ବେଙ୍ଗାଲୁରୁ,୭।୨:କର୍ନାଟକର ବେଙ୍ଗାଲୁରୁରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ‘ଭାରତ ଶକ୍ତି ସପ୍ତାହ ୨୦୨୩’ ଉଦ୍ଘାଟନ କରିଛନ୍ତି। ଏହି ଅବସରରେ ପ୍ରଧାନମନ୍ତ୍ରୀ ଏକ ବିଶେଷ ଉପହାର ଗ୍ରହଣ କରିଛନ୍ତି। ଆର୍ଜେଣ୍ଟିନାର ଶକ୍ତି କମ୍ପାନୀ ଓ୍ବାଇପିଏଫ୍ର ସଭାପତି ପାବଲୋ ଗୋଞ୍ଜାଲେଜ ମୋଦିଙ୍କୁ ଲିଓନେଲ ମେସିଙ୍କ ଆର୍ଜେଣ୍ଟିନା ଫୁଟବଲ ଦଳର ଏକ ଜର୍ସି ଦେଇଛନ୍ତି। ଜର୍ସିରେ ଲିଓନେଲ ମେସିଙ୍କ ନାମ ଏବଂ ତାଙ୍କର ଆଇକନିକ ନମ୍ବର ୧୦ ଲେଖାଯାଇଛି।
ମହାନ ଫୁଟବଲ ଖେଳାଳିଙ୍କ ମଧ୍ୟରୁ ଅନ୍ୟତମ ମେସି ଗତ ବର୍ଷ ଡିସେମ୍ବରରେ ଆର୍ଜେଣ୍ଟିନାକୁ ବିଶ୍ୱକପ ଟାଇଟଲ ଦେଇଥିଲେ। ଆର୍ଜେଣ୍ଟିନାର ବିଜୟ ପରେ ମୋଦି ସୋସିଆଲ ମିଡିଆରେ ଦଳକୁ ଅଭିନନ୍ଦନ ଜଣାଇଥିଲେ।
ବେଙ୍ଗାଲୁରୁରେ ଥିବା ‘ଭାରତ ଶକ୍ତି ସପ୍ତାହ ୨୦୨୩’ ଜରିଆରେ ଏକ ଶକ୍ତି ରୂପାନ୍ତର ସୁପର ପାୱାର ଭାବରେ ଭାରତର ବଢୁଥିବା ଶକ୍ତିକୁ ପ୍ରଦର୍ଶନ କରିବାକୁ ଲକ୍ଷ୍ୟ ରଖିଛି। ଏହି କାର୍ଯ୍ୟକ୍ରମରେ ସାରା ବିଶ୍ୱରୁ ୩୦ରୁ ଅଧିକ ମନ୍ତ୍ରୀ ଅଂଶଗ୍ରହଣ କରିଛନ୍ତି। ଏହି ସମାରୋହ ୮ ଫେବୃଆରୀରେ ଶେଷ ହେବ।
