ଜେନେଭା, ୧ା୧୨: ଏଚ୍ଆଇଭି ବିଶ୍ୱସ୍ତରୀୟ ପ୍ରମୁଖ ସ୍ବାସ୍ଥ୍ୟ ସଙ୍କଟ ପାଲଟିଛି। ଆସନ୍ତା ୧୦ ବର୍ଷ ମଧ୍ୟରେ ବିଶ୍ୱର ପ୍ରାୟ ୭୭ ଲକ୍ଷ ଲୋକଙ୍କ ଏଡ୍ସ କିମ୍ବା ଏହାଜନିତ ରୋଗରେ ମୃତ୍ୟୁ ହେବାର ଆଶଙ୍କା ରହିଛି ବୋଲି ଏଚ୍ଆଇଭି ଏବଂ ଏଡ୍ସ (ୟୁଏନ୍ଏଡ୍ସ) ଉପରେ ଜାତିସଂଘ ପ୍ରୋଗ୍ରାମର ଏକ ରିପୋର୍ଟ ପ୍ରକାଶ ପାଇଛି। ପ୍ରତିବର୍ଷ ଡିସେମ୍ବର ୧ରେ ବିଶ୍ୱ ଏଡ୍ସ ଦିବସ ପାଳନ କରାଯାଉଥିବାବେଳେ ଏହି ବୈଶ୍ୱିକ ସଙ୍ଗଠନ ଏଭଳି ଚେତାବନୀ ଦେଇଛି।
ଏଚ୍ଆଇଭିର ଶିକାର ହୋଇ ଏ ପର୍ଯ୍ୟନ୍ତ ବିଶ୍ୱରେ ୩ କୋଟି ୬୬ ଲକ୍ଷ ଲୋକଙ୍କ ଜୀବନ ଯାଇଛି। କେବଳ ୨୦୨୦ରେ ପ୍ରାୟ ୬ ଲକ୍ଷ ୮୦ ହଜାର ଲୋକ ଏଚ୍ଆଇଭି ଏବଂ ଏ ସଂକ୍ରାନ୍ତ ରୋଗ ଯୋଗୁ ମୃତ୍ୟୁମୁଖରେ ପଡ଼ିଥିବାବେଳେ ୧୫ ଲକ୍ଷ ଲୋକ ସଂକ୍ରମିତ ହୋଇଛନ୍ତି। ବିଶ୍ୱରେ ପ୍ରାୟ ୩ କୋଟି ୮୦ ଲକ୍ଷ ଜଣ ଏଚ୍ଆଇଭି ସଂକ୍ରମିତ ହୋଇ ଚିକିତ୍ସିତ ହେଉଛନ୍ତି। ଏଡ୍ସ ମଧ୍ୟ ଏକ ମହାମାରୀ ଏବଂ ଏହାକୁ ରୋକିବାକୁ ହୋଇଥିବା ଯୋଜନା ସବୁ ଦିଶାହରା ହୋଇଛି। ଏହା କୋଭିଡ୍ଠାରୁ ମଧ୍ୟ ଭୟଙ୍କର ରୂପ ନେବାରେ ଲାଗିଛି। କରୋନା ଆସିବା ପରଠାରୁ ଏଡ୍ସ ଆକ୍ରାନ୍ତଙ୍କୁ ଅଣଦେଖା କରାଯିବା ସହ ଏହାକୁ ରୋକିବା ପାଇଁ ପଦକ୍ଷେପ ନିଆଯିବାରେ ଅବହେଳା କରାଯାଉଛି। ବହୁ କମ୍ ସଂଖ୍ୟାରେ ଏଡ୍ସ ଆକ୍ରାନ୍ତ ଉପଯୁକ୍ତ ଚିକିତ୍ସା ପାଉଛନ୍ତି। ୧୩୦ ଦେଶରେ ଏଚ୍ଆଇଭି ଚିକିତ୍ସା ନିମନ୍ତେ ଆକ୍ରାନ୍ତଙ୍କ ନିକଟରେ ଡ୍ରଗ୍ସ ସେବା ୬୫ ପ୍ରତିଶତ ବାଧାପ୍ରାପ୍ତ ହୋଇଛି। ତେବେ କେତେକ ଦେଶରେ ଏଡ୍ସ ବିରୋଧୀ ଅଭିଯାନ ଅନେକାଂଶରେ ସଫଳ ହୋଇଛି। ସମସ୍ତ ଦେଶ ଅସମାନତାକୁ ହଟାଇ କୋଭିଡ୍-୧୯କୁ ରୋକିବା ସହ ଏଡ୍ସ ଓ ଭବିଷ୍ୟତର ମହାମାରୀ ବିରୋଧରେ ଲଢ଼ିବା ପାଇଁ ପ୍ରସ୍ତୁତ ହେବାକୁ ରିପୋର୍ଟରେ ପରାମର୍ଶ ଦିଆଯାଇଛି। ବିଶ୍ୱ ନେତାଙ୍କ ସକ୍ରିୟ ପଦକ୍ଷେପ ବିନା ଏଡ୍ସକୁ ହରାଇବା ସହଜ ହେବନାହିଁ। ସମ୍ପ୍ରଦାୟ-ନେତୃତ୍ୱ ଏବଂ ସମ୍ପ୍ରଦାୟ ଭିତ୍ତିକ ଭିତ୍ତିଭୂମି, ଯଥେଷ୍ଟ ମାତ୍ରାରେ ଔଷଧ ଉପଲବ୍ଧ, ଟିକା, ବୈଷୟିକ ଜ୍ଞାନର ବ୍ୟବହାର ବ୍ୟାପକ ହେଲେ ଏଡ୍ସ ସହ ଲଢ଼େଇ ସହଜ ହୋଇପାରିବ ବୋଲି ଜାତିସଂଘ ପକ୍ଷରୁ କୁହାଯାଇଛି।
