ବିଞ୍ଝାରପୁର,୧୯ା୯(ଡି.ଏନ.ଏ.):ପାରିବାରିକ କଳହକୁ କେନ୍ଦ୍ରକରି ଶନିବାର ରାତିରେ ବିଞ୍ଝାରପୁର ଥାନା ଅଧୀନ ଶାସନ୍ଦା ଗ୍ରାମରେ ଏକ ଅଭାବନୀୟ ଘଟଣା ଘଟିଛି। ଗ୍ରାମର ସେକ୍ ଆଲ୍ଲାଉଦ୍ଦିନ(୪୮) ଶୋଇଥିବା ବେଳେ ସ୍ତ୍ରୀ
ତାଙ୍କ ଉପରେ ଗରମ ପାଣି ଢାଳି ରାଗ ସୁଝାଇଛନ୍ତି। ଫଳରେ ଆଲ୍ଲାଉଦ୍ଦିନ ଅର୍ଦ୍ଧଦଗ୍ଧ ହୋଇଛନ୍ତି। ଗ୍ରାମବାସୀ ତାଙ୍କୁ ଉଦ୍ଧାର କରି ଯାଜପୁର ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଛନ୍ତି। ଥାନାରେ ଅଭିଯୋଗ ପରେ ପୋଲିସ ସମ୍ପୃକ୍ତା ମହିଳାଙ୍କୁ ଅଟକ ରଖି ପଚରାଉଚୁରା କରୁଛି। ଏହି ଘଟଣା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି।
ଅନ୍ୟପକ୍ଷରେ ସ୍ବାମୀ ଯନ୍ତ୍ରଣାରେ ଛଟପଟ ହେଉଥିବା ସମୟରେ ସମ୍ପୃକ୍ତା ମହିଳା ବାହାର ପଟୁ ଘର କବାଟ ବନ୍ଦକରି ଅନ୍ୟତ୍ର ଚାଲିଯାଇଥିଲେ। ଆଲ୍ଲାଉଦ୍ଦିନ ଜୀବନ ବିକଳରେ ଚିତ୍କାର କରିଥିଲେ ମଧ୍ୟ କେହି ତାଙ୍କୁ ଉଦ୍ଧାର କରି ନ ଥିଲେ। ତାଙ୍କ ଘର ନିଛାଟିଆ ସ୍ଥାନରେ ହୋଇଥିବାରୁ ଗ୍ରାମବାସୀ ବି ଏ ସଂକ୍ରାନ୍ତରେ ଜାଣିପାରି ନ ଥିଲେ। ରବିବାର ସକାଳେ ସେହି ରାସ୍ତାଦେଇ ଗ୍ରାମବାସୀ ଯାଉଥିବା ବେଳେ ଆଲ୍ଲାଉଦ୍ଦିନଙ୍କ ଚିତ୍କାର ଶୁଣି କବାଟ ଖୋଲି ତାଙ୍କୁ ଉଦ୍ଧାର କରିବା ସହ ଏକ ଯାଜପୁର ଜିଲା ମୁଖ୍ୟ ଡାକ୍ତରଖାନା ପଠାଇଥିଲେ। ଆଲ୍ଲାଉଦ୍ଦିନଙ୍କ ତରଫରୁ ତାଙ୍କ ସମ୍ପର୍କୀୟ ଥାନାରେ ଅଭିଯୋଗ କରିଛନ୍ତି। ଏନେଇ କୌଣସି ମାମଲା ରୁଜୁ ହୋଇନାହିଁ। ଆଇଆଇସି ରଞ୍ଜିତ ମହାନ୍ତି ଘଟଣାର ତଦନ୍ତ ଜାରି ରଖିଛନ୍ତି।
