ଜେନେଭା,୨୪।୨:ବିଗତ ୨୦ ବର୍ଷ ମଧ୍ୟରେ ମାତୃମୃତ୍ୟୁ ହାର ଏକତୃତୀୟାଂଶ ହ୍ରାସ ପାଇଛି। ଏହା ସତ୍ତ୍ୱେ ଏବେ ପ୍ରତି ଦୁଇ ମିନିଟ୍ରେ ଜଣେ ମହିଳା ଗର୍ଭାବସ୍ଥାରେ କିମ୍ବା ସନ୍ତାନ ପ୍ରସବରେ ଜଟିଳତା କାରଣରୁ ପ୍ରାଣ ହରାଉଥିବା ଗୁରୁବାର ଜାତିସଂଘ ରିପୋର୍ଟରେ କୁହାଯାଇଛି। ଉକ୍ତ ରିପୋର୍ଟ ଅନୁଯାୟୀ ୨୦୦୦ରୁ ୨୦୧୫ ମଧ୍ୟରେ ମାତୃମୃତ୍ୟୁ ହାର ଯଥେଷ୍ଟ ହ୍ରାସ ପାଇଥିଲା। ତେବେ ୨୦୧୬ରୁ ୨୦୨୦ ମଧ୍ୟରେ ଏଥିରେ କୌଣସି ପରିବର୍ତ୍ତନ ଦେଖାଦେଇ ନ ଥିଲା। କାରଣ କେତେକ ଅଞ୍ଚଳରେ ମାତୃ ମୃତ୍ୟୁହାର ବଢ଼ିଥିବା ଦେଖାଯାଇଥିଲା। ଜାତିସଂଘ ରିପୋର୍ଟ ଅନୁଯାୟୀ ୨୦ ବର୍ଷରେ ମୋଟାମୋଟି ଭାବେ ମାତୃ ମୃତ୍ୟୁହାର ୩୪.୪ ପ୍ରତିଶତ ହ୍ରାସ ପାଇଛି। ୨୦୦୦ରେ ପ୍ରତି ଲକ୍ଷେରେ ୩୩୯ ଜଣ ମାଆଙ୍କର ମୃତ୍ୟୁ ଘଟୁଥିବାବେଳେ ୨୦୨୦ରେ ତାହା ୨୨୩କୁ ଖସିଥିଲା ବୋଲି ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ଏବଂ ଜାତିସଂଘର ଅନ୍ୟ ସଂସ୍ଥା ପକ୍ଷରୁ କୁହାଯାଇଛି। ସେହି ଅନୁଯାୟୀ ଦେଖିଲେ ୨୦୨୦ରେ ଦୈନିକ ପାଖାପାଖି ୮୦୦ ମହିଳାଙ୍କର ଗର୍ଭାବସ୍ଥା କିମ୍ବା ସନ୍ତାନ ଜନ୍ମ ସମୟରେ ମୃତ୍ୟୁ ଘଟିଛି।
ଡବ୍ଲ୍ୟୁଏଚ୍ଓ ମୁଖ୍ୟ ଟେଡ୍ରୋସ୍ ଆଧାନମ୍ ଘେବ୍ରେୟେସସ୍ଙ୍କ କହିବା ଅନୁଯାୟୀ ଗର୍ଭାବସ୍ଥା ସବୁ ମହିଳାଙ୍କ ପାଇଁ ଅତ୍ୟନ୍ତ ଆଶାବାଦୀ ଓ ସକାରାତ୍ମକ ଅନୁଭୂତିର ସମୟ ହେବା ଆବଶ୍ୟକ। ତେବେ ବିଶ୍ୱର ଲକ୍ଷ ଲକ୍ଷ ମହିଳା ଏବେ ମଧ୍ୟ ବିପଦର ସମ୍ମୁଖୀନ ହେବା ଦୁଃଖଦାୟକ। ୨୦୧୬ରୁ ୨୦୨୦ ମଧ୍ୟରେ ଜାତିସଂଘର ୮ଟି ଅଞ୍ଚଳ ମଧ୍ୟରୁ ମାତ୍ର ୨ଟି ଅଞ୍ଚଳରେ ମାତୃମୃତ୍ୟୁହାର ହ୍ରାସ ପାଇଥିଲା। ଅଷ୍ଟ୍ରେଲିଆ ଏବଂ ନ୍ୟୁଜିଲାଣ୍ଡରେ ଏହା ୩୫ ପ୍ରତିଶତ ହ୍ରାସ ପାଇଥିବା ବେଳେ କେନ୍ଦ୍ରୀୟ ଏବଂ ଦକ୍ଷିଣ ଏସିଆରେ ୧୬ ପ୍ରତିଶତ କମିଥିଲା। ଅନ୍ୟ ପକ୍ଷରେ ୟୁରୋପ ଏବଂ ଉତ୍ତର ଆମେରିକାରେ ମାତୃ ମୃତ୍ୟୁହାର ୧୭ ପ୍ରତିଶତ ବଢ଼ିଥିବାବେଳେ ଦକ୍ଷିଣ ଆମେରିକା ଏବଂ କାରିବିଆନ୍ ଅଞ୍ଚଳରେ ୧୫ ପ୍ରତିଶତ ବୃଦ୍ଧି ପାଇଥିଲା। ଦରିଦ୍ର ରାଷ୍ଟ୍ରଗୁଡ଼ିକରେ ମାତୃ ମୃତ୍ୟୁହାର ସର୍ବାଧିକ ଚିନ୍ତାଜନକ। ୨୦୨୦ରେ ଘଟିଥିବା ମାତୃମୃତ୍ୟୁର ୭୦ ପ୍ରତିଶତ କେବଳ ଉପସାହାରା ଆଫ୍ରିକା ଅଞ୍ଚଳରୁ ରେକର୍ଡ ହୋଇଥିଲା। ଏଠାରେ ମୃତ୍ୟୁହାର ଅଷ୍ଟ୍ରେଲିଆ ଏବଂ ନ୍ୟୁଜିଲାଣ୍ଡ ତୁଳନାରେ ୧୩୬ ଗୁଣ ଅଧିକ ଥିଲା ବୋଲି ରିପୋର୍ଟରେ କୁହାଯାଇଛି। ସେହିପରି ମାନବୀୟ ସଙ୍କଟର ସମ୍ମୁଖୀନ ହୋଇଥିବା ଆଫଗାନିସ୍ତାନ, କେନ୍ଦ୍ରୀୟ ଆଫ୍ରିକା ରିପବ୍ଲିକ୍, ଚାଦ୍, ଡେମୋକ୍ରାଟିକ ରିପବ୍ଲିକ୍ ଅଫ୍ କଙ୍ଗୋ, ସୋମାଲିଆ, ଦକ୍ଷିଣ ସୁଦାନ, ସୁଦାନ, ସିରିଆ ଏବଂ ୟେମେନରେ ମାତୃମୃତ୍ୟୁ ହାର ବିଶ୍ୱର ହାରାହାରି ହାର୍ ତୁଳନାରେ ଦୁଇ ଗୁଣରୁ ଅଧିକ। ପ୍ରସବ ସମୟରେ ଅତ୍ୟଧିକ ରକ୍ତସ୍ରାବ, ସଂକ୍ରମଣ, ଅସୁରକ୍ଷିତ ଗର୍ଭପାତ ଜନିତ ଜଟିଳତା ଏବଂ ଏଚ୍ଆଇଭି/ଏଡ୍ସ ଆଦି କାରଣରୁ ମାତୃମୃତ୍ୟୁହାର ବଢ଼ିଥାଏ। ସନ୍ତାନ ଜନ୍ମ ଉପରେ ମହିଳାମାନଙ୍କ ନିୟନ୍ତ୍ରଣ ଆସିପାରିଲେ, ବିଶେଷ କରି ଯୋଜନା ଅନୁଯାୟୀ ଏବଂ ଉପଯୁକ୍ତ ବ୍ୟବଧାନରେ ସନ୍ତାନ ଜନ୍ମ କଲେ ମହିଳାମାନେ ସ୍ବାସ୍ଥ୍ୟର ଯତ୍ନ ନେଇପାରିବେ ବୋଲି ଡବ୍ଲ୍ୟୁଏଚ୍ଓ କହିଛି।
