ଆନନ୍ଦପୁର,୯।୯(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ଥାନାର ମାତ୍ର ଶହେ ମିଟର ଦୂର ବଡ଼ଦାଣ୍ଡଠାରେ ଥିବା ଏକ ଜୁଏଲାରୀ ଦୋକାନରୁ ସୁନା ଓ ରୁପା ଅଳଙ୍କାର ବ୍ୟାଗ୍କୁ ଦୁର୍ବୃତ୍ତମାନେ ଝାମ୍ପି ନେଇଥିବା ଥାନାରେ ଅଭିଯୋଗ ହୋଇଛି। ପୋଲିସ ଦୁର୍ବୃତ୍ତମାନଙ୍କ ଟେର୍ ପାଇ ନ ଥିବାବେଳେ ବ୍ୟବସାୟୀ ଜଣକ ନିରାଶ ହୋଇପଡ଼ିଛନ୍ତି। ଆନନ୍ଦପୁରର କୃତ୍ତିବାସ ସାହୁଙ୍କ ପୁଅ ବିଶ୍ୱରଞ୍ଜନ ବଡ଼ଦାଣ୍ଡଠାରେ ଏକ ଜୁଏଲାରୀ ଦୋକାନ କରିଛନ୍ତି। ପ୍ରତ୍ୟେକ ଦିନ ଭଳି ସେ ସୋମବାର ପୂର୍ବାହ୍ନରେ ଦୋକାନ ଖୋଲିଥିଲେ। ଦୋକାନ ଖୋଲିବା ପରେ ଘରୁ ଆଣିଥିବା ୪ କେଜି ଓଜନର ରୁପା ଓ ୪୫୦ ଗ୍ରାମର ସୁନା ଅଳଙ୍କାର ବ୍ୟାଗ୍ଟିକୁ ଦୋକାନ ଭିତରେ ରଖି ନିକଟସ୍ଥ ଏକ ନଳକୂପକୁ ପାଣି ଆଣିବାକୁ ଯାଇଥିଲେ। ପାଣି ଆଣି ଫେରିବା ବେଳକୁ ବାଇକ୍ ଯୋଗେ ଆସିଥିବା ଦୁଇଜଣ ଦୁର୍ବୃତ୍ତ ଦୋକାନରୁ ବ୍ୟାଗ୍ଟି ଉଠାଇ ନେଇ ଫେରାର ହୋଇଯାଇଥିଲେ। ଏନେଇ ବିଶ୍ୱରଞ୍ଜନ ଆନନ୍ଦପୁର ଥାନାରେ ଲିଖିତ ଅଭିଯୋଗ କରିଛନ୍ତି। ଲୁଟ୍ ହୋଇଥିବା ବ୍ୟାଗ୍ରେ ପାଖାପାଖି ୨୦ ଲକ୍ଷରୁ ଊର୍ଦ୍ଧ୍ୱ ଟଙ୍କାର ସୁନା ଅଳଙ୍କାର ରହିଥିବା ବ୍ୟବସାୟୀ ଅଭିଯୋଗ କରିଛନ୍ତି। ଆନନ୍ଦପୁର ପୋଲିସ କେସ୍ ନଂ ୧୬୪/୧୯ରେ ଏକ ମାମଲା ରୁଜୁୁ କରି ଘଟଣାର ତଦନ୍ତ ଆରମ୍ଭ କରିଛି। ତେବେ ନିକଟରେ ଥିବା ଏକ ବ୍ୟାଙ୍କର ସିସିଟିଭି ଫୁଟେଜ୍କୁ ଯାଞ୍ଚ କରାଗଲେ ଦୁର୍ବୃତ୍ତଙ୍କ ସମ୍ପର୍କରେ ଯଥେଷ୍ଟ ସୁରାକ୍ ମିଳିପାରନ୍ତା ବୋଲି ବ୍ୟବସାୟୀ କହିଛନ୍ତି।
