ଅହମ୍ମଦାବାଦ,୧୦।୧: ଗୁଜରାଟର ଅହମ୍ମଦାବାଦରେ ଏକ ଦୁଃଖଦ ଘଟଣା ଘଟିଛି। ସ୍କୁଲ ପରିସରରେ ଜଣେ ଛାତ୍ରୀ ହୃଦଘାତରେ ପ୍ରାଣ ହରାଇଛନ୍ତି। ଏହାର ସିସିଟିଭି ଫୁଟେଜ୍ ସାମ୍ନାକୁ ଆସିବା ପରେ ଭାବବିହ୍ବଳ କରୁଛି। ନିଜ ବ୍ୟାଗ୍ ଏବଂ ଟିଫିନ୍ ବାକ୍ସ ଧରି ପିଲାଟି କୋରିଡରରେ ଥିବା ବେଳେ ଅସହଜ ଅନୁଭବ କରୁଛି। ପରେ ସେ ସେଠାରେ ଥିବା ଏକ ଚଉକି ଉପରେ ବସି ପଡ଼ୁଛନ୍ତି। ଏହାର ୮ ସେକେଣ୍ଡ ମଧ୍ୟରେ ଛାତ୍ରୀଜଣଙ୍କ ତଳେ ପଡ଼ି ଯାଉଛନ୍ତି। ନିକଟରେ ଉପସ୍ଥିତ ମହିଳା କର୍ମଚାରୀ ତାଙ୍କୁ ଦେଖିବା ପରେ ଚିକିତ୍ସା ପାଇଁ ନିଆଯାଇଥିଲା। ହେଲେ ତାଙ୍କର ମୃତ୍ୟୁ ଘଟିଥିଲା।
ସୂଚନାନୁଯାୟୀ, ଏଭଳି ଚକିତ କଲାଭଳି ଘଟଣା ଅହମ୍ମଦାବାଦର ଥଲତେଜ ଅଞ୍ଚଳରେ ଥିବା ଜେବର ସ୍କୁଲ ଫର୍ ଚିଲ୍ଡ୍ରେନ୍ରେ ଘଟିଛି। ୮ ବର୍ଷୀୟ ଛାତ୍ରୀ ଗାର୍ଗି ରାନପାରାଙ୍କ ମୃତ୍ୟୁ ହୃଦଘାତରୁ ହୋଇଛି। ସେ ସକାଳ ସାଢ଼େ ୭ଟାରେ ଅଟୋ ରିକ୍ସାରେ ସ୍କୁଲରେ ପହଞ୍ଚିଥିଲେ। ହେଲେ ହଠାତ ସେ ଛାତିରେ ଯନ୍ତ୍ରଣା ଅନୁଭବ କରି ଅସୁସ୍ଥ ହେବା ପରେ ସ୍କୁଲ କର୍ମଚାରୀ ତାଙ୍କୁ ସିପିଆର୍ ଦେଇଥିଲେ। ହେଲେ ସେ ଉଠିଲେ ନାହିଁ ତାଙ୍କୁ ନିକଟସ୍ଥ ଏକ ଡାକ୍ତରଖାନାକୁ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପ୍ରାରମ୍ଭିକ ରିପୋର୍ଟରୁ ତାଙ୍କ ମୃତ୍ୟୁ ହୃଦ୍ଘାତରୁ ହୋଇଥିବା କୁହାଯାଉଛି।
ଛାତ୍ରୀଙ୍କ ମା’ବାପା ମୁମ୍ବାଇରେ ଥିବା ଯୋଗୁ ତାଙ୍କୁ ସୂଚନା ଦିଆଯାଇଛି। ତାଙ୍କୁ ଡାକ୍ତରଖାନା ନିଆଯାଇଥିବା ବେଳେ ଛାତ୍ରୀଙ୍କ କୌଣସି ରୋଗ ନ ଥିବା ଜଣାପଡ଼ିଥିଲା।
