ଭୁବନେଶ୍ୱର,୨୫।୬(ଅଭିଜିତ ଦାସ)ବାଲେଶ୍ୱର ବାହାନଗା ଟ୍ରେନ୍ ଦୁର୍ଘଟଣାକୁ ରବିବାର ୨୨ଦିନ ବିତିଯାଇଲେ ମଧ୍ୟ ଏବେ ସୁଦ୍ଧା ୮୧ ମୃତଦେହ ଚିହ୍ନଟ ହୋଇପାରିନାହିଁ। ବର୍ତ୍ତମାନ ସମସ୍ତ ମୃତଦେହକୁ ଏମ୍ସ ପରିସରରେ ୩ଟି କଣ୍ଟେନର ମଧ୍ୟରେ ସଂରକ୍ଷଣ କରି ରଖାଯାଇଛି। ମୃତଦେହ ଚିହ୍ନଟର ଶେଷ ବିକଳ୍ପ ଭାବେ ଡିଏନ୍ଏ ଟେଷ୍ଟ ପ୍ରକ୍ରିୟା ଚାଲିଛି। ଏପରିସ୍ଥିତିରେ ଦାବିଦାରଙ୍କ ସଂଖ୍ୟା ମଧ୍ୟ ବଢ଼ି ଚାଲିଛି। ପରିବାର ଲୋକେ ମୃତଦେହ ନେବାଲାଗି ଅପେକ୍ଷା କରି ରହିଥିବାବେଳେ ଡିଏନ୍ଏ ରିପୋର୍ଟକୁ ନେଇ ବିଳମ୍ବ ହେଉଥିବାରୁ ବିବାଦ ବଢୁଛି।
ଗତ ଜୁନ୍ ୨ ରାତିରେ ଘଟିଥିବା ଏହି ଭୟଙ୍କର ଟ୍ରେନ୍ ଦୁର୍ଘଟଣାରେ ଘଟଣାସ୍ଥଳରେ ୨୮୮ ଜଣଙ୍କ ମୃତ୍ୟୁ ହୋଇଥିଲା। ଚିହ୍ନଟ ଓ ହସ୍ତାନ୍ତର ଲାଗି ବିଭିନ୍ନ ପର୍ଯ୍ୟାୟରେ ୧୬୨ଟି ମୃତଦେହ ଏମ୍ସ ପରିସରକୁ ଅଣାଯାଇଥିବାବେଳେ ୮୧ ମୃତଦେହ ଚିହ୍ନଟ କରାଯାଇ ସେମାନଙ୍କ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିଲା। ବାକି ୮୧ଟି ମୃତଦେହଗୁଡିକୁ ହସ୍ତାନ୍ତର ପ୍ରକ୍ରିୟାବେଳେ ଦାବିଦାରଙ୍କ ସଂଖ୍ୟା ବଢିବାରୁ ଦ୍ୱନ୍ଦ୍ୱ ସୃଷ୍ଟି ହୋଇଥିଲା। ତେଣୁ ଶେଷ ବିକଳ୍ପ ଭାବେ ଡିଏନ୍ଏ ପଦ୍ଧତିକୁ ଆପଣା ଯାଇ ଡିଏନ୍ଏ ନମୁନା ସଂଗ୍ରହ ପ୍ରକ୍ରିୟା ଜାରି ରହିଛି। ଘଟଣାର ୨୨ଦିନ ପରେ ବି ମଧ୍ୟ ଦାବିଦାର ମାନେ ଏମ୍ସ ପରିସରରେ ଡିଏନ୍ଏ ନମୁନା ଦେଉଛନ୍ତି, ଯାହାକି ବର୍ତ୍ତମାନ ସମୟରେ ଏମ୍ସ କର୍ତ୍ତୁପକ୍ଷଙ୍କ ଲାଗି ଚିନ୍ତାର