ପୁରୀ,୨୬ା୩(ଅଜିତ୍ କୁମାର ମହାନ୍ତି):ଶ୍ରୀମନ୍ଦିର ନୀଳଚକ୍ର ଉପରେ ସୋମବାର ପୂର୍ବାହ୍ନରେ କିଛି ସମୟ ଧରି ଏକ ଚିଲ ବସିଥିବା ଦେଖିବାକୁ ମିଳିଥିଲା। କିଛି ମାସ ବ୍ୟବଧାନ ପରେ ଏହା ଦ୍ୱିତୀୟ ଘଟଣା ବୋଲି ଜଣାପଡ଼ିଛି। ଚିଲଟି କିଛି ସମୟ ନୀଳଚକ୍ର ଅକ୍ଷୟଦଣ୍ଡରେ ବସିବା ପରେ ଉଡ଼ିଚାଲିଯାଇଥିଲା। ସୋମବାର ସକାଳ ପ୍ରାୟ ୬ଟା ୩୦ରୁ ୭ଟା ମଧ୍ୟରେ ଏହି ଘଟଣା ଘଟିଥିଲା। ୧୦ ରୁ ୧୫ ମିନିଟ୍ ଧରି ଚିଲଟି ଅକ୍ଷୟଦଣ୍ଡ ଉପରେ ବସିଥିଲା। ପତିତପାବନ ବାନା ଉପରେ ଚିଲ ବସିବା ଶୁଭ କି ଅଶୁଭ ତାହାକୁ ନେଇ ବିଭିନ୍ନ ମହଲରେ ପ୍ରଶ୍ନ ଉଠିଛି। କେତେଜଣ ସେବାୟତ ଏହାକୁ ମହାପ୍ରଭୁଙ୍କ ଅଶୁଭ ସଂକେତ କରୁଥିବା ବେଳେ ଅନ୍ୟ କେତେଜଣ ଏହାକୁ ସାଧାରଣ ବୋଲି କହିଛନ୍ତି। ଚିଲ ପତିତପାବନ ବାନା ଉପରେ ବସିଲେ ଦେଶରେ ବିପର୍ଯ୍ୟୟ ଘଟିଥାଏ ବୋଲି ଅନେକେ ମତ ଦେଇଛନ୍ତି। ଅନ୍ୟପକ୍ଷରେ ଏହା ଏକ ସାଧାରଣ କଥା ବୋଲି ଅନେକ ବ୍ୟକ୍ତିବିଶେଷ ମତ ଦେଇଛନ୍ତି।
Dharitri – Odisha’s No.1 Odia Daily
