ଢେଙ୍କାନାଳ ଅଫିସ, ୧୯ ।୨
ପ୍ରଥମ ପର୍ଯ୍ୟାୟ ପଞ୍ଚାୟତ ଭୋଟରେ ରାଜନୈତିକ ହିଂସାକୁ ନେଇ ଚର୍ଚ୍ଚାର ଶିରୋନାମା ପାଲଟିଥିବା ଢେଙ୍କାନାଳ ଜିଲାରେ ଶୁକ୍ରବାର ଅନୁଷ୍ଠିତ ଦ୍ୱିତୀୟ ପର୍ଯ୍ୟାୟ ମତଦାନ ଶୃଙ୍ଖଳାର ସହ ଶେଷ ହୋଇଛି। ଢେଙ୍କାନାଳ ସଦର ବ୍ଲକରେ ୮୧.୭୩% ଏବଂ ଓଡ଼ାପଡ଼ା ବ୍ଲକରେ ୮୦.୪୩% ମତଦାନ ହୋଇଛି। ତେବେ ରାଜସ୍ବ ଗ୍ରାମ ମାନ୍ୟତା ଦାବି ପୂରଣରେ ପ୍ରଶାସନିକ ଉଦାସୀନତା ପ୍ରତିବାଦରେ ବେଲଟିକିରି ପଞ୍ଚାୟତର ଦୁର୍ଗାପ୍ରସାଦ ଗ୍ରାମବାସୀ ଭୋଟ ବର୍ଜନ କରିଛନ୍ତି। ସେହିପରି ପ୍ରଦୂଷଣ ସମସ୍ୟା ସମାଧାନ ଦାବିରେ ଭାପୁର ପଞ୍ଚାୟତର ମହୁଲପୁଞ୍ଜି ଗ୍ରାମବାସୀ ଭୋଟବର୍ଜନ ନିଷ୍ପତ୍ତି ନେଇଥିଲେ। ତେବେ ପ୍ରଶାସନିକ ଅଧିକାରୀମାନେ ପହଞ୍ଚତ୍ ବୁଝାଶୁଝା ପରେ ମଧ୍ୟାହ୍ନ ୧୨ଟାରେ ଭୋଟଗ୍ରହଣ ଆରମ୍ଭ ହୋଇଥିଲା। ଏହି ଦୁଇ ଘଟଣାକୁ ବାଦ୍ଦେଲେ ମତଦାନକୁ ନେଇ ଉଭୟ ବ୍ଲକର ଭୋଟରଙ୍କ ମଧ୍ୟରେ ବିପୁଳ ଉତ୍ସାହ ପରିଲକ୍ଷିତ ହୋଇଥିଲା।
ସଦର ବ୍ଲକର ୩୦ ପଞ୍ଚାୟତର ୩୯୯ ବୁଥ୍ରେ ୧ ଲକ୍ଷ ୧୮ ହଜାର ୨୬୯ ଭୋଟର ଥିବାବେଳେ ୯୬ ହଜାର ୬୬୦ ଜଣ ସେମାନଙ୍କ ମତସାବ୍ୟସ୍ତ କରିଛନ୍ତି। ତନ୍ମଧ୍ୟରେ ୪୬ ହଜାର ୩୪୧ ମହିଳା ଏବଂ ୫୦ ହଜାର ୩୧୯ ପୁରୁଷ ଭୋଟର ଅଛନ୍ତି। ସେହିପରି ଓଡ଼ାପଡ଼ା ବ୍ଲକରେ ୨୮ ପଞ୍ଚାୟତର ୪୧୯ ବୁଥ୍ରେ ୧ ଲକ୍ଷ ୧୦ ହଜାର ୩୨୦ ଭୋଟର ରହିଥିବାବେଳେ ୮୮ ହଜାର ୭୩୪ଜଣ ମତଦାନ କରିଥିଲେ। ସେଥିରୁ ୪୨ ହଜାର ୨୪୯ ମହିଳା, ୪୬ ହଜାର ୪୮୪ ପୁରୁଷ ଏବଂ ଅନ୍ୟାନ୍ୟ ବର୍ଗର ଜଣେ ଭୋଟର ଅଛନ୍ତି। ଜିଲାରେ ଦ୍ୱିତୀୟ ପର୍ଯ୍ୟାୟ ନିର୍ବାଚନ ଶାନ୍ତିପୂର୍ଣ୍ଣ ଭାବେ ଶେଷ ହୋଇଛି। ଅବଶିଷ୍ଟ ଦୁଇ ପର୍ଯ୍ୟାୟରେ ବାକିଥିବା ୪ ବ୍ଲକରେ ଭୋଟ ହେବ। ସଚେତନ ନାଗରିକ ଭାବେ ନିର୍ବାଚନରେ ଅଂଶଗ୍ରହଣ କରିବା ଏବଂ ଶାନ୍ତିଶୃଙ୍ଖଳାର ସହ ଏହାକୁ ଶେଷ କରିବାକୁ ଜିଲାପାଳ ସରୋଜ କୁମାର ସେଠୀ ସମସ୍ତଙ୍କ ସହଯୋଗ କାମନା କରିଛନ୍ତି।
