ଶ୍ରୀନଗର,୧୭।୮: ସେପ୍ଟେମ୍ବର ୧୮ରୁ ଜମ୍ମୁ-କଶ୍ମୀରରେ ତିନୋଟି ପର୍ଯ୍ୟାୟରେ ମତଦାନ ହେବାକୁ ଥିବାବେଳେ ଅକ୍ଟୋବର ୧ରେ ଗୋଟିଏ ପର୍ଯ୍ୟାୟରେ ହରିୟାଣା ବିଧାନସଭା ପାଇଁ ଭୋଟ ଗ୍ରହଣ ହେବ। ତେବେ ତାରିଖ ଘୋଷଣା ହେବା ମାତ୍ରେ ରାଜନୈତିକ ହଲଚଲ ମଧ୍ୟ ଆରମ୍ଭ ହୋଇଯାଇଛି।
ବର୍ତ୍ତମାନ ଗୁଲାମ ନବୀ ଆଜାଦଙ୍କୁ ବଡ଼ ଝଟ୍କା ଲାଗିଛି। ଡେମୋକ୍ରାଟିକ ପ୍ରୋଗେସିଭ୍ ଆଜାଦ ପାର୍ଟିର ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ତାଜ ମୋହିଉଦ୍ଦିନ ଦଳରୁ ଇସ୍ତଫା ଦେଇଛନ୍ତି। କୁହାଯାଉଛି ଯେ ତାଜ ମୋହିଉଦ୍ଦିନ ପୁଣି କଂଗ୍ରେସକୁ ଫେରିପାରନ୍ତି । କଂଗ୍ରେସର ନୂଆ ରାଜ୍ୟ ସଭାପତି ତାରିକ କରା ବର୍ତ୍ତମାନ ଦିଲ୍ଲୀରେ ଅଛନ୍ତି। କୁହାଯାଉଛି ଯେ ଦିଲ୍ଲୀରୁ ଫେରିବା ପରେ ତାଜ ମୋହିଉଦ୍ଦିନଙ୍କୁ କଂଗ୍ରେସର ସଦସ୍ୟତା ଦିଆଯିବ। ଜମ୍ମୁ କଶ୍ମୀରରେ ବିଧାନସଭା ନିର୍ବାଚନ ଘୋଷଣା ପରେ ଏହା ପ୍ରଥମ ବଡ଼ ପରିବର୍ତ୍ତନ ଦେଖିବାକୁ ମିଳିବ।
ଡେମୋକ୍ରାଟିକ ପ୍ରୋଗେସିଭ୍ ଆଜାଦ ପାର୍ଟି ଛାଡିଥିବା ତାଜ ସୋମବାର କିମ୍ବା ମଙ୍ଗଳବାର ଦିନ କଂଗ୍ରେସରେ ଯୋଗ ଦେଇପାରନ୍ତି। ସୂଚନା ଥାଉ କି ଯେ ତାଜ ମୋହିଉଦ୍ଦିନ, ଗୁଲାମ ନବୀ ଆଜାଦଙ୍କ ସମର୍ଥନରେ କଂଗ୍ରେସ ଛାଡିଥିଲେ ।
