ପ୍ୟାରିସ୍, ୯ା୪ (ଏପି)- କରୋନା ଭାଇରସ ମହାମାରୀ ଯୋଗୁ ଫ୍ରେଞ୍ଚ ଓପନ ଟେନିସ୍ ଟୁର୍ନାମେଣ୍ଟକୁ ଏକ ସପ୍ତାହ ବିଳମ୍ବ କରାଯାଇଛି। ଆୟୋଜକଙ୍କ ପକ୍ଷରୁ ଗୁରୁବାର ଏ ବିଷୟରେ ଘୋଷଣା କରାଯାଇଛି। ଏହି କ୍ଲେ-କୋର୍ଟ ଟୁର୍ନାମେଣ୍ଟ ମେ ୨୩ରେ ଆରମ୍ଭ ହୋଇଥାନ୍ତା। କିନ୍ତୁ ବର୍ତ୍ତମାନ ପ୍ରଥମ ରାଉଣ୍ଡ ମ୍ୟାଚ ମେ ୩୦ରୁ ଆରମ୍ଭ ହେବ। ସୁରକ୍ଷିତ ପରିବେଶରେ ଯଥାସମ୍ଭବ ଅଧିକ ଦର୍ଶକଙ୍କ ଉପସ୍ଥିତିରେ ଇଭେଣ୍ଟ ଖେଳାଯିବା ଲାଗି ଯୋଜନା ରହିଥିବା ଫ୍ରେଞ୍ଚ ଟେନିସ ଫେଡେରେଶନ କହିଛି। ଫ୍ରାନ୍ସରେ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିଚାଲିଛି। ହସ୍ପିଟାଲରେ ସ୍ଥାନାଭାବ ଦେଖାଦେଇଛି। ସଂକ୍ରମଣ ହ୍ରାସ ପାଇଁ ଦେଶବ୍ୟାପୀ ନୂଆ କଟକଣା ଜାରି କରାଯାଇଛି। ସ୍କୁଲଗୁଡ଼ିକୁ ୩ ସପ୍ତାହ ଧରି ବନ୍ଦ ରଖାଯାଇଛି। ଏକମାସ ଘରୋଇ ଯାତାୟାତ କଟକଣା କରାଯାଇଛି। ଅତ୍ୟାବଶ୍ୟକ ସାମଗ୍ରୀ ଦୋକାନ ବ୍ୟତୀତ ଅନ୍ୟ ସମସ୍ତ ଦୋକାନ ବଜାର ବନ୍ଦ ରଖାଯାଇଛି। ଫଳରେ ଆସନ୍ତା କିଛି ଦିନ ମଧ୍ୟରେ ଦେଶରେ ସ୍ବାସ୍ଥ୍ୟ ପରିସ୍ଥିତିରେ ଉନ୍ନତି ଘଟିପାରେ। ଯଦି ଏହା ସମ୍ଭବହୁଏ ତେବେ ରୋଲାଣ୍ଡ ଗ୍ୟାରସରେ ଦର୍ଶକଙ୍କୁ ଅନୁମତି ସମ୍ଭବନା ରହିବ ବୋଲି ଫ୍ରେଞ୍ଚ ଟେନିସ ମହାସଂଘ ସଭାପତି ଜାଇଲ୍ସ ମେରୋଟେନ ପ୍ରକାଶ କରିଛନ୍ତି।
