ସିମୁଳିଆ, ୮।୧୧(ଡି.ଏନ.ଏ.) କଥାରେ ଅଛି ଦୁଃଖ ଯେତେବେଳେ ଆସେ ନିଜର ବନ୍ଧୁ ବାନ୍ଧବଙ୍କୁ ନେଇଆସେ। ଏଭଳି ଏକ ଦୁଃଖର ପାହାଡ ଛିଣ୍ଡିପଡିଛି ବାଲେଶ୍ୱର ଜିଲା ସିମୁଳିଆ ବ୍ଲକ ବଙ୍ଗାଳପୁର ପଞ୍ଚାୟତ ଭଗିଆ ଗ୍ରାମର ଭାରତୀ ଦେବନାଥ(୩୦)ଙ୍କ ପରିବାରରେ। ଗତ ୩ବର୍ଷ ପୂର୍ବେ ତାଙ୍କ ସ୍ବାମୀ ଯଶୋବନ୍ତ ଦୁରାରୋଗରେ ଆଖି ବୁଜିବା ପରେ ଏକମାତ୍ର ୧୦ବର୍ଷର ପୁଅ ସନ୍ତୋଷଙ୍କ ହୃତପିଣ୍ଡରେ ଛିଦ୍ର। ସେ ଏବେ ଜୀବନ ସହ ସଂଘର୍ଷ କରୁଛି। ଡାକ୍ତରଙ୍କ ସୂଚନା ଅନୁସାରେ ସନ୍ତୋଷଙ୍କ ହୃତପିଣ୍ଡରେ ଛିଦ୍ର ହେବା ସହ ଶିରା ପ୍ରଶିରାଗୁଡ଼ିକ ଗୁଡ଼ାଇ ହୋଇରହିଛି। ଫଳରେ ସନ୍ତୋଷ ସାଧାରଣ ପିଲାଙ୍କ ପରି ବୁଲାଚଲା କିମ୍ବା ଖେଳକୁଦ କରିପାରୁନାହାନ୍ତି। ଅଳ୍ପ ରାସ୍ତା ଚାଲିଲେ ଧଇଁସଇଁ ହୋଇଯାଉଛନ୍ତି। ଗତ କିଛି ଦିନ ପୂର୍ବେ ସେ ପାରାଲିସିସରେ ଆକ୍ରାନ୍ତ ହୋଇ ମୁହଁ ବଙ୍କା ମଧ୍ୟ ହୋଇଯାଇଥିଲା। ଏ ସମ୍ପର୍କରେ ଭାରତୀ କହନ୍ତି ପୁଅକୁ ଦୁଇବର୍ଷ ବୟସରୁ ଥଣ୍ଡା ଜ୍ୱର ଆରମ୍ଭ ହୋଇଥିଲା ା ପ୍ରଥମେ ସିମୁଳିଆ ଓ ପରେ ସୋର, ଭଦ୍ରକ, ବାଲେଶ୍ୱର, କଟକ ଶିଶୁ ଭବନରେ ଡାକ୍ତରଙ୍କୁ ଦେଖାଇବାରୁ ପୁଅର ହୃତପିଣ୍ଡରେ ଛିଦ୍ର ଥିବା ଜଣାପଡ଼ିଥିଲା। ତେବେ ବୟସ କମ୍ ଯୋଗୁ ଅପରେଶନ ସମ୍ଭବ ନୁହେଁ ବୋଲି ଡାକ୍ତର କହିବା ସହିତ ୮/୯ ବର୍ଷ ବୟସ ହେଲେ ଅପରେଶନ କରାଯାଇପାରିବ ବୋଲି ପରାମର୍ଶ ଦେଇଥିଲେ। ତେବେ ମାତ୍ର ୧ଗୁଣ୍ଠ ଜମି ତାଙ୍କର ଏକମାତ୍ର ସମ୍ବଳ। ରାଶନ କାର୍ଡରେ ମାସିକ ୩୫ କି.ଗ୍ରା. ଚାଉଳ ଓ ମାସିକ ୫ଶହ ଟଙ୍କା ବିଧବା ଭତ୍ତାରେ ତାଙ୍କ ପରିବାର ଚଳୁଛି। ଅପରେଶନ ପାଇଁ ଅତିକମ୍ରେ ୭ରୁ ୮ଲକ୍ଷ ଟଙ୍କାର ଆବଶ୍ୟକତା ରହିଛି ା ତେବେ ଚିକିତ୍ସା ପାଇଁ ଅର୍ଥ ଆସିବ କେଉଁଠୁ। ସରକାର କିମ୍ବା କୌଣସି ସହୃଦୟ ବ୍ୟକ୍ତି କିମ୍ବା ଅନୁଷ୍ଠାନ ତାଙ୍କୁ ସହଯୋଗର ହାତ ବଢ଼ାଇଲେ ତାଙ୍କ ପୁଅର ଅପରେସନ ହୋଇପାରନ୍ତା ବୋଲି ଭାରତୀ ନିବେଦନ କରିଛନ୍ତି ା ଭାରତୀଙ୍କୁ ମୋବାଇଲ ଫୋନ (ନଂ ୯୮୫୩୬୬୯୫୨୩)ରେ ଯୋଗାଯୋଗ କିମ୍ବା ତାଙ୍କର ସିମୁଳିଆ ଷ୍ଟେଟ ବ୍ୟାଙ୍କ ଆକାଉଣ୍ଟ(ନଂ. ୩୨୦୨୩୮୨୦୬୬୭) ମାଧ୍ୟମରେ ସାହାଯ୍ୟ କରାଯାଇ ପାରିବ ା
