ଡେରାବିଶ,୧୫ା୮(ବେବର୍ତ୍ତା ଅଜୟ ଦାସ): ସ୍ବାଧୀନତା ଆନ୍ଦୋଳନରେ କେନ୍ଦ୍ରାପଡ଼ା ଜିଲାର ଭୂମିକା ଅବିସ୍ମରଣୀୟ। ସ୍ବାଧୀନତା ସଂଗ୍ରାମରେ ଜିଲାର କୋଣ ଅନୁକୋଣରୁ ସେ ସମୟରେ ବହୁ ଛାତ୍ର ଓ ଯୁବକ ନିଜକୁ ଉତ୍ସର୍ଗକରି ଆନ୍ଦୋଳନର ବାର୍ତ୍ତା ପ୍ରତ୍ୟେକ ପରିବାରରେ ପହଞ୍ଚାଇଥିଲେ। ଜାତିର ପିତା ଗାନ୍ଧିଜୀଙ୍କ ଐତିହାସିକ ପଦଯାତ୍ରା କେନ୍ଦ୍ରାପଡ଼ା ଜିଲା ଅନ୍ତର୍ଗତ ଡେରାବିଶ ବ୍ଲକ କାକତିଆଠାରେ ୧୯୩୪ ମେ ୨୬ରେ ପହଞ୍ଚତ୍ବା ପରେ ଗାନ୍ଧିଜୀଙ୍କୁ ଉଚ୍ଛ୍ବ୍ବସିତ ସମ୍ବର୍ଦ୍ଧନା ଦେବା ସହ ପଦଯାତ୍ରାରେ ବହୁ ସଂଖ୍ୟାରେ ଯୁବକ ସାମିଲ ହୋଇଥିଲେ। ପରେ ବ୍ଲକ ଅଧୀନ ଖମୋଳ ପଞ୍ଚାୟତ ସଲାରୋ ମଠରେ ଗାନ୍ଧିଜୀ ରାତ୍ରିଯାପନ କରିବା ସହ ୨୭ ତାରିଖରେ ସଲାରଠାରେ ଏକ ସାଧାରଣ ସଭାରେ ଉଦ୍ବୋଧନ ଦେଇଥିଲେ। ପରେ ଗାନ୍ଧିଜୀଙ୍କ ପଦଯାତ୍ରା କେନ୍ଦ୍ରାପଡ଼ା ଅଭିମୁଖେ ଯିବା ସହ ଗରାପୁର ଡାକବଙ୍ଗଳାରେ ରାତ୍ରିଯାପନ ପରେ ମେ ୩୦ରେ ଡେରାବିଶ ବ୍ଲକ ଅନ୍ତର୍ଗତ ବାରିମୂଳ ପଡ଼ିଆରେ ବିଶାଳ ଜନସମାବେଶକୁ ଗାନ୍ଧିଜୀ ଉଦ୍ବୋଧନ ଦେଇଥିଲେ। ଏହି ସ୍ମରଣୀୟ ଦିନ ଭାରତ ସ୍ବାଧୀନତା ଆନ୍ଦୋଳନ ଇତିହାସରେ ଏକ ଫର୍ଦ୍ଦ ହୋଇ ରହିଛି। କାରଣ ଜନସମାବେଶରେ ଉପସ୍ଥିତ ଶତାଧିକ ଯୁବକ ଓ ଛାତ୍ର ନିଜକୁ ସ୍ବାଧୀନତା ଆନ୍ଦୋଳନରେ ଝାସ ଦେଇଥିଲେ। ଇତିମଧ୍ୟରେ ଏହି ଘଟଣାକୁ ୮୯ବର୍ଷ ବିତିଯାଇଥିବା ବେଳେ ସମଗ୍ର ଦେଶରେ ୭୬ତମ ସ୍ବାଧୀନତା ଦିବସ ପାଳନ ହେବାକୁ ଯାଉଛି। ସରକାରଙ୍କ ବିଭିନ୍ନ ଉନ୍ନୟନ ଯୋଜନା ଓ ଜିଲା ପ୍ରଶାସନର ଦୃଷ୍ଟି ଆଢ଼ୁଆଳରେ ରହିଥିବା ସ୍ବାଧୀନତା ସଂଗ୍ରାମର ସ୍ମାରକୀ ବାରିମୂଳର ଗାନ୍ଧୀ ସ୍ମୃତିପୀଠଟି ପରିତ୍ୟକ୍ତ ଅବସ୍ଥାରେ ପଡ଼ି ରହିଛି। ସ୍ଥାନୀୟ ଅଞ୍ଚଳବାସୀ, ବୁଦ୍ଧିଜୀବୀ ମହଲରୁ ଜିଲା ପ୍ରଶାସନଠାରୁ ଆରମ୍ଭକରି ମୁଖ୍ୟମନ୍ତ୍ରୀଙ୍କ ଯାଏ ଏହି ପୀଠର ଉନ୍ନତୀକରଣ ପାଇଁ ବାରମ୍ବାର ଦାବି ହୋଇ ଆସୁଛି। ହେଲେ ପୀଠର ଉନ୍ନତୀକରଣ ପାଇଁ ଏଯାଏ କୌଣସି ପ୍ରଶାସନିକ ପଦକ୍ଷେପ ନିଆଯାଇନାହିଁ ବୋଲି ବାରିମୂଳର ପୂର୍ବତନ ସରପଞ୍ଚ ସୁଦ୍ଧଦେବ ବେହେରା କହିଛନ୍ତି। ପ୍ରତ୍ୟେକ ବର୍ଷ ଗାନ୍ଧିଜୀଙ୍କ ସ୍ବନକ୍ଷତ୍ର ଦିବସ ଅକ୍ଟୋବର ୨ ଓ ମହାପ୍ରୟାଣ ଦିବସ ଜାନୁୟାରୀ ୩୦ରେ ଗାନ୍ଧୀ ଫାଉଣ୍ଡେଶନ ଟ୍ରଷ୍ଟ ଓ ବିଭିନ୍ନ ଅନୁଷ୍ଠାନ ପକ୍ଷରୁ ଉତ୍ସବ ପାଳନ କରାଯାଉଛି। ମାତ୍ର ସରକାରୀ ଯୋଜନା ଏଠାରେ ଅପହଞ୍ଚ ହୋଇଥିବାରୁ ପୀଠର ଉନ୍ନତି ସମ୍ଭବ ହୋଇପାରୁନାହିଁ ବୋଲି ସୁଦ୍ଧଦେବ କହିଛନ୍ତି। ଏଠାରେ ଏକ ଶିଶୁ ଉଦ୍ୟାନ କରାଯିବା ସହ ଗାନ୍ଧୀଙ୍କର ପୂର୍ଣ୍ଣାବୟବ ପ୍ରତିମୂର୍ତ୍ତି ସ୍ଥାପନ କରିବାକୁ ଓ ପୀଠର ବିକାଶ ପାଇଁ ଯୁବନେତା ଦିଲୀପ ଦାସ ପ୍ରଶାସନ ନିକଟରେ ଦାବି କରିଛନ୍ତି। ଯେଉଁ ବରଗଛ ମୂଳରେ ଗାନ୍ଧିଜୀ ତାଙ୍କର ଓଜସ୍ବିନୀ ଭାଷଣ ଦେଇଥିଲେ ରକ୍ଷଣାବେକ୍ଷଣ ଅଭାବରୁ ଗୋବରୀ ନଦୀର ବନ୍ୟାରେ ତାହା ଉପୁଡ଼ି ଯାଇଛି। ବ୍ଲକ ପ୍ରଶାସନ ପକ୍ଷରୁ ସ୍ଥାପନ କରାଯାଇଥିବା ଏକ ଆବକ୍ଷ ପ୍ରତିମୂର୍ତ୍ତି ଅତୀତର ସେହିଦିନକୁ କେବଳ ଗୁମୁରୁଛନ୍ତି। ଏ ସମ୍ପର୍କରେ ବିଡିଓ ଦାଶରଥି ଜେନାଙ୍କୁ ପଚାରିବାରୁ ଏହି ପୀଠର ଉନ୍ନତୀକରଣ ପାଇଁ ବାରିମୂଳ ସରପଞ୍ଚଙ୍କ ସହ ଆଲୋଚନା କରାଯାଇଛି। ଖୁବ୍ଶୀଘ୍ର ସ୍ମୃତିପୀଠର ଉନ୍ନତି ପାଇଁ ପଦକ୍ଷେପ ନିଆଯିବ ବୋଲି ସେ କହିଛନ୍ତି।
