ନୂଆଦିଲ୍ଲୀ: ପିଏନ୍ବିରୁ ୧୩ ହଜାର କୋଟି ଟଙ୍କା ଠକେଇରେ ମୁଖ୍ୟ ଅଭିଯୁକ୍ତ ନୀରବ ମୋଦିଙ୍କ ବିରୋଧରେ ଏବେ ପ୍ରତ୍ୟର୍ପଣ ମାମଲା ରୁଜୁ ହୋଇଛି। ତାଙ୍କ ଭାଇ ନେହାଲ ମୋଦିଙ୍କ ବିରୋଧରେ ରବିବାର ଏକ ଠକେଇ ମାମଲା ସାମ୍ନାକୁ ଆସିଛି। ନେହାଲଙ୍କ ବିରୋଧରେ ୧୯ କୋଟି ଟଙ୍କାରୁ ଊର୍ଦ୍ଧ୍ୱ ଏକ ଠକେଇ ମାମଲା ରୁଜୁ କରାଯାଇଛି। ମଲ୍ଟି ଲେୟାର ସ୍କିମ ଜରିଆରେ ସେ ଏଭଳି ଠକେଇ କରିଥିବାରୁ ନ୍ୟୁୟର୍କରେ ମାମଲା ରୁଜୁ କରାଯାଇଛି। ତାଙ୍କ ବିରୋଧରେ ଫାଷ୍ଟ ଡିଗ୍ରୀରେ ବଡ ଚୋରି ଅଭିଯୋଗ ଆସିଛି। ଠକେଇ ୧ ନିୟୁତ ଡଲାରରୁ ଅଧିକ ହୋଇଥିବାରୁ ଫାଷ୍ଟ ଡିଗ୍ରୀ ଚୋରି ମାମଲା ସାମ୍ନାକୁ ଆସିଛି। ଏବେ ନ୍ୟୁୟର୍କ ସୁପ୍ରିମକୋର୍ଟରେ ନେହାଲଙ୍କ ବିରୋଧରେ ମାମଲା ଚାଲିବ। ନେହାଲ ଏହି ଘଟଣା ସହ ୨୦୧୫ରେ ଜଡିତ। ଏକ ପ୍ରେଜେନଟେଶନ ପାଇଁ ସେ ଆମେରିକାର ଏଲ୍ଏଲ୍ଡି ଡାଇମଣ୍ଡଠାରୁ ୨.୬ ନିୟୁତ ଡଲାର ମୂଲ୍ୟର ହୀରା ନେଇଥିଲେ। ଫାଷ୍ଟକୋ ହୋଲସେଲ କର୍ପୋରେଶନ ସହ ଚୁକ୍ତିରେ ସାମିଲ ହୋଇଥିବାରୁ ହୀରାର ଆବଶ୍ୟକତା ରହିଛି। ହୀରାଗୁଡିକୁ ସେ ଫାଷ୍ଟକୋକୁ ଦେଖାଇବେ ବୋଲି ନେହାଲ ମିଛ କହିଥିଲେ। ହେଲେ ଏଲ୍ଏଲ୍ଡି ଦେଇଥିବା ଏହି ହୀରା ଆଉ ଫେରି ପାଇ ନ ଥିଲା। ଏଲ୍ଏଲ୍ଡି ହୀରାକୁ ଫାଷ୍ଟକୋ କିଣିବାକୁ ଆଗ୍ରହୀ ବୋଲି ସେ ଆଳ ଦେଖାଉଥିଲେ। ଏହି ସ୍କିମରେ ଯେଉଁମାନେ ମେମ୍ବର ରହିବେ ତାଙ୍କୁ ହୀରା କ୍ରୟରେ ରିହାତି ମିଳିବ ବୋଲି କୁହାଯାଇଥିଲା। ନେହାଲ ଏଲ୍ଏଲ୍ଡିକୁ ପରେ କିଛି ଅର୍ଥ ମଧ୍ୟ ପ୍ରଦାନ କରିଥିଲେ। ଶୀଘ୍ର ସମ୍ପୂର୍ଣ୍ଣ ଅର୍ଥ ପ୍ରଦାନ କରିବାକୁ ମଧ୍ୟ ସେ ପ୍ରତିଶ୍ରୁତି ଦେଇଥିଲେ। ମାତ୍ର ଫାଷ୍ଟକୋଠାରୁ ଅର୍ଥ ମିଳି ନ ଥିବାରୁ ସେ ଟଙ୍କା ଫେରାଇବାରେ ବିଳମ୍ବ ହେଉଥିବା ଆଳ ଦେଖାଉଥିଲେ। ନେହାଲଙ୍କ କଥା ସତ ବୋଲି ଏଲ୍ଏଲ୍ଡି ମାନି ନେଇଥିଲା। ମାତ୍ର ସମୟ ଗଡି ଚାଲିଥିବାରୁ ସମ୍ପୂର୍ଣ୍ଣ ଅର୍ଥ ଫେରାଇବା ଲାଗି ଏଲ୍ଏଲ୍ଡି କହିଥିଲା। ଅର୍ଥ ଫେରାଇବାରେ ନେହାଲ ବିଫଳ ହେବାରୁ ହୀରା ଦେଇଥିବା କମ୍ପାନୀ ବାଧ୍ୟ ହୋଇ ତାଙ୍କ ବିରୋଧରେ ମାମଲା ରୁଜୁ କରିଛି।
