ସିଓଲ: କିଛି ଜିନିଷ ହାସଲ କରିବାକୁ ହେଲେ ସେଥିପାଇଁ ଧୈର୍ଯ୍ୟ ରଖିବାକୁ ହୁଏ। ହେଲେ ୪ରୁ ୫ଥର କିମ୍ବା ୮ରୁ ୯ଥର ପ୍ରୟାସ କରିବା ପରେ ଯଦି ସେହି ଜିନିଷ ନ ମିଳେ, ସେତେବେଳେ ଆମେ ତା’ର ପାଇବା ଆଶା ଛାଡ଼ିଦେଉ। ହେଲେ ଏପରି ଜଣେ ମହିଳା ଅଛନ୍ତି, ଯାହାଙ୍କ ଧୈଯ୍ୟ ବହୁତ। ସାଉଥ୍ କୋରିଆର ୬୯ ବର୍ଷୀୟା ମହିଳା ଚା ସାସୁନ୍ଙ୍କୁ ଡ୍ରାଇଭିଂ ଲାଇସେନ୍ସ ପାଇବାକୁ ୧୮ ବର୍ଷ ଅପେକ୍ଷା କରିବାକୁ ପଡ଼ିଲା। ହେଲେ ଆପଣ ଜାଣିଲେ ଆଶ୍ଚର୍ଯ୍ୟ ହେବେ, ମହିଳାଙ୍କୁ ଏହି ୧୮ ବର୍ଷ ମଧ୍ୟରେ ୯୬୦ ଥର ଟେଷ୍ଟ ଦେବାକୁ ପଡ଼ିଛି। ରିପୋର୍ଟ ଅନୁସାରେ, ପରିବା ବିକ୍ରି କରିବାକୁ ଉକ୍ତ ମହିଳାଙ୍କୁ ଡ୍ରାଇଭିଂ ଲାଇସେନ୍ସର ଆବଶ୍ୟକତା ଥିଲା। ସେଥିପାଇଁ ସେ ୨୦୦୫ ଏପ୍ରିଲରେ ପ୍ରଥମଥର ଡ୍ରାଇଭିଂ ଟେଷ୍ଟ ଦେଇଥିଲେ। ହେଲେ ସେଥିରେ ଫେଲ୍ ହୋଇଥିଲେ। ସେ ଧୈର୍ଯ୍ୟ ନ ହରାଇ ସପ୍ତାହରେ ୫ଥର ଯାଇ ଟେଷ୍ଟ ଦେବାକୁ ଲାଗିଲେ। ଏହିପରି ତାଙ୍କୁ ୩ ବର୍ଷ ମଧ୍ୟରେ ମୋଟ ୭୮୦ ଥର ଟେଷ୍ଟ ଦେବାକୁ ପଡ଼ିଛି। ଏହାପରେ ସେ ସପ୍ତାହକୁ ୨ ଥର ଟେଷ୍ଟ ଦେବାକୁ ଗଲେ। ଏହିଭଳି ୯୬୦ ଥର ଡ୍ରାଇଭିଂ ଟେଷ୍ଟ ଦେବା ପରେ ଯାଇ ତାଙ୍କୁ ନିକଟରେ ଲାଇସେନ୍ସ ମିଳିଛି। ଏହି ୧୮ ବର୍ଷ ମଧ୍ୟରେ ତାଙ୍କୁ ୧୧ହଜାର ପାଉଣ୍ଡ(ଭାରତୀୟ ମୁଦ୍ରାରେ ୧୧ ଲକ୍ଷ ଟଙ୍କାରୁ ଊର୍ଦ୍ଧ୍ୱ) ଖର୍ଚ୍ଚ କରିବାକୁ ପଡ଼ିଥିଲା। ଏହି ଖବର ପ୍ରଚାରିତ ହେବା ପରେ ସାଉଥ୍ କୋରିଆର ହ୍ୟୁଣ୍ଡାଇ କାର୍ ମାନୁଫ୍ୟାକ୍ଚରର ତାଙ୍କୁ ଏକ ନୂଆ ଗାଡ଼ି ଉପହାର ଆକାରରେ ଦେଇଥିଲେ, ଯାହାର ଦାମ୍ ୧୧,୬୪୦ ପାଉଣ୍ଡ(ଭାରତୀୟ ମୁଦ୍ରାରେ ୧୧ ଲକ୍ଷ ୫୦ ହଜାର ଟଙ୍କାରୁ ଊର୍ଦ୍ଧ୍ୱ)ବୋଲି ଜଣାପଡ଼ିଛି।
