ନୟାଗଡ଼ ଅଫିସ,୧୮ା୭: ଲଘୁଚାପଜନିତ ବର୍ଷାରେ ନୟାଗଡ଼ ଜିଲାର ବିଭିନ୍ନ ସ୍ଥାନରେ ବନ୍ୟା ପରିସ୍ଥିତି ସୃଷ୍ଟି କରିଛି। ଶନିବାର ରାତିରୁ ଆରମ୍ଭ ହୋଇଥିବା ଲଗାଣ ବର୍ଷାରେ ଲୁଣିଝରା, କୁସୁମୀ ପରୀ ନଦୀରେ ବନ୍ୟା ଆସିଛି। ନୟାଗଡ଼ ବ୍ଲକର ବାଲିକୁଦିଆରେ ଲୁଣିଝରା ନଦୀ ମାଳବନ୍ଧରେ ୭୫ ଫୁଟର ଘାଇ ସୃଷ୍ଟି ହୋଇଛି। ଏହି ଘାଇ ପାଇଁ ଗହୀରର ୫ଶହ ଏକର ଜମିରେ ବନ୍ୟାଜଳ ପ୍ରବେଶ କରିଛି। ଜିଲାରେ ୧୨୦ରୁ ଊର୍ଦ୍ଧ୍ୱ ଘର ଭାଙ୍ଗିଛି। ସେହିଭଳି ନୟାଗଡ଼ ବ୍ଲକର ଲକ୍ଷ୍ମୀପ୍ରସାଦ ପଞ୍ଚାୟତ ବାରବାଟି ଡିହଗାଁରେ ୪ଫୁଟ ଉଚ୍ଚର ବନ୍ୟାଜଳ ଲହଡ଼ି ଭାଙ୍ଗୁଛି। ଏଥିପାଇଁ ବହୁ ପରିବାର କ୍ଷତିଗ୍ରସ୍ତ ହୋଇଛନ୍ତି। ବାଲିକୁଦିଆ ଗାଁ ଭିତରେ ୧ରୁ ୨ ଫୁଟ ଉଚ୍ଚର ବନ୍ୟାଜଳ ପ୍ରବାହିତ ହେଉଛି। ପୁଣି ନୟାଗଡ଼ ବ୍ଲକର ଯଦୁପୁର ସ୍କୁଲ, ରାଉତରାପୁର ନୂଆସାହି ପରି ୧୦ରୁ ଊର୍ଦ୍ଧ୍ୱ ଗାଁରେ ବନ୍ୟାଜଳ ପଶିଛି।
ଓଡ଼ଗାଁ ବ୍ଲକର କୁରାଳ-ଓଡ଼ଗାଁ ରାସ୍ତା ରବିବାର ପୂର୍ବାହ୍ନ ୮ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ବିଚ୍ଛିନ୍ନ ହୋଇପଡିଥିଲା। କୁସୁମୀ ନଦୀର କୁରାଳ ପୋଲ ଉପରେ ୨ ଫୁଟର ବନ୍ୟାଜଳ ପ୍ରବାହିତ ହେବାରୁ ଏପରି ପରିସ୍ଥିତି ସୃଷ୍ଟି ହୋଇଥିଲା। ନୟାଗଡ଼ ବ୍ଳକରେ ଶନିବାର ରାତିରେ ବେଶି ବର୍ଷା ହୋଇଥିବାବେଳେ ଖଣ୍ଡପଡ଼ା ବ୍ଲକରେ ସବୁଠାରୁ କମ ବର୍ଷା ହୋଇଥିବା ଜିଲା ଜରୁରିକାଳୀନ ବିଭାଗ ପକ୍ଷରୁ ସୂଚନା ମିଳିଛି। ନୂଆଗାଁ ବ୍ଲକରେ ୧୫୫ ମିମି ବର୍ଷା ହୋଇଥିବାବେଳେ ଓଡ଼ଗାଁ ବ୍ଲକରେ ୧୫୨. ୦୭ ମିମି ବର୍ଷା ହୋଇଛି। ପୁଣି ନୟାଗଡ଼ ବ୍ଲକରେ ୧୨୨ ମିମି, ଭାପୁରରେ ୮୫.୦୩ ମିମି, ଦଶପଲ୍ଲା ବ୍ଲକରେ ୧୪୬ ମିମି, ଗଣିଆ ବ୍ଲକରେ ୫୯ ମିମି, ଖଣ୍ଡପଡ଼ା ବ୍ଲକରେ ୪୩.୦୨ ମିମି ଓ ରଣପୁର ବ୍ଲକରେ ୬୮.୮ ମିମି ବର୍ଷା ହୋଇଛି। ଲଘୁଚାପଜନିତ
ବର୍ଷା ଯୋଗୁ ନୟାଗଡ଼ ବ୍ଳକ ନବଘନପୁର ଗାଁର ଅପର୍ତ୍ତି ନାୟକଙ୍କ ୧ ବଖରା ଘର ଭୁଶୁଡ଼ି ପଡିଛି। ଅପର୍ତ୍ତିଙ୍କ ପରିବାର ଜରି ପାଲ ତଳେ ରହୁଛନ୍ତି। ସେହିପରି ବିରୁଡା ପଞ୍ଚାୟତ ମର୍ଦ୍ଦରାଜପୁର ଗାଁର ଗୋବର୍ଦ୍ଧନ ସ୍ବାଇଁଙ୍କ ଘର ଭାଙ୍ଗିପଡିିଛି। ଘର ଭିତରେ କୁସୁମୀ ନଦୀର ବନ୍ୟାଜଳ
ପ୍ରବେଶ କରିଛି। ଏନେଇ ବାଲିକୁଦିଆ ଗାଁର ଚାଷୀ ଘନଶ୍ୟାମ ପ୍ରଧାନ କୁହନ୍ତି, ମୋର ୪ମାଣ ଧାନ ଫସଲ ଉଜୁଡି ଯାଇଛି। ମାଳବନ୍ଧରେ ଘାଇ ଯୋଗୁ ମୋ ଗାଁର ବାହାଡା ଗହୀରର ୫୦୦ ଏକର ଧାନ ଜମିର ଫସଲ ନଷ୍ଟ ହୋଇଛି। ଗଦାଧରପ୍ରସାଦ ସରପଞ୍ଚ ଲକ୍ଷ୍ମୀଧର ପାତ୍ର କୁହନ୍ତି, ଘାଇ ହେବା ଯୋଗୁ ବେଶି କ୍ଷୟକ୍ଷତି ହୋଇଛି।
