ବ୍ରିସବେନ: ଲାଇଭ ଟିଭି ପ୍ରୋଗ୍ରାମରେ ଜଣେ ମହିଳା ରିପୋର୍ଟର ହଠାତ୍ ନିଜକୁ ଚାପୁଡ଼ା ମାରିବାର ଏକ ଭିଡିଓ ଏବେ ବିଭିନ୍ନ ସାମାଜିକ ଗଣମାଧ୍ୟମରେ ଭାଇରାଲ ହେବାରେ ଲାଗିଛି। ମହିଳା ରିପୋର୍ଟରଙ୍କ ଏହି ଆଚରଣରେ, ସମ୍ପୃକ୍ତ ପ୍ରୋଗ୍ରାମର ଉପସ୍ଥାପିକା ମଧ୍ୟ ନିଜ ହସ ରୋକି ପାରିନଥିବା ଲକ୍ଷ୍ୟ କରାଯାଉଛି। ତେବେ ଏହି ଭିଡିଓ ଦେଖି ମହିଳାଙ୍କୁ ବିଭିନ୍ନ ସାମାଜିକ ଗଣମାଧ୍ୟମରେ ପରିହାସ କରାଯାଉଛି। ଏଥିସହିତ ଭିଡିଓଟିକୁ ଦେଖି ଅନେକ ପ୍ରଶ୍ନ କରିଛନ୍ତି ମହିଳା ରିପୋର୍ଟର ଜଣକ ନିଜ ମୁହଁକୁ ଚାପୁଡ଼ା ମାରିବା ପଛର କାରଣ କ’ଣ। ତେବେ ଲାଇଭ୍୍ ଶୋ ସମୟରେ ନିଜକୁ ଚାପୁଡ଼ା ମାରିବା ପଛର କାରଣ ଗୋଟିଏ ମଶା ହୋଇଥିବା ଏହି ଅଷ୍ଟ୍ରେଲୀୟ ମହିଳା ସାମ୍ବାଦିକ ଜଣଙ୍କ ଦର୍ଶାଇଛନ୍ତି। ନିଜ ମୁହଁରେ ଏକ ମଶା ଉଡୁଥିବାରୁ ସେହି ମଶାକୁ ଘଉଡାଇବାକୁ ଚେଷ୍ଟାକରି ସେ ନିଜକୁ ଚାପୁଡ଼ା ମାରିଥିବା ସ୍ବୀକାର କରିଛନ୍ତ। ଭିଡିଓରେ ଥିବା ଏହି ମହିଳା ସାମ୍ବାଦିକ ହେଉଛନ୍ତି ଆଣ୍ଡ୍ରେୟା କ୍ରୋଥର। ସେ ଅଷ୍ଟ୍ରେଲିଆର ’ଟୁଡେ ଶୋ’ ନାମକ ଏକ ଗଣମାଧ୍ୟମ ସଂସ୍ଥାରେ କାମ କରନ୍ତି । ସୂଚନା ଅନୁଯାୟୀ, ନିକଟରେ ବ୍ରିସ୍ବେନରେ ବନ୍ୟା ପରିସ୍ଥିତି ବିଷୟରେ ରିପୋର୍ଟିଂ କରିବାକୁ ଘଟଣାସ୍ଥଳକୁ ଯାଇଥିଲେ ଆଣ୍ଡ୍ରେୟା । ଏହି ସମୟରେ ଯେତେବେଳେ ସେ ତାଙ୍କ ଲାଇଭ ରିପୋର୍ଟିଂ ଆରମ୍ଭ କଲେ, ହଠାତ୍ ତାଙ୍କ ମୁହଁରେ ଏକ ମଶା ଆସି ବସିଲା। ଫଳରେ ସେ ମଶାଟିକୁ ଘଉଡାଇବାକୁ ଚେଷ୍ଟା କରି ଭୁଲ୍ରେ ନିଜକୁ ଚାପୁଡ଼ା ମାରିଥିଲେ। ଲାଇଭ୍ ଶୋ ସମୟରେ ଏହି ଦୃଶ୍ୟ କ୍ୟାମେରାରେ କଏଦ୍ ହୋଇଥିଲା, ଯାହାର ଭିଡିଓ ବର୍ତ୍ତମାନ ଭାଇରାଲ ହେବାରେ ଲାଗିଛି। ଯେଉଁମାନେ ଏହି ଭିଡିଓ ଦେଖିଛନ୍ତି ସେମାନେ ବିଭିନ୍ନ ପ୍ରକାରର ପ୍ରତିକ୍ରିୟା ଦେଇ ଏହାକୁ ଉପଭୋଗ କରୁଛନ୍ତି । ମହିଳା ରିପୋର୍ଟର ଆଣ୍ଡ୍ରେୟା ମଧ୍ୟ ଏହି ଭିଡିଓଟିକୁ ନିଜ ଇନ୍ଷ୍ଟାଗ୍ରାମ ପେଜ୍ରେ ଶେୟାର କରିଛନ୍ତି।
