ରସୁଲପୁର/ଯାଜପୁର ଟାଉନ, ୨-୯(ଡିଏନଏ)- ରାଜ୍ୟ ସରକାର ଜନସାଧାରଣଙ୍କ ହିତରେ ୫-ଟି (ଟାଇମ୍, ଟେକ୍ନୋଲୋଜି, ଟିମୱାର୍କ, ଟ୍ରାନ୍ସପାରେନ୍ସି ଓ ଟ୍ରାନ୍ସଫର୍ମରମେଶନ) ଫର୍ମୁଲାରେ କାର୍ଯ୍ୟ କରିବାକୁ ନିର୍ଦ୍ଦେଶ ଦେଇଥିଲେ ମଧ୍ୟ ଏହାର ସୁଫଳ ତୃଣମୂଳସ୍ତରରେ ପହଞ୍ଚି ପାରୁନାହିଁ। କେବଳ ଜିଲା ପ୍ରଶାସନ ସଫଳତାକୁ ପ୍ରଚାର ପ୍ରସାର ଆଳରେ ୫-ଟି ମାନୁ ନ ଥିବା ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାରେ ସୀମିତ ରହିଛି। ସରକାରଙ୍କର ଏହି ଯୋଜନା କେତେଦୂର ସଫଳ ହୋଇଛି ତାହା ଅସହାୟ ବିଧବା ବବି ଦଳାଇଙ୍କ ଘଟଣାରୁ ସ୍ପଷ୍ଟ ଜଣାପଡ଼େ। ଯାଜପୁର ଜିଲା ରସୁଲପୁର ବ୍ଲକ ଅର୍ଥଗାଁ ପଞ୍ଚାୟତ ବଡଚଅପୋଇ ଗ୍ରାମର ଅସହାୟ ମହିଳା ବବି ଜିଲାରୁ ବ୍ଲକ ପର୍ଯ୍ୟନ୍ତ ଦୌଡ଼ାଦୌଡ଼ି କରି ବି ଏଯାଏ ସ୍ବାମୀଙ୍କ ମୃତ୍ୟୁ ପ୍ରମାଣପତ୍ର ହାସଲ କରିବାରେ ବିଫଳ ହୋଇଛନ୍ତି। ଯାହାକି ପ୍ରଶାସନର କାର୍ଯ୍ୟ ଦକ୍ଷତା ଓ କାର୍ଯ୍ୟରେ ସ୍ବଚ୍ଛତା ପ୍ରତି ଅଙ୍ଗୁଳି ନିର୍ଦ୍ଦେଶ କରୁଛି।
ପ୍ରକାଶ ଯେ, ବବିଙ୍କ ସ୍ବାମୀ ଅଜିତ୍ ଦଳାଇ ୫ ଏପ୍ରିଲ,୨୦୧୯ରେ ଋଣବୋଝ ସହି ନ ପାରି ଆତ୍ମହତ୍ୟା କରିଥିଲେ। ଏ ସମ୍ପର୍କରେ ଯାଜପୁର ସଦର ଥାନାରେ ଏକ ମାମଲା (ନଂ-୦୪/୧୯) ରୁଜୁ ହୋଇଥିଲା। ଯାଜପୁର ଜିଲା ମୁଖ୍ୟ ଚିକିତ୍ସାକେନ୍ଦ୍ରରେ ବ୍ୟବଚ୍ଛେଦ କରାଯାଇ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରାଯାଇଥିଲା। ଏହି ଘଟଣାକୁ ୬ମାସ ପୂରିବ; କିନ୍ତୁ ଏପର୍ଯ୍ୟନ୍ତ ବବିଙ୍କୁ ସ୍ବାମୀଙ୍କ ମୃତ ପ୍ରମାଣପତ୍ର ଖଣ୍ଡିଏ ମିଳିପାରିଲା ନାହିଁ। ଏହାଛଡ଼ା ସ୍ବାମୀଙ୍କ ମୃତ୍ୟୁ ପରେ ବବି ମାନସିକ ଭାରସାମ୍ୟ ହରାଇ ବସିଛନ୍ତି। ପଡୋଶୀଙ୍କ ସହାୟତାରେ ମୃତ୍ୟୁ ପ୍ରମାଣପତ୍ରଟିଏ ପାଇବା ପାଇଁ ବବିଙ୍କୁ ୫୦୦ଟଙ୍କା ଖର୍ଚ୍ଚ କରିବାକୁ ପଡିଛି। ତଥାପି ସ୍ବାମୀଙ୍କ ମୃତ୍ୟୁ ପ୍ରମାଣପତ୍ର ମିଳିପାରୁ ନାହିଁ। ଅପମୃତ୍ୟୁ ଘଟଣାକୁ ନେଇ ପୋଲିସ ନିକଟରୁ ଫର୍ମ-୩ରେ ରିପୋର୍ଟ ଆସିବାପରେ ମୃତ୍ୟୁ ପ୍ରମାଣପତ୍ର ଇସ୍ୟୁ କରାଯିବ ବୋଲି ମଧୁବନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଜନ୍ମ ଓ ମୃତ୍ୟୁ ପଞ୍ଜିକରଣ ଅଧିକାରୀ ପ୍ରସନ୍ନ କୁମାର ପାତ୍ର ମତ ରଖିଛନ୍ତି ା ଏ ନେଇ ଯାଜପୁର ସଦର ଥାନାଧିକାରୀ ବଂଶୀଧର ବେହେରାଙ୍କୁ ପଚାରିବାରୁ, ମୃତକଙ୍କ ପରିବାର ଲୋକ ଯାଜପୁର ପୌରପରିଷଦ କାର୍ଯ୍ୟାଳୟରୁ ଫର୍ମ-୩ ଆଣି ଥାନାରେ ଦେବା ପରେ ରିପୋର୍ଟ ପ୍ରଦାନ କରାଯିବ। ଏଥିସହ ଥାନାରୁ ରିପୋର୍ଟ ସହ ଶବ ବ୍ୟବଚ୍ଛେଦ ରିପୋର୍ଟ ଯୋଗ କରାଯାଇ ଦିଆଯିବ। ଉକ୍ତ ରିପୋର୍ଟ ଆଧାରରେ ମୃତକ ପରିବାରକୁ ପ୍ରମାଣପତ୍ର ଓ ଅନ୍ୟାନ୍ୟ ମୃତ୍ୟୁକାଳୀନ ସହାୟତା ମିଳିପାରିବ ବୋଲି ପ୍ରକାଶ କରିଛନ୍ତି। ଅପରପକ୍ଷେ ଆଜି ବି ଏହି ପରିବାର ଭଙ୍ଗା କୁଡ଼ିଆରେ ବସବାସ କରୁଛନ୍ତି। ସେମାନଙ୍କ ପାଇଁ ପ୍ରଧାନମନ୍ତ୍ରୀ ଆବାସ ଓ ବିଜୁ ପକ୍କାଘର ଯୋଜନା ଅପହଞ୍ଚ ହୋଇଛି। ଏ ଦିଗରେ ପ୍ରଶାସନିକ ଅଧିକାରୀଙ୍କ କାର୍ଯ୍ୟରେ ସ୍ବଚ୍ଛତାକୁ ନେଇ ସାଧାରଣରେ ସନ୍ଦେହ ଉପୁଜିଛି। ଏସବୁ ବାଦ୍ ମହିଳାଙ୍କ ୮ବର୍ଷର ପୁଅ ଜନ୍ମରୁ ଦିବ୍ୟାଙ୍ଗ ଓ ୧୧ବର୍ଷର ଝିଅ ପୁଷ୍ଟିହୀନତାର ଶିକାର ହୋଇଛନ୍ତି ା ଉଭୟ ପଞ୍ଚାୟତରେ ମାଳିଉଚ୍ଚ ପ୍ରାଥମିକ ବିଦ୍ୟାଳୟର ତୃତୀୟ ଶ୍ରେଣୀରେ ପାଠ ପଢୁଛନ୍ତି। ଦିବ୍ୟାଙ୍ଗ ପ୍ରମାଣପତ୍ର ଥାଇ ବି ଶିଶୁପୁତ୍ରକୁ ଭତ୍ତା ମିଳି ନାହିଁ। ଏସବୁ ଘଟଣା ଶିଶୁ ସୁରକ୍ଷା ଅଧିକାରୀଙ୍କ ଦୃଷ୍ଟି ଆଡୁଆଳରେ ରହିଯାଇଛି। ଏହିଭଳି ନାନା ସମସ୍ୟା ଦେଇ ଗତି କରୁଥିବା ଅନୁସୂଚିତ ଜାତିର ଏହି ପରିବାର ନିକଟରେ ୩୬ନଂ ଜୋନ୍ର ଜିଲାପରିଷଦ ସଦସ୍ୟ ଚତୁର୍ଭୁଜ ଦ୍ୱିବେଦୀ ପହଞ୍ଚତ୍ ଥିଲେ। ମହିଳାଙ୍କ ଦୁଃଖ ଶୁଣିବା ପରେ ସୋମବାର ସେ ଯାଜପୁର ଜିଲା ସହକାରୀ ଚିକିତ୍ସାଧିକାରୀ, ଜିଲା ସମାଜ ମଙ୍ଗଳ ଅଧିକାରୀ, ଜିଲା ଶିଶୁ ସୁରକ୍ଷା ଅଧିକାରୀ, ରସୁଲପୁର ବିଡିଓଙ୍କୁ ପତ୍ର ଜରିଆରେ ଜଣାଇଛନ୍ତି।