ବିଷୟ ପାଲଟିଛି। କର୍ତ୍ତୃପକ୍ଷଙ୍କ ସୂଚନା ଅନୁଯାୟୀ ପୂର୍ବରୁ ମୃତକଙ୍କ ପରିବାର ଲୋକଙ୍କଠାରୁ ସଂଗ୍ରହ କରାଯାଇଥିବା ନମୁନା ମଧ୍ୟରୁ ପ୍ରଥମ ପର୍ଯ୍ୟାୟରେ ୨୯ଟି ନମୁନା ଡିଏନ୍ଏ ଟେଷ୍ଟିଂ ନିମନ୍ତେ ଦିଲ୍ଲୀ ପଠାଯାଇଥିବାବେଳେ ଦ୍ୱିତୀୟ ପର୍ଯ୍ୟାୟରେ ଆଉ ୪୯ଟି ପଠାଯାଇଥିଲା। ଇତିମଧ୍ୟରେ ଗତ ଦୁଇ ଦିନମଧ୍ୟରେ ପୁଣି ୬ଟି ନମୁନା ସଂଗ୍ରହ କରାଯାଇ ଦିଲ୍ଲୀ ପଠାଯାଇଛି। ଗୋଟାଏ ପଟେ ଦାବିଦାରଙ୍କ ସଂଖ୍ୟା ବଢୁଥିବାବେଳେ ଅନ୍ୟପଟେ ରିପୋର୍ଟ ଆସିବାରେ ବିଳମ୍ବ ହେଉଥିବାରୁ ଏବେ ମୃତଦେହ ମିଳିବାକୁ ନେଇ ଆଶଙ୍କାରେ ମୃତକଙ୍କ ପରିବାର ଲୋକେ।
ଏନେଇ ଏମ୍ସ ସୁପରିଣ୍ଟେଣ୍ଡେଣ୍ଟ ତଥା ଆନାଟୋମି ବିଭାଗର ପ୍ରଫେସର ପ୍ରଭାସ ରଞ୍ଜନ ତ୍ରିପାଠୀ କହିଛନ୍ତି, ବର୍ତ୍ତମାନ କଣ୍ଟେନରରେ ୮୧ଟି ମୃତଦେହ ଥିବାବେଳେ ୮୪ ଜଣ ଦାବିଦାରଙ୍କ ଡିଏନ୍ଏ ନମୁନା ସଂଗ୍ରହ କରାଯାଇଛି। ଆଗକୁ ମଧ୍ୟ ଡିଏନ୍ଏ ନମୁନା ସଂଖ୍ୟା ବଢିପାରେ। ସମସ୍ତ ଡିଏନ୍ଏ ନମୁନାଗୁଡିକ ଟେଷ୍ଟିଂ ନିମନ୍ତେ ଦିଲ୍ଲୀ ପଠାଯାଇଛି। ସାଧାରଣତଃ ଡିଏନ୍ଏ ଟେଷ୍ଟିଂରେ ଏକମାସ କିମ୍ବା ଅଧିକ ସମୟ ଲାଗିଥାଏ। କିନ୍ତୁ ଏଠାରେ ଗୋଟାଏ ମୃତ ଲାଗି ୪ରୁ ୫ଟି ପରିବାର ଦାବିଦାର ଅଛନ୍ତି। ରିପୋର୍ଟ ଆସିଲେ ମୃତକଙ୍କ ପରିବାର ଲୋକଙ୍କୁ ହସ୍ତାନ୍ତର ପ୍ରକ୍ରିୟା ଆରମ୍ଭ ହେବ। ଉଭୟ ରାଜ୍ୟ ସରକାର ଓ ରେଳ ବିଭାଗ ତରଫରୁ ଦାବିଦାରଙ୍କ ମୃତଦେହକୁ ସେମାନଙ୍କ ଠିକଣା ସ୍ଥାନରେ ପହଞ୍ଚାଇ ଦେବାର ମଧ୍ୟ ବ୍ୟବସ୍ଥା କରାଯାଇଛି।
