ବମ୍ବେ: ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟା ମାମଲାର ବିଭିନ୍ନ ଦିଗକୁ ନେଇ ତଦନ୍ତ କରୁଛି ମୁମ୍ବାଇ ପୋଲିସ। ଫଳରେ ନୂଆ ନୂଆ ତଥ୍ୟ ସାମ୍ନାକୁ ଆସୁଛି। ମୃତ୍ୟୁ ପୂର୍ବରୁ ସୁଶାନ୍ତ ଗୁଗୁଲ୍ରେ ନିଜ ନାମକୁ ସର୍ଚ୍ଚ କରିଥିଲେ। ଏପରିକି ସେ ଆତ୍ମହତ୍ୟା କରିବା ସମୟରେ ଉକ୍ତ ଘରେ ତାଙ୍କର ଜଣେ ବନ୍ଧୁ ଉପସ୍ଥିତ ଥିବା ପୋଲିସ ଜାଣିବାକୁ ପାଇଛି।
ମୃତ୍ୟୁ ପୂର୍ବରୁ ସୁଶାନ୍ତ କ’ଣ କରିଥିଲେ ତାହା ଜାଣିବା ପାଇଁ ଫରେନ୍ସିଂ ଟିମ୍କୁ ଫୋନ୍ ଦିଆଯାଇଥିଲା। ସେଥିରୁ ଜଣାପଡ଼ିଛି ଯେ ସୁଶାନ୍ତ ଗୁଗୁଲରେ ନିଜ ନାମ ଟାଇପ୍ କରିଥିଲେ। ଉକ୍ତ ଦିନ ୧୦ଟା ୧୫ ମିନିଟ୍ରେ ନିଜ ପୁରା ନାମ ଟାଇପ୍ କରିଥିଲେ। ପରେ କିଛି ଆର୍ଟିକିଲ ପଢ଼ିଥିଲେ। ସେତେବେଳେ ତାଙ୍କ ବିଷୟରେ କ’ଣ ଲେଖାଯାଉଛି ତାହା ଜାଣିବା ଲାଗି ସେ ଏପରି କରିଥିବା କୁହାଯାଉଛି। ଏହା ପରେ ସେ ଆତ୍ମହତ୍ୟା କରିଥିଲେ।
ସେହିଭଳି ଆଉ ଏକ କଥା ଜଣାପଡ଼ିଛି। ଆତ୍ମହତ୍ୟା ସମୟରେ ଘରେ ତାଙ୍କର ବନ୍ଧୁ ସିଦ୍ଧାର୍ଥ ପିଥାନୀ ଥିଲେ। ବୁଧବାର ପୋଲିସ ତାଙ୍କୁ ଏ ବିଷୟରେ ପଚରାଉଚରା କରିବାକୁ ଡାକିଥିଲା। ସିଦ୍ଧାର୍ଥ ସୁଶାନ୍ତଙ୍କ କ୍ରିଏଟିଭ୍ କଣ୍ଟେଣ୍ଟ ମ୍ୟାନେଜର ଥିଲେ।
ଏହା ଜଣାପଡ଼ିବା ପରେ ସୁଶାନ୍ତଙ୍କ ପ୍ରଶଂସକ ଏହା ଆତ୍ମହତ୍ୟା ନୁହେଁ ହତ୍ୟା ବୋଲି କହୁଛନ୍ତି। ହେଲେ ପୋଷ୍ଟମର୍ଟମ ରିପୋର୍ଟରୁ ସୁଶାନ୍ତଙ୍କ ମୃତ୍ୟୁ ଆତ୍ମହତ୍ୟା ବୋଲି କୁହାଯାଉଛି। ତାଙ୍କ ଶରୀରର ଅନ୍ୟ କୌଣସି ଅଂଶରେ ହତ୍ୟାର ଲକ୍ଷଣ ନ ଥିବା କୁହାଯାଇଛି।
