ନଏଡା,୯।୯: ନୂଆ ମୋଟର ଯାନ ନିୟମ ଅନୁଯାୟୀ ଏବେ ଏହାର ଉଲ୍ଲଂଘନକାରୀଙ୍କୁ ଅଟକାଇ ପୋଲିସ ଚାଲାଣ କାଟିବା କଥା ସମସ୍ତଙ୍କୁ ଜଣା। ହେଲେ ରବିବାର ନଏଡାର ସେକ୍ଟର ୬୨ରେ ଜଣେ କାର୍ ଚାଳକଙ୍କୁ ଅଟକାଇ ପୋଲିସ ଚାଲାଣ କାଟୁଥିବା ବେଳେ ତାଙ୍କର ହୃଦଘାତରେ ମୃତ୍ୟୁ ହେବା ଏବେ ଚର୍ଚ୍ଚାର ବିଷୟ ପାଲଟିଛି। ସୂଚନା ମୁତାବକ, କାର୍ ଚାଳକ ଜଣଙ୍କ ହେଲେ ୪୩ ବର୍ଷୀୟ ଗୌରବ ଶର୍ମା। ସେ ସେକ୍ଟର ୫୨ ଶତାବ୍ଦି ବିହାରରେ ରହୁଥିବା ବେଳେ ଏକ ସପ୍ଟଓ୍ବେୟାର କମ୍ପାନୀରେ କାମ କରୁଥିଲେ। ରବିବାର ସେ ତାଙ୍କ ମାତାପିତାଙ୍କ ସହ ଫେରୁଥିବା ବେଳେ ସେକ୍ଟର ୬୨ରେ ପୋଲିସ ତାଙ୍କୁ ଅଟକାଇ କାଗଜ ପତ୍ର ଯାଞ୍ଚ କରିବା ସମୟରେ ପୋଲିସ ସହ ତାଙ୍କର ଝଗଡା ହୋଇଥିଲା। ଆଉ ଏତିକି ବେଳେ ତାଙ୍କର ହୃଦ୍ଘାତ ହେବାରୁ ସେହିଠାରେ ହିଁ ସେ ତଳେ ପଡିଯାଇଥିଲେ। ଆଉ ପୋଲିସ ତାଙ୍କୁ ସାହାଯ୍ୟ କରିବା ବଦଳରେ ସେଠାରୁ ଚାଲିଯିବାରୁ ସ୍ଥାନୀୟ ଲୋକଙ୍କ ସହାୟତାରେ ତାଙ୍କୁ ହସ୍ପିଟାଲ ନିଆଯାଇଥିଲା। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
