କରି ଅଭିଷେକ ଟି-୨୦ ଅନ୍ତର୍ଜାତୀୟ କ୍ରିକେଟରେ ଦ୍ରୁତତମ ଶତକର ରେକର୍ଡ କରିଥିବା ଉଲ୍ଲେଖ ରହିଛି। ଏହି ଇନିଂସ ପାଇଁ ସେ ପ୍ଲେୟର ଅଫ ଦି ମ୍ୟାଚ ମଧ୍ୟ ହୋଇଥିଲେ। ୩୪ ବଲରେ ୧୦୮ ରନର ଧୂଆଁଧାର ଇନିଂସରେ ଅଭିଷେକ ୧୧ଟି ଛକା ଓ ୯ଟି ଚୌକା ମାରିଥିଲେ। ତାଙ୍କ ଷ୍ଟ୍ରାଇକ ରେଟ୍ ୩୧୭.୬୫ ଥିଲା। ୧୬ ବଲରେ ଅର୍ଦ୍ଧଶତକ ପୂରଣ କରିବା ପରେ ମାତ୍ର ୧୪ ବଲରେ ଶତକରେ ପହଞ୍ଚିଥିଲେ। ଶତକ ପୂରଣ କରିବା ପରେ ଅଭିଷେକ ମଇଦାନରେ ବସି ଧ୍ୟାନ ମୁଦ୍ରାରେ ସେଲିବ୍ରେଶନ କରିଥିଲେ। ଏହି ବିଶେଷ ମୁହୂର୍ତ୍ତ ପରେ ତାଙ୍କ ମେଡିଟେଶନ ଅଭ୍ୟାସକୁ ନେଇ ମଧ୍ୟ ଚର୍ଚ୍ଚା ଆରମ୍ଭ ହୋଇଛି।
ଅଭିଷେକଙ୍କ ବାପା ରାଜକୁମାର ଶର୍ମା ତାଙ୍କ ପୁଅର ଦୈନନ୍ଦିନ ଅଭ୍ୟାସ ବିଷୟରେ ଖୁଲାସା କରିଛନ୍ତି। ପିଟିଆଇ ଅନୁସାରେ ସେ କହିଛନ୍ତି ଯେ ଅଭିଷେକ ସକାଳ ପ୍ରାୟ ୪ଟାରେ ଉଠି ମେଡିଟେଶନ କରନ୍ତି। ତାଙ୍କ ମତରେ, ଏହା ଅଭିଷେକଙ୍କ ମନକୁ ଏକାଗ୍ର ରଖିବାରେ ସହାୟକ ହେଉଛି।
ରାଜକୁମାର ଶର୍ମା କହିଛନ୍ତି , ଅଭିଷେକଙ୍କ ଭିତରେ କ୍ରିକେଟ ପାଇଁ ଏତେ ଉତ୍ସାହ ରହିଛି ଯେ ତାଙ୍କୁ ଏବେ ପ୍ରାକ୍ଟିସ ବ୍ୟତୀତ ଅନ୍ୟ କିଛି ଦେଖାଯାଏନି। ପରିବାର ପକ୍ଷରୁ ଘରକୁ ଡାକିଲେ ମଧ୍ୟ ସେ ଅନେକ ସମୟରେ ପ୍ରାକ୍ଟିସ୍ରେ ହିଁ ବ୍ୟସ୍ତ ରହୁଥିଲେ।
ସେ କହିଛନ୍ତି , ଅଭ୍ୟାସ ହିଁ ଅଭିଷେକଙ୍କୁ ଆଗକୁ ନେଉଛି। ଆଗକୁ ମଧ୍ୟ ସେ ଏହିଭଳି ପରିଶ୍ରମ ଜାରି ରଖି ଭାରତ ପାଇଁ ଭଲ ଇନିଂସ ଖେଳନ୍ତୁ ବୋଲି ସେ ଆଶା ପ୍ରକାଶ କରିଛନ୍ତି।
