ବାରିପଦା,୮।୬(ନୀଳାଦ୍ରି ବିହାରୀ ଦଣ୍ଡପାଟ): ଶିମିଳିପାଳ ଜାତୀୟ ଉଦ୍ୟାନ ବ୍ୟାଘ୍ର ସଂରକ୍ଷଣ ପ୍ରକଳ୍ପ ଉତ୍ତର ଡିଭିଜନ ଅନ୍ତର୍ଗତ କୁମୁଦାବଡ଼ି ନିକଟରେ ଜଙ୍ଗଲରୁ ମିଳିଥିବା ଖଣ୍ଡବିଖଣ୍ଡିତ ମୃଦଦେହ ଅଂଶ ସମ୍ବନ୍ଧରେ ସ୍ପଷ୍ଟ ସୂଚନା ଜଣାପଡିଛି। କଲରାପତରିଆ ବାଘ ଆକ୍ରମଣରେ ସମ୍ପୃକ୍ତ ବ୍ୟକ୍ତିଙ୍କ ମୃତ୍ୟୁ ହୋଇଥିବା ନେଇ ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପ କ୍ଷେତ୍ର ନିର୍ଦ୍ଦେଶକ ତଥା ବାରିପଦା ସର୍କଲ ଆଞ୍ଚଳିକ ମୁଖ୍ୟ ବନ ସଂରକ୍ଷକ ଡଃ ପ୍ରକାଶ ଚାନ୍ଦ ଗୋଗିନାନୀ ସୋମବାର ପ୍ରେସ ବିବୃତିରେ କହିଛନ୍ତି।
ସୂଚନାଯୋଗ୍ୟ, ଗତ ୧ ଜୁନରେ ଯଶିପୁର ଥାନା ଅଧୀନ ବସନ୍ତପୁର ଗ୍ରାମର ସାଧୁ ନାଏକଙ୍କ ଆଂଶିକ ମୃତଦେହ ଗ୍ରାମବାସୀଙ୍କ ଦ୍ୱାରା ଜଙ୍ଗଲର ଏକ ବୁଦା ଅଞ୍ଚଳରେ ମିଳିଥିଲା। ପ୍ରଥମେ ଜଙ୍ଗଲୀ ପଶୁ ଆକ୍ରମଣ ସନ୍ଦେହରେ ବନ ବିଭାଗ ଓ ପୋଲିସ ଯୋଗେ ତଦନ୍ତ ଚଳାଇଥିଲେ ମଧ୍ୟ ଅନ୍ୟାନ୍ୟ ଶରୀର ଅଂଶ ମିଳି ନ ଥିଲା। ପ୍ରାରମ୍ଭିକ ତଦନ୍ତରେ ମୃତ୍ୟୁର କାରଣ ସ୍ପଷ୍ଟ ହୋଇ ନ ଥିଲା। ସାଧାରଣରେ ମହାବଳ ବାଘ ଆକ୍ରମଣରେ ମୃତ୍ୟୁ ବୋଲି ଚର୍ଚ୍ଚା ହୋଇଥିଲା । ତେବେ ତଦନ୍ତ ପାଇଁ ସଂଗୃହୀତ ନମୁନା ଓ ଅନ୍ୟାନ୍ୟ ପ୍ରମାଣପତ୍ର ଲାବୋରଟାରୀରେ ପରୀକ୍ଷଣ କରାଯାଇଥିଲା।
ଲ୍ୟାବ ରିପୋର୍ଟରେ ଉଲ୍ଲେଖ କରାଯାଇଛି ଯେ, ମୃତଦେହରୁ ସଂଗୃହୀତ କେଶ ନମୁନା କଲରାପତରିଆ ବାଘ ସହ ମେଳ ଖାଉଛି। କୁକୁର ଦାନ୍ତର ଛେଦ ଚିହ୍ନ କଲରାପତରିଆ ଆକାର ସହ ସମାନ ଅଛି। ଏହି ଫଳାଫଳ ପୋଲିସ ତଦନ୍ତ ପାଇଁ ସହଯୋଗ କରିବ। ଶିମିଳିପାଳ ଇତିହାସରେ ଏହା ପ୍ରଥମଥର ପାଇଁ କଲରାପତରିଆ ବାଘ ଦ୍ୱାରା ମଣିଷ ଆକ୍ରମଣରରେ ମୃତ୍ୟୁ ସାମ୍ନାକୁ ଆସିଛି। ସମ୍ଭବତଃ ଏହା ଆକସ୍ମିକ ଆକ୍ରମଣ ହୋଇ ଥାଇପାରେ ବୋଲି କୁହାଯାଇଛି। ମୃତ ସାଧୁ ଛେଳି ପାଇଁ ଡାଳପତ୍ର ଆଣିବାକୁ ଯାଇ ଜଙ୍ଗଲରେ ନିଖୋଜ ଥିଲେ। ଦିନକ ପରେ ଖଣ୍ଡବିଖଣ୍ଡିତ ମୃତଦେହ ଅଂଶ ମିଳିଥିଲା। ତାଙ୍କର ମୃତ୍ୟୁ କଲରାପତରିଆ ବାଘ ଆକ୍ରମଣ ଜନିତ ବୋଲି ଆରସିସିଏଫ ଗୋଗିନାନୀ ସ୍ପଷ୍ଟ କରିଛନ୍ତି । ତତସହିତ ସେ ଦର୍ଶାଇଛନ୍ତି ଯେ, ଘଟଣାସ୍ଥଳର ଆଖପାଖ ଅଞ୍ଚଳରେ ନିୟମିତ ପାଟ୍ରୋଲିଂ ଜାରି ରହିଛି। ଜଙ୍ଗଲ ପଶୁ ଗତିବିଧି ନଜର ରଖିବା ପାଇଁ ଏଆଇ କ୍ୟାମେରା ଓ କ୍ୟାମେରା ଟ୍ରାପ ଲଗାଯାଇଛି। ସକାଳ ଓ ସନ୍ଧ୍ୟା ସମୟରେ ଏକାକୀ ଜଙ୍ଗଲ ଅଞ୍ଚଳକୁ ନ ଯିବା ପାଇଁ ଲୋକଙ୍କୁ ପରାମର୍ଶ ଦିଆଯାଇଛି । ନିହାତି ଆବଶ୍ୟକ ହେଲେ ସମୂହରେ ଚାଲିବେ ଏବଂ କୌଣସି ଜଙ୍ଗଲୀ ପଶୁ ଦେଖିଲେ ତୁରନ୍ତ ନିକଟସ୍ଥ ବନ ବିଭାଗ କ୍ୟାମ୍ପକୁ ଖବର ଦେବେ ବୋଲି ସୂଚନା ଦେଇଛନ୍ତି ।
Dharitri – Odisha’s No.1 Odia Daily
