ପୁରୀ ଅଫିସ, ୨୪ା୧୨:କରୋନା ଯୋଗୁ ଗତ ୯ ମାସ ଧରି ବନ୍ଦ ରହିଥିବା ଶ୍ରୀମନ୍ଦିର ବୁଧବାର ଖୋଲିଛି। ଭକ୍ତଙ୍କୁ ମହାପ୍ରଭୁ ଦର୍ଶନ ଦେଇଛନ୍ତି। ଫଳରେ ଦୀର୍ଘ ପ୍ରତୀକ୍ଷାର ଅବସାନ ଘଟିଛି। ପୁରୀ ଜିଲା ପ୍ରଶାସନର ଏସ୍ଓପି (ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର) ଅନୁଯାୟୀ ପ୍ରଥମ ପର୍ଯ୍ୟାୟରେ ସେବାୟତ ପରିବାରର ସଦସ୍ୟମାନେ ଦାରୁଦିଅଁଙ୍କ ଦର୍ଶନ କରିଛନ୍ତି।
ଶ୍ରୀମନ୍ଦିର ଦ୍ୱାର ଭୋର ୪ଟା ୫୦ରେ ଖୋଲିଥିବାବେଳେ ୫ଟା ୪୦ରେ ମଇଲମ ସରିଥିଲା। ସକାଳ ୭ଟା ୩୦ରୁ ଚତୁର୍ଦ୍ଧାବିଗ୍ରହଙ୍କ ଦର୍ଶନ ଆରମ୍ଭ ହୋଇଥିଲା। ସେବାୟତ ପରିବାରର ସଦସ୍ୟମାନେ ଶ୍ରୀମନ୍ଦିରର ୪ ଦ୍ୱାର ଦେଇ ପ୍ରବେଶ କରିଥିଲେ। ପ୍ରବେଶ ଦ୍ୱାରରେ ଥର୍ମାଲ ସ୍କ୍ରିନିଂ ସହ ପରିଚୟପତ୍ର ଯାଞ୍ଚ କରାଯାଇ ଭିତରକୁ ଛଡ଼ାଯାଇଥିଲା। କାଳିଆ ଠାକୁରଙ୍କ ଦର୍ଶନ କରି ସେବାୟତ ପରିବାର ଲୋକେ ଭାବ ବିହ୍ବଳ ହୋଇପଡ଼ିଥିଲେ। ଅନ୍ୟପକ୍ଷରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ନୂଆ ଏସ୍ଓପି (ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର) ଜାରି କରାଯାଇଛି। ନୂତନ ଏସ୍ଓପି ଅନୁଯାୟୀ, ବଡ଼ଦେଉଳ ଭିତରେ ଶ୍ରଦ୍ଧାଳୁମାନେ ଦୀପ ଲଗାଇପାରିବେ ନାହିଁ। ସେହିପରି କେହି ସାଙ୍ଗରେ ଫୁଲ, ଭୋଗ କିମ୍ବା କୌଣସି ପୂଜା ସାମଗ୍ରୀ ନେଇ ମନ୍ଦିରକୁ ଯିବେ ନାହିଁ। ମନ୍ଦିର ଭିତରେ ମଧ୍ୟ ଅବଢ଼ା ସେବନ କରିପାରିବେ ନାହିଁ। ଜଗନ୍ନାଥ ବଲ୍ଲଭ କିମ୍ବା ପ୍ରଶାସନ ଦ୍ୱାରା ସୂଚିତ ସ୍ଥାନରେ ବାଇକ ଓ କାର୍ ପାର୍କିଂ କରିବେ। ଅନ୍ୟଥା ଜରିମାନା ଦେବାକୁ ପଡ଼ିବ। ମନ୍ଦିର ଭିତରେ ମାସ୍କ ପରିଧାନ, ସାନିଟାଇଜ ଓ ସାମାଜିକ ଦୂରତାକୁ ବାଧ୍ୟତାମୂଳକ କରାଯାଇଛି। ଜାନୁୟାରୀ ୩ରୁୁ ସାଧାରଣ ଦର୍ଶନ ଆରମ୍ଭ ହେବ। ଏଥିଲାଗି ସକାଳ ୮ଟାରୁ ମାର୍କେଟ ଛକ ବ୍ୟାରିକେଡ୍ ଖୋଲାଯିବ। ଦର୍ଶନ ଆଶାୟୀମାନେ ସାଙ୍ଗରେ କୋଭିଡ୍ ନେଗେଟିଭ୍ ରିପୋର୍ଟ ଆଣିବେ। ତାହା ଗତ ୯୬ ଘଣ୍ଟା ଅର୍ଥାତ୍ ୪ଦିନ ମଧ୍ୟରେ ହୋଇଥିବା ଦରକାର। ନଚେତ୍ କୋଭିଡ୍ ରିପୋର୍ଟ ଗ୍ରହଣ ଯୋଗ୍ୟ ହେବନାହିଁ। ପରିଚୟ ପତ୍ର ଯାଞ୍ଚ କରି ଦର୍ଶନ ଅନୁମତି ଦିଆଯିବ। ସେହିଭଳି ସ୍ଥାନୀୟ ଲୋକଙ୍କ ପାଇଁ ମାର୍କେଟ ଛକ ବ୍ୟାରିକେଡ୍ ସକାଳ ୭ଟାରୁ ଖୋଲିବ। ସେମାନଙ୍କୁ ପୂର୍ବରୁ ମିଳିଥିବା ଟୋକନ୍ ଓ ପରିଚୟପତ୍ର ଦେଖାଇ ଦର୍ଶନ କରିବେ। ସେହିଭଳି ସ୍ଥାନୀୟ ପଞ୍ଜୀକରଣ ପାଇଁ ସ୍ବତନ୍ତ୍ର ଫଟୋଉଠା ବ୍ୟବସ୍ଥା ହୋଇଛି। ଉଲ୍ଲେଖଯୋଗ୍ୟ, ଆସନ୍ତା ୨୬ରୁ ପୁରୀ ସହରବାସୀ ଓ ଜାନୁୟାରୀ ୩ରୁ ସାର୍ବଜନୀନ ଦର୍ଶନ ହେବ।
