ଖୋର୍ଦ୍ଧା ଅଫିସ,୧୪ା୩: ବିଜେଡିରୁ ନିଲମ୍ବିତ ଚିଲିକା ବିଧାୟକ ପ୍ରଶାନ୍ତ ଜଗଦ୍ଦେବଙ୍କ ଗୁଣ୍ଡାଗର୍ଦ୍ଦିକୁ ନେଇ ଏବେ ସବୁଠି ଚର୍ଚ୍ଚା। ଶନିବାର ବାଣପୁର ପଞ୍ଚାୟତ ସମିତି ଅଧ୍ୟକ୍ଷ ପଦ ପାଇଁ ନିର୍ବାଚନ ଚାଲୁଥିବାବେଳେ ବ୍ଲକ କାର୍ଯ୍ୟାଳୟ ଆଗରେ ଲୋକଙ୍କ ଉପରକୁ ବିଧାୟକ ଜଗଦ୍ଦେବ ଗାଡ଼ି ମଡ଼ାଇ ଦେଇଥିଲେ। ଫଳରେ ୧୦ ପୋଲିସ କର୍ମଚାରୀ, ୧୫ରୁ ଊର୍ଦ୍ଧ୍ୱ ଲୋକ ଏବଂ ୨ଜଣ ଖବରଦାତା ଗୁରୁତର ଆହତ ହୋଇଥିଲେ। ବିଧାୟକଙ୍କ ଏଭଳି ଅମାନବୀୟ କାର୍ଯ୍ୟରେ ଉତ୍କ୍ଷିପ୍ତ ହୋଇ ତାଙ୍କୁ ଗାଡ଼ିରୁ ଟାଣିଆଣି ନିସ୍ତୁକ ମାଡ଼ ମାରିଥିଲେ। ଏହି ଘଟଣା ସାଧାରଣରେ ଚର୍ଚ୍ଚାର ବିଷୟ ପାଲଟିଥିବାବେଳେ ଏହାକୁ ନେଇ ରାଜନୀତି ଜୋର ଧରିଛି। ଅନ୍ୟପକ୍ଷରେ ଜଗଦ୍ଦେବଙ୍କୁ ମାଡ଼ ମରାଯିବା ଓ ତାଙ୍କ କାର୍ ଭାଙ୍ଗିଦିଆଯିବା ଘଟଣା ପଛରେ ଜନସାଧାରଣଙ୍କ ପୁଞ୍ଜିଭୂତ ଅସନ୍ତୋଷ ହିଁ ମୁଖ୍ୟ କାରଣ ବୋଲି କୁହାଯାଉଛି।
ସୂଚନା ଅନୁଯାୟୀ, ବିଧାୟକ ଜଗଦ୍ଦେବ ଦୀର୍ଘଦିନ ଧରି ଚିଲିକା ଅଞ୍ଚଳରେ ନିଜ ମନମାନି କରିଆସୁଥିଲେ। ତାଙ୍କୁ ଯିଏ ବିରୋଧ କରୁଥିଲା କିମ୍ବା ତାଙ୍କ କାର୍ଯ୍ୟରେ ହସ୍ତକ୍ଷେପ କରୁଥିଲା, ସେମାନଙ୍କୁ ଆକ୍ରମଣ କରାଯାଉଥିଲା। କେତେବେଳେ ନିଜ ଦଳର କର୍ମୀ, ଆଉ କେବେ ପ୍ରଶାସନିକ ଅଧିକାରୀ ତ ଆଉ କେବେ ଲୋକଙ୍କୁ ଆକ୍ରମଣ କରିବାକୁ ସେ ପଛାଉ ନ ଥିଲେ। ଚିଲିକା ନିର୍ବାଚନ ମଣ୍ଡଳୀରେ ନିଜ ପତିଆରା ଦେଖାଇ ଆସୁଥିଲେ। ଏଥିଯୋଗୁ ଦୀର୍ଘଦିନ ଧରି ଲୋକଙ୍କ ମନରେ ଅସନ୍ତୋଷର ବହ୍ନି ଜଳୁଥିଲା। ଏହି ପୁଞ୍ଜିଭୂତ ଅସନ୍ତୋଷ ଶନିବାର ବିସ୍ଫୋରଣ ହୋଇଥିଲା। ବିଧାୟକଙ୍କ ମନମାନି ଚଳିିବ ନାହିଁ କି ଗୁଣ୍ଡାଗିରିକୁ ବରଦାସ୍ତ କରାଯିବ ନାହିଁ ବୋଲି ଲୋକେ ଗଣମାଧ୍ୟମ ଆଗରେ କହିଥିଲେ।
ଜଗଦ୍ଦେବଙ୍କ ବିରୋଧରେ ଅଭିଯୋଗର ଲମ୍ବା ତାଲିକା ରହିଛି। ୨୦୧୪ରେ ସେ ବିଜେଡି ଟିକେଟ ପାଇ ବେଗୁନିଆ ନିର୍ବାଚନମଣ୍ଡଳୀରୁ ବିଧାୟକ ଭାବେ ନିର୍ବାଚିତ ହୋଇଥିଲେ। ଏହାପରଠାରୁ ତାଙ୍କ ବିଶୃଙ୍ଖଳତା ଆରମ୍ଭ ହୋଇଯାଇଥିଲା। ବୌଦ୍ଧରେ ଭାଜପା କର୍ମୀଙ୍କୁ ଆକ୍ରମଣ ନେଇ ତାଙ୍କ ବିରୋଧରେ ସ୍ଥାନୀୟ ଥାନାରେ ଅଭିଯୋଗ ହୋଇଥିଲା। ବେଗୁନିଆରେ ଜଣେ ପ୍ରଶାସନିକ ଅଧିକାରୀଙ୍କୁ ଦୁର୍ବ୍ୟବହାର ଅଭିଯୋଗ ଆସିଥିଲା। ୨୦୧୯ ନିର୍ବାଚନରେ ସେ ବିଜେଡି ଟିକେଟରେ ଚିଲିକାରୁ ଜିତିବା ପରେ ଜିଲା ଯୋଜନା କମିଟି ସଭାପତି ହୋଇଥିଲେ। ପରେ ଭୁବନେଶ୍ୱରସ୍ଥିତ ନିଜ ବାସଭବନ ଆଗରେ ଉଠାଦୋକାନୀଙ୍କୁ ଗାଳିଗୁଲଜ କରି ଚର୍ଚ୍ଚାକୁ ଆସିଥିଲେ। ଏପରିକି ପୁରୀରେ ଶ୍ରୀମନ୍ଦିର ସିଂହଦ୍ୱାର ଆଗରେ ଜଣେ ଆଇପିଏସ୍ ଅଫିସରଙ୍କୁ ଧକ୍କା ମାରି ବିବାଦରେ ଫସିଥିଲେ। ଚିଲିକାରେ ଜଣେ କନିଷ୍ଠ ଯନ୍ତ୍ରୀଙ୍କୁ ଆଶାଳୀନ ମନ୍ତବ୍ୟ ସହ ଗାଳିଗୁଲଜ ନେଇ ତାଙ୍କ ନାମରେ ଅଭିଯୋଗ ହୋଇଥିଲା। ଗତବର୍ଷ ସେପ୍ଟେମ୍ବର ୮ରେ ବାଲୁଗାଁ ଏନ୍ଏସି କାର୍ଯ୍ୟାଳୟ ଆଗରେ ଭାଜପା ମଣ୍ଡଳ ସଭାପତି ନିରଞ୍ଜନ ସେଠୀଙ୍କୁ ଜାତିଆଣ ଆକ୍ଷେପ, ଆକ୍ରମଣ ଘଟଣାରେ ସେ ଗିରଫ ହୋଇ ଜେଲ ଯାଇଥିଲେ। ଏଥିଯୋଗୁ ତାଙ୍କୁ ବିଜେଡିରୁ ନିଲମ୍ବନ କରାଯିବା ସହ ଜିଲା ଯୋଜନା କମିଟି ସଭାପତି ପଦରୁ ହଟାଇ ଦିଆଯାଇଥିଲା। ପଞ୍ଚାୟତ ନିର୍ବାଚନ ସମୟରେ କର୍ମୀ ସମାବେଶରେ ଜଣେ ମହିଳା କର୍ମୀଙ୍କୁ ଅଶାଳୀନ ବ୍ୟବହାର କରିଥିବା, ଜଣେ ସମିତିସଭ୍ୟ ପ୍ରାର୍ଥୀଙ୍କ ସ୍ବାମୀଙ୍କୁ ଧମକଚମକ ଦେଇଥିବା ଇତ୍ୟାଦି ଅଭିଯୋଗ ହୋଇଥିଲା। ଏନେଇ ଭାଜପା ନେତା ପୃଥିରାଜ ହରିଚନ୍ଦନ କହିଛନ୍ତି, ଯଦି ଜଗଦ୍ଦେବଙ୍କୁ ବିଜେଡିରୁ ନିଲମ୍ବନ କରାଯାଇଥିଲା ତେବେ ସେ ଦଳୀୟ କାର୍ଯ୍ୟକ୍ରମରେ କିପରି ଯୋଗଦେଉଥିଲେ। ଏସବୁ ପ୍ରହସନ ଚାଲିଛି। ଚିଲିକାରେ ଜଗଦ୍ଦେବଙ୍କ ଗୁଣ୍ଡାଗିରି ଯୋଗୁ ଚଳିତ ପଞ୍ଚାୟତ ନିର୍ବାଚନରେ ତାଙ୍କ ପତିଆରା କାମ ଦେଲାନାହିଁ। ଚିଲିକାର ୬ଟି ନିର୍ବାଚନମଣ୍ଡଳୀରୁ ଭାଜପା ୨ଟିରେ ଜିତିବା ସହ ୨ବ୍ଲକରେ ପଞ୍ଚାୟତ ସମିତି ଗଠନ କରିଛି। ଭାଜପାର ବିଜୟ ଦେଖି ଏବଂ ତାଙ୍କ ହାତରୁ ବ୍ଲକ ଅଧ୍ୟକ୍ଷ ପଦ ଖସିଯିବାରୁ ସେ ଆତଙ୍କିତ ହୋଇପଡ଼ିଥିଲେ। ମାନସିକ ସ୍ତରରେ ଜଗଦ୍ଦେବ ଭାରସାମ୍ୟ ହରାଇ ମଦ୍ୟପାନ କରି ଲୋକଙ୍କ ଉପରେ ଗାଡ଼ି ମଡ଼ାଇ ହତ୍ୟା କରିବାକୁ ଯୋଜନା କରିଥିଲେ ବୋଲି ପୃଥିରାଜ କହିଛନ୍ତି।
