ଖୋର୍ଦ୍ଧା ଅଫିସ,୨୪।୮: ଖୋର୍ଦ୍ଧା ଜିଲାରେ କୋଭିଡ୍ ନିୟନ୍ତ୍ରଣ ଲାଗି ପ୍ରଶାସନ ପକ୍ଷରୁ ବିଭିନ୍ନ ପଦକ୍ଷେପ ଗ୍ରହଣ କରାଯାଉଛି। ରବିବାର ସୁଦ୍ଧା ଖୋର୍ଦ୍ଧା ଗ୍ରାମାଞ୍ଚଳରେ ୪୦,୯୭୫ଜଣଙ୍କ ପରୀକ୍ଷା କରାଯାଇଥିବା ବେଳେ ସେଥିରୁ ୩,୪୩୬ଜଣ ପଜିଟିଭ୍ ଚିହ୍ନଟ ହୋଇଛନ୍ତି। ୧୪୨୩ ଆକ୍ଟିଭ କେଶ ରହିଛି। ଆରୋଗ୍ୟ ହାର ବଢୁଥିବା ବେଳେ ୭୪% ଗ୍ରାମାଞ୍ଚଳ କୋଭିଡ୍ ମୁକ୍ତ ରହିଛି ବୋଲି ଜିଲାପାଳ ସନତ୍ କୁମାର ମହାନ୍ତି କହିଛନ୍ତି। ଅନ୍ୟପଟେ ଜିଲାରେ ଭୁବନେଶ୍ୱରକୁ ମିଶାଇ ହୋଇଥିବା କୋଭିଡ୍ ପରୀକ୍ଷଣରୁ ଗ୍ରାମାଞ୍ଚଳରେ ୩୫% ସଂକ୍ରମିତ ଚିହ୍ନଟ ହୋଇଛନ୍ତି। ଜିଲାର ବାଣପୁର, ଟାଙ୍ଗୀ, ବାଲୁଗଁା ଏବଂ ବୋଲଗଡ଼ରୁ ସର୍ବାଧିକ ସଂକ୍ରମିତ ରହିଛନ୍ତି। ଏହି ୪ ଅଞ୍ଚଳରେ ସ୍ବାସ୍ଥ୍ୟଟିମ୍ ଘରକୁଘର ବୁଲି କୋଭିଡ୍ ସଚେତନତା ଏବଂ ସର୍ବେକ୍ଷଣ କରୁଛନ୍ତି ବୋଲି ଜିଲାପାଳ କହିଛନ୍ତି। ୨୩୭ କୋଭିଡ୍ ଯୋଦ୍ଧାଙ୍କ ମଧ୍ୟରୁ ୯୯ଜଣ ସୁସ୍ଥ ହୋଇ ଫେରିଥିବା ବେଳେ ୧୩୭ ଜଣ ଚିକିତ୍ସିତ ହେଉଛନ୍ତି। ଗ୍ରାମାଞ୍ଚଳରେ ୫୩୦ଜଣ ହୋମ୍ ଆଇସୋଲେଶନରେ ରହିଛନ୍ତି। ୨୯୦ ଡାକ୍ତର, ଶହେରୁ ଊର୍ଦ୍ଧ୍ୱ ସ୍ବାସ୍ଥ୍ୟକର୍ମୀ, ଷ୍ଟାଫ୍ ନର୍ସ, ଟେକ୍ନିସିଆନ ଏବଂ ପାରାମେଡିକାଲ ଷ୍ଟାଫ୍ଙ୍କୁ ନେଇ ଗଠିତ ୨୨ଟି ମେଡିକାଲ ଟିମ୍ ସ୍ବାସ୍ଥ୍ୟସେବାରେ ନିୟୋଜିତ ଅଛନ୍ତି। ଜିଲା ମୁଖ୍ୟ ଚିକିତ୍ସାଳୟରେ ନିୟନ୍ତ୍ରଣ କକ୍ଷ(ନଂ.୦୬୭୫୫-୨୨୩୧୭୮)କୋଭିଡ୍ ମୁକାବିଲା ଦିଗରେ କାର୍ଯ୍ୟ କରୁଛି। ସ୍ଥାସ୍ଥ୍ୟ ଭୂତ୍ତିଭୂମିର ସୁଦୃଢୀକରଣ, ବ୍ୟାପକ କୋଭିଡ୍ ପରୀକ୍ଷଣ, ଲକ୍ଷଣଯୁକ୍ତଙ୍କୁ ଆଇସୋଲେଶନ ଏବଂ ଡାକ୍ତରଙ୍କ ଲାଗି ହ୍ବାଟସଆପ୍ ଗ୍ରୁପ ଗଠନ କରାଯାଇ କୋଭିଡ୍ ନିୟନ୍ତ୍ରଣ କରାଯାଉଛି। ଓଡ଼ିଶାକୁ ଫେରି କ୍ୱାରାଣ୍ଟାଇନ୍ ଅବଧି ଶେଷ କରିଥିବା ପ୍ରବାସୀଙ୍କୁ ୨ହଜାର ଟଙ୍କା ଲେଖାଏ ପ୍ରଦାନ କରାଯାଇଛି। ଏହି ସମସ୍ତ ଅର୍ଥ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ଭରଣା କରାଯାଉଛି ବୋଲି ଜିଲାପାଳ ମହାନ୍ତି କହିଛନ୍ତି।
