ଭୁବନେଶ୍ୱର,୧୯।୯(ବ୍ୟୁରୋ): ଭୁବନେଶ୍ୱର ଅଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥାନ(ଏମ୍ସ)ରେ ଜଟିଳ ଫୁସ୍ଫୁସ୍ ସଂକ୍ରମଣରୁ ସୁସ୍ଥ ହୋଇଛନ୍ତି ଜଣେ ୨୨ ମାସର ଶିଶୁ କନ୍ୟା। ଚିକିତ୍ସା ବିଜ୍ଞାନର ଚମତ୍କାରିତା ସହ ଡାକ୍ତରଙ୍କ ନିରନ୍ତର ପରିଶ୍ରମରୁ ଏହି ସଫଳତା ମିଳିଛି। ହସ୍ପିଟାଲ ପକ୍ଷରୁ ମିଳିଥିବା ସୂଚନାନୁସାରେ, ଢେଙ୍କାନାଳ ଜିଲାର ଶିଶୁକନ୍ୟା ଓ ପରିବାରର ସମସ୍ତ ସଦସ୍ୟ କରୋନାରେ ଆକ୍ରାନ୍ତ ହୋଇ ସୁସ୍ଥ ହୋଇଥିଲେ। ଶିଶୁଟିର କରୋନା ପରବର୍ତ୍ତୀ ଜଟିଳତା ଦେଖାଦେଇଥିଲା। ଶ୍ୱାସକ୍ରିୟାରେ କଷ୍ଟ ଅନୁଭବ କରୁଥିଲେ। କଟକ ଓ ଭୁବନେଶ୍ୱରର ବିଭିନ୍ନ ହସ୍ପିଟାଲରେ ଚିକିତ୍ସିତ ହେବା ପରେ ସ୍ବାସ୍ଥ୍ୟାବସ୍ଥାରେ ସୁଧାର ନ ହେବାରୁ ତାଙ୍କୁ ଏମ୍ସକୁ ଅଣାଯାଇଥିଲା। ଏହାପରେ ତୁରନ୍ତ ତାଙ୍କୁ ଶିଶୁରୋଗ ବିଭାଗ ପେଡିଆଟ୍ରିକ୍ ଇଣ୍ଟେନ୍ସିଭ୍ କେୟାର ୟୁନିଟ୍(ପିଆଇସିୟୁ)ରେ ଭର୍ତ୍ତି କରି ଅକ୍ସିଜେନ ଲଗାଯାଇଥିଲା। ବିଭିନ୍ନ ପରୀକ୍ଷା ପରେ ଶିଶୁଟି ‘Pulmonary alveolar proteinosis’ ରୋଗରେ ପୀଡ଼ିତ ଥିବା ଜଣାପଡ଼ିଥିଲା। ଏହା ଏକ ବିରଳ ରୋଗ, ଯେଉଁଥିରେ ଦୁଗ୍ଧ ପରି ସାମଗ୍ରୀ ଉଭୟ ଫୁସ୍ଫୁସ୍ରେ ଜମା ହୋଇଯାଏ। ଏହାର ଚିକିତ୍ସା କରିବା ଚ୍ୟାଲେଞ୍ଜ ଥିଲା। ଏଥିପାଇଁ ଏକ ବିଶେଷଜ୍ଞ ଡାକ୍ତରୀ ଦଳ ଗଠନ ହୋଇଥିଲା। ଏହି ଟିମ୍ ଶିଶୁଟିକୁ ଏକ୍ମୋ ଚିକିତ୍ସା ଅର୍ଥାତ୍ କୃତ୍ରିମ ଉପାୟରେ ଅକ୍ସିଜେନ ଯୋଗାଇ ସାଲାଇନ ଦ୍ୱାରା ଫୁସ୍ଫୁସ୍ ସଫା କରିବା ପାଇଁ ନିଷ୍ପତ୍ତି ନେଇଥିଲେ। ଏହାପରେ ଶିଶୁଟିକୁ ଏକ୍ମୋରେ ରଖାଯାଇଥିଲା। ଅଗଷ୍ଟ ୩୦ରେ ପ୍ରଥମ ଚିକିତ୍ସା କରାଯାଇଥିଲା। ଶିଶୁଟିର ସ୍ବାସ୍ଥ୍ୟରେ ଉନ୍ନତି ଆସିବା ପରେ ଗତ ୧୩ ତାରିଖରେ ଆଉଥରେ ସେହିଭଳି ଚିକିତ୍ସା ହୋଇଥିଲା। ଏହାପରେ ଶିଶୁଟିର ସ୍ବାସ୍ଥ୍ୟାବସ୍ଥାରେ ଅଦ୍ଭୂତପୂର୍ବ ଉନ୍ନତି ଦେଖାଯାଇଥିଲା। ଏବେ ସେ ହସ୍ପିଟାଲରୁ ଡିସ୍ଚାର୍ଜ ହୋଇ ଘରକୁ ଫେରିଛି। ଶିଶୁକୁ ଚିକିତ୍ସା କରିଥିବା ଡାକ୍ତରୀ ଟିମ୍ରେ ଶିଶୁବିଭାଗର ଡା. କ୍ରିଷ୍ଣା ମୋହନ ଗୁଲ୍ଲା, ଡା. ରଶ୍ମି ରଞ୍ଜନ ଦାସ, ଡା. ଅମିତ କୁମାର ଶତପଥୀ, ଆନାସ୍ଥେସିଆର ଡା. ସତ୍ୟଜିତ ମିଶ୍ର, ଡା. ବିକ୍ରମ କେଶରୀ ବେହେରା, କାର୍ଡିଓ ଥୋରାସିସ୍ ସର୍ଜରୀର ଡା. ସିଦ୍ଧାର୍ଥ କୁମାର ସାଥିଆ, ଡା. ସତ୍ୟପ୍ରିୟା ମହାନ୍ତି ଏବଂ ପେଡିଆଟ୍ରିକ୍ ସର୍ଜରିର ଡା. ମନୋଜ ମହାନ୍ତି ଥିଲେ। ଏତେ କମ୍ ବୟସର ଶିଶୁଙ୍କଠାରେ ଏଭଳି ଜଟିଳ ଚିକିତ୍ସା ପଦ୍ଧତିରେ ସଫଳତା ମିଳିବା ପ୍ରଥମ ବୋଲି କୁହାଯାଉଛି।
