ପାଟନା: ଜଣେ ସାଧାରଣ ମନୁଷ୍ୟ ଶରୀରରେ ୩୨ ଦାନ୍ତ ଥିବା କଥା ସମସ୍ତେ ଜାଣନ୍ତି। ହେଲେ ଯଦି ଆପଣଙ୍କୁ ୮୨ ଦାନ୍ତ ଥିବା କୁହାଯାଏ ତେବେ ଆଶ୍ଚର୍ଯ୍ୟ ହେବା ସ୍ବାଭାବିକ। ତେବେ ବିହାରର ପାଟଣାରୁ ଏଭଳି ଏକ ବିରଳ ମାମଲା ସାମ୍ନାକୁ ଆସିଛି। ଏହା ସାଧାରଣଲୋକଙ୍କଠାରୁ ଆରମ୍ଭ କରି ଏହି ବୃତ୍ତିସହ ଜଡ଼ିତ ଡାକ୍ତରମାନଙ୍କୁ ଚକିତ କରିଛି। ବିହାରର ଜଣେ ଯୁବକ ବିରଳ ଟ୍ୟୁମରରେ ପୀଡ଼ିତ ଥିବା ବେଳେ ୩ ଘଣ୍ଟାର ଅପରେଶନ ପରେ ତାଙ୍କ ପାଟିରେ ଥିବା ମାଢ଼ିରୁ ୮୨ଟି ଦାନ୍ତକୁ ବାହାର କରାଯାଇଛି।
୧୭ ବର୍ଷୀୟ ନୀତିଶ ଗତ ୫ ବର୍ଷ ଧରି ମାଢ଼ିରେ ଏକ ଜଟିଳ ଟ୍ୟୁମର ଓଡୋଣ୍ଟୋମ୍ରେ ପୀଡ଼ିତ ଥିଲେ। ତାଙ୍କୁ ନିଜର ଥୋଡ଼ି ଠିକ୍ କରିବା ଲାଗି ଏକ ଅପରେଶନ କରିବାକୁ ପଡ଼ିଥିଲା। ମାଢ଼ି ନିକଟରେ ଥିବା ଦୁଇଟି ଥଳିରୁ ମୋଟ ୮୨ ଦାନ୍ତ ବାହାରିଥିଲା। ଏହା ସାଧାରଣରୁ ୫୦ଟି ଅଧିକ ଥିଲା।
ତେବେ ଦୀର୍ଘ ବର୍ଷ ଧରି ନୀତିଶ ନିଜର ଚିକିତ୍ସା କରାଇପାରୁନଥିଲେ। ସୌଭାଗ୍ୟବଶତଃ ସେ ଇନ୍ଦିରା ଗାନ୍ଧୀ ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସର ଡାକ୍ତରଙ୍କ ସହ ପରାମର୍ଶ କରି ତାଙ୍କର ଅପରେଶନ ନିମନ୍ତେ ତାରିଖ ଧାର୍ଯ୍ୟ କରିଥିଲେ। ସେତେବେଳକୁ ପାଟିର ଦୁଇପଟେ ବଡ଼ ଫୁଲା ନଜର ଆସିଥିଲା। ଅପରେଶନ ପରେ ସେ ଏବେ ସୁସ୍ଥ ଥିବା ବେଳେ ଡାକ୍ତରମାନେ ତାଙ୍କ ଉପରେ ନଜର ରଖିଛନ୍ତି। ଏଥିସହ ସେମାନେ ଦେଶରେ ଏଯାବତ ଏଭଳି ମାମଲା ଆସି ନ ଥିବା ଦାବି କରିଛନ୍ତି।
