କାବୁଲ, ୧୨।୮: ଆଫଗାନିସ୍ତାନରୁ ଆମେରିକା ସୈନ୍ୟ ପ୍ରତ୍ୟାହାର ପରେ ତାଲିବାନ ଆତଙ୍କବାଦୀମାନେ ଅଧିକାଂଶ ଗ୍ରାମାଞ୍ଚଳକୁ ଅକ୍ତିଆର କରିବା ପରେ ଏବେ ବିଭିନ୍ନ ପ୍ରାଦେଶିକ ରାଜଧାନୀ କବ୍ଜା କରିବା ଆରମ୍ଭ କରିଛନ୍ତି। ସପ୍ତାହେରୁ କମ୍ ସମୟ ମଧ୍ୟରେ ସେମାନେ ୯ ପ୍ରାଦେଶିକ ରାଜଧାନୀ ଦଖଲ କରିସାରିଲେଣି। ଆଫଗାନିସ୍ତାନ ରାଷ୍ଟ୍ରପତି ଅଶ୍ରଫ୍ ଗନି ବୁଧବାର ମଜାର-ଇ-ସରିଫ୍ରେ ପହଞ୍ଚତ୍ ସଙ୍କଟଗ୍ରସ୍ତ ସୈନ୍ୟବାହିନୀକୁ ଏକାଠି କରିବା ପାଇଁ ଉଦ୍ୟମ କରୁଛନ୍ତି। ଦେଶର ଏକ-ଚତୁର୍ଥାଂଶରୁ ଊର୍ଦ୍ଧ୍ୱ ପ୍ରାଦେଶିକ ରାଜଧାନୀ ତାଲିବାନ ଆତଙ୍କବାଦୀଙ୍କ କବଳକୁ ଯାଇସାରିଲାଣି। କୁଣ୍ଡୁଜ୍ରେ ଶତାଧିକ ଆଫଗାନ ସୈନ୍ୟ ଗଣଆତ୍ମସମର୍ପଣ କରିଥିବା ଜଣାପଡ଼ିଛି। ଆତ୍ମସମର୍ପଣ କରିବା ବ୍ୟତୀତ ସେମାନଙ୍କ ପାଖରେ ଅନ୍ୟ ଉପାୟ ନାହିଁ ବୋଲି ଜଣେ ସେନା ଅଧିକାରୀ ନିଜର ପରିଚୟ ନ ଦେଇ ଗଣମାଧ୍ୟମକୁ କହିଛନ୍ତି।
ମଜାରରେ ପହଞ୍ଚତ୍ ଗନି ସହରଗୁଡ଼ିକର ସୁରକ୍ଷା ପାଇଁ ସ୍ଥାନୀୟ ଷ୍ଟ୍ରଙ୍ଗ୍ମ୍ୟାନ ଆଟ୍ଟା ମହମ୍ମଦ ନୂର୍ ଏବଂ ଦୁର୍ଦ୍ଧର୍ଷ ସେନାପତି ଅବ୍ଦୁଲ୍ ରଶିଦ୍ ଡୋଷ୍ଟୁମଙ୍କ ସହ ଆଲୋଚନା ଚଳାଇଛନ୍ତି। ତାଲିବାନ ବିରୋଧୀ ମିଲିସିଆଙ୍କ ଆଡ୍ଡା କୁହାଯାଉଥିବା ମଜାର ଯଦି ଆତଙ୍କବାଦୀଙ୍କ ଦଖଲକୁ ଚାଲିଯାଏ, ତେବେ ଆଫଗାନ୍ ସରକାରଙ୍କ ପାଇଁ ମରଣାନ୍ତକ ଝଟ୍କା ହେବ ଏବଂ ଉତ୍ତର ଆଫଗାନିସ୍ତାନ ଉପରୁ ସରକାରଙ୍କ ନିୟନ୍ତ୍ରଣ ସମ୍ପୂର୍ଣ୍ଣ ଭୁଶୁଡ଼ି ପଡ଼ିବ।
ଆମେରିକା ଓ ନାଟୋ ସେନା ପ୍ରତ୍ୟାହାର ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚତ୍ଥିବାବେଳେ ତାଲିବାନ ଆତଙ୍କବାଦୀ ଦେଶର ପ୍ରାୟ ଦୁଇତୃତୀୟାଂଶକୁ ନିଜ ନିୟନ୍ତ୍ରଣକୁ ନେଇସାରିଲେଣି। ସେମାନେ ଆଉ ୩ଟି ପ୍ରାଦେଶିକ ରାଜଧାନୀ ସମେତ ଉତ୍ତରପୂର୍ବାଞ୍ଚଳରେ ଥିବା ସ୍ଥାନୀୟ ସେନା ମୁଖ୍ୟାଳୟକୁ କବ୍ଜା କରିଥିବା ଜଣେ ଅଧିକାରୀ ବୁଧବାର କହିଛନ୍ତି। ବଡ଼ଖଶାନ, ବାଘଲାନ ଏବଂ ଫାରାହ ପ୍ରଦେଶର ରାଜଧାନୀ ତାଲିବାନ ଦଖଲକୁ ଯିବା ପରେ ତାଲିବାନ ସରକାରଙ୍କ ଉପରେ ଅଧିକ ଚାପ ପଡ଼ିଛି। ଆତଙ୍କବାଦୀଙ୍କଠାରୁ କାବୁଲ ପ୍ରତି ସିଧା ବିପଦ ସୃଷ୍ଟି ହୋଇ ନ ଥିଲେ ମଧ୍ୟ ସେମାନେ ଯେଉଁଭଳି ଗୋଟିଏ ପରେ ଗୋଟିଏ ପ୍ରାଦେଶିକ ରାଜଧାନୀ ଦଖଲ କରିଚାଲିଛନ୍ତି, ଆଫଗାନ ସରକାର ଦେଶକୁ କେତେଦିନ ନିଜ ନିୟନ୍ତ୍ରଣରେ ରଖିପାରିବେ ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ତାଲିବାନ ଆତଙ୍କବାଦୀଙ୍କ ମୁକାବିଲା କରି ନ ପାରି ନିୟମିତ ସୈନ୍ୟ ଯୁଦ୍ଧକ୍ଷେତ୍ରରୁ ଛତ୍ରଭଙ୍ଗ ଦେଉଛନ୍ତି। ହିଂସାକାଣ୍ଡ ଭୟରେ ହଜାର ହଜାର ସାଧାରଣ ଜନତା ରାଜଧାନୀକୁ ପଳାଇଯାଉଛନ୍ତି। ଆମେରିକା ପକ୍ଷରୁ କେତେକ ଏୟାରଷ୍ଟ୍ରାଇକ୍ କରାଯାଇଥିଲେ ମଧ୍ୟ ଏହାର ସୈନ୍ୟ ପ୍ରତ୍ୟକ୍ଷ ଲଢ଼େଇରେ ସାମିଲ ହେଉନାହାନ୍ତି।
ସହରରେ ତାଲିବାନ ଆତଙ୍କବାଦୀମାନେ ରାସ୍ତାରେ ଜଣେ ଆଫଗାନ ସୈନ୍ୟଙ୍କ ରକ୍ତ ଜୁଡୁବୁଡ଼ୁ ମୃତଦେହକୁ ଘୋଷାଡ଼ୁଥିବା ଦେଖାଯାଇଛି। ଆତଙ୍କବାଦୀମାନେ ଏମ୍-୧୬ ରାଇଫଲ, ହମ୍ଭି ଏବଂ ଫୋର୍ଡ ପିକ୍ଅପ୍ ଟ୍ରକ୍ ବ୍ୟବହାର କରୁଛନ୍ତି। ଏଗୁଡ଼ିକୁ ଆମେରିକା ଆଫଗାନିସ୍ତାନକୁ ଯୋଗାଇଥିଲା।
ମୋଟ ୩୪ ପ୍ରଦେଶ ରହିଥିବାବେଳେ ସେଥିରୁ ୯ଟିର ରାଜଧାନୀକୁ ତାଲିବାନ ଦଖଲ କରିନେଇଛି। ମେ’ ମାସରୁ ତାଲିବାନ ଆତଙ୍କବାଦୀ ସୀମାନ୍ତ ଗ୍ରାମାଞ୍ଚଳଗୁଡ଼ିକ ଉପରେ ଆକ୍ରମଣ ଆରମ୍ଭ କରିଥିବାବେଳେ ଗତ ୬ ତାରିଖରେ ନିମ୍ରୁଜ୍ ପ୍ରଦେଶର ରାଜଧାନୀ ଜରଙ୍ଗ ଦଖଲ କରିଥିଲେ। ତାଲିବାନ କବଳକୁ ଯିବାରେ ଏହା ଥିଲା ପ୍ରଥମ ପ୍ରାଦେଶିକ ରାଜଧାନୀ। ୭ ତାରିଖରେ ସେମାନେ ଜଜାନ୍ ପ୍ରଦେଶର ରାଜଧାନୀ ଶେବେରଘାନ ଦଖଲ କରିଥିବା ଘୋଷଣା କରିଥିଲେ। ୮ ତାରିଖରେ ଶେର୍-ଇ-ପୁଲ୍ ତାଲିବାନ ଅକ୍ତିଆରକୁ ଯାଇଥିଲା। ସେହିଦିନ କୁନ୍ଦୁଜ୍ ପ୍ରଦେଶ ରାଜଧାନୀ କୁନ୍ଦୁଜ୍ ସହର ଏବଂ ତଖର ପ୍ରଦେଶ ରାଜଧାନୀ ତାଲୁକାନ୍ ସହରକୁ ତାଲିବାନ ଦଖଲ କରିଥିଲା। ୯ରେ ଆତଙ୍କବାଦୀମାନେ ସାମଙ୍ଗାନ ପ୍ରଦେଶ ରାଜଧାନୀ ଆଏବାକ୍କୁ କବ୍ଜା କରିଥିବାବେଳେ ୧୦ରେ ଫାରାହ ପ୍ରଦେଶ ରାଜଧାନୀ ଫାରାହ ସହର ଏବଂ ବାଘଲାନ୍ ପ୍ରଦେଶ ରାଜଧାନୀ ପୁଲ୍-ଇ-ଖୁମ୍ରି ସେମାନଙ୍କ ନିୟନ୍ତ୍ରଣକୁ ଯାଇଥିଲା। ୧୧ ତାରିଖରେ ବଡ଼ଖ୍ଶାନ ପ୍ରଦେଶ ରାଜଧାନୀ ଫଇଜାବାଦକୁ ତାଲିବାନ ଦଖଲ କରିଛି। ଏହା ବ୍ୟତୀତ ହାରାତ, ଲଶ୍କର ଗାହ ଏବଂ କାନ୍ଦାହାର ଦଖଲ ପାଇଁ ଆତଙ୍କବାଦୀମାନେ ଲଢ଼େଇ ଜାରି ରଖିଛନ୍ତି।
