ଭୁବନେଶ୍ୱର,୫।୧୨(ଶର୍ମିଷ୍ଠା ପାଣିଗ୍ରାହୀ): ମହାପ୍ରଭୁ ଶ୍ରୀଜଗନ୍ନାଥଙ୍କ ଉପରେ ଆସିବ ୨-ଡି ଓଡ଼ିଆ ଆନିମେଶନ ସିରିଜ। ‘ଜୟ ଜଗନ୍ନାଥ’ ନାଁରେ ନାମିତ ଏହି ବିବିଧ ବିଭାଗର ସିରିଜ ବିଶେଷ କରି ଶିଶୁଙ୍କ ମନ ଜିଣିବା ସହ ସାରା ପରିବାରର ଲୋକପ୍ରିୟତା ହାସଲ କରିବା ଆଶା ରହିଛି। ପ୍ରମୁଖ ଅନ୍ତର୍ଜାତୀୟ ଶିଶୁ ଓ ପାରିବାରିକ ମନୋରଞ୍ଜନ ସଂସ୍ଥା ଟୁନିଜ୍ ମିଡିଆ ଗ୍ରୁପ୍ ଏବଂ ଓଡ଼ିଶାର ଆନିମେଶନ କମ୍ପାନୀ ଏଲି ଆନିମେଶନ୍ସର ମିଳିତ ସହଭାଗିତାରେ ଏହି ସିରିଜ୍ ଚାଲିବ। ପ୍ରଭୁ ଶ୍ରୀଜଗନ୍ନାଥ ଓ ଭକ୍ତଙ୍କ ମଧ୍ୟରେ ଥିବା ନିବିଡ଼ି ସମ୍ପର୍କ ଏହି ସରିଜ ମାଧ୍ୟମରେ ଦର୍ଶକ ଦେଖିବାକୁ ପାଇବେ। ବନ୍ଧୁତା, ଭକ୍ତି ଏବଂ ଭାରତର ସମୃଦ୍ଧ ସାଂସ୍କୃତିକ ଐତିହ୍ୟକୁ ଏଥିରେ ଉପସ୍ଥାପନ କରାଯାଇଛି। ଏଥିରେ ଆକ୍ସନ, ହାସ୍ୟରସ ଏବଂ ମଜା ଭରି ରହିଛି। ଏଲି ଆନିମେସନ୍ସର ନିର୍ଦ୍ଦେଶକ ଦୁର୍ଗା ପ୍ରସାଦ ଦଳାଇ କହିଛନ୍ତି, ଜୟ ଜଗନ୍ନାଥକୁ ସାରା ବିଶ୍ୱରେ ଦର୍ଶକଙ୍କ ନିକଟରେ ପହଞ୍ଚାଇବା ପାଇଁ ଟୁନିଜ୍ ମିଡିଆ ଗ୍ରୁପ ସହ ସହଭାଗିତା କରି ଆମେ ଅତ୍ୟନ୍ତ ଆନନ୍ଦିତ। ଆମର ଲକ୍ଷ୍ୟ ହେଉଛି ପ୍ରଭୁ ଜଗନ୍ନାଥଙ୍କ କାହାଣୀର ସମୃଦ୍ଧତାକୁ ଏକ ଆକର୍ଷଣୀୟ ତଥା ସାଂସ୍କୃତିକ ଉପାୟରେ ସମସ୍ତଙ୍କ ପାଖରେ ପହଞ୍ଚାଇବା।
